វេណស៊ុយអេឡាបោះឆ្នោតរើសប្រធានាធិបតីថ្មី
នៅថ្ងៃអាទិត្យនេះ ប្រជាជនវេណេស៊ុយអេឡា បាននាំគ្នាទៅបោះឆ្នោតជ្រើសរើសប្រធានាធិបតីថ្មី បន្តពីលោក Hugo Chavez ដែលបានទទួលមរណភាពកាលពីថ្ងៃ ៥មីនា កន្លងទៅ ដោយរោគមហារីកប្រូស្តាត។ គេសង្កេតឃើញមានបេក្ខជនសំខាន់ពីររូប នៅក្នុងការប្រកួតយកសម្លេងឆ្នោត គឺលោក Nicolas Maduro ដែលជាប្រធានាធិបតីបណ្តោះអាសន្ននៅវេណេស៊ុយអេឡា និងលោក Henrique Capriles មកពីគណបក្សប្រឆាំង។ អាជ្ញាធរមានការប្រុងប្រយ័ត្នខ្ពស់ បានដាក់ពង្រាយទាហានការពារសុវត្ថិភាព នៅទូទាំងប្រទេស ដោយសារខ្លាចមានអំពើឃាតកម្មលើលោក Nicolas Maduro ដែលគេរំពឹងថា នឹងទទួលបានជោគជ័យក្នុងការបោះឆ្នោតនេះ។ លទ្ធផលផ្លូវការនៃការបោះឆ្នោតនឹងប្រកាសអោយដឹងនៅយប់ថ្ងៃអាទិត្យចូលថ្ងៃចន្ទ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៣
ប្រជាជនវេណស៊ុយអេឡា បាននាំគ្នាទៅបោះឆ្នោតនៅថ្ងៃអាទិត្យនេះ ដើម្បីរើសយកប្រធានាធិបតីថ្មី បន្តពីលោក Hugo Chavez។ យោងតាមការស្ទាបស្ទង់មតិ ក្នុងការបោះឆ្នោតនេះ លោក Nicolas Maduro ដែលជាប្រធានាធិបតីបណ្តោះអាសន្ន មានប្រៀបជាងគូប្រជែងរបស់លោក គឺលោក Henrique Capriles បេក្ខជនមកពីគណបក្សប្រឆាំង។
ដោយឡែក ស្ថានភាពនៃការបោះឆ្នោតមានលក្ខណៈតានតឹង។ អាជ្ញាធរបានសំដែងការប្រុងប្រយ័ត្នខ្ពស់ ដោយបានដាក់ពង្រាយទាហានមួយសែនប្រាំម៉ឺននាក់ នៅទូទាំងប្រទេស។ ព្រំដែនជាមួយប្រទេសកូឡុំប៊ី ត្រូវបិទមិនអោយមានការចេញចូល រហូតដល់ថ្ងៃចន្ទស្អែក។ មូលហេតុគឺថា អាជ្ញាធរវេណេស៊ុយអេឡា ខ្លាចមានអំពើឃាតកម្មកើតឡើងលើរូបលោក Nicolas Maduro។
គួរបញ្ជាក់ថា តាំងតែពីដើមសប្តាហ៍មក រដ្ឋាភិបាលវេណស៊ុយអេឡា បានប្រកាសថា គណបក្សប្រឆាំងកំពុងតែរៀបចំរដ្ឋប្រហារ។ ហើយកងស្វ័យត្រាណនៅអាមេរិកកណ្តាលក៏កំពុងតែចង់ធ្វើឃាតលើ លោក Nicolas Maduro ផងដែរ។ អាជ្ញាធរបានប្រាប់ថា បានឃាត់ខ្លួនមនុស្សជាច្រើននាក់ ដែលបានឃុបខិតចង់ធ្វើរដ្ឋប្រហារនេះ។
លោក Nicolas Maduro មានអាយុ៥០ ឆ្នាំ ជាអតីតអ្នកបើកបររថយន្តក្រុង និងប្រធានសហជីព។ បន្ទាប់ពីអតីតប្រធានាធិបតី Hugo Chavez បានទទួលមរណភាពកាលពីដើមខែមីនាកន្លងមក លោក Nicolas Maduro បានទទួលប្រជាប្រិយភាពខ្ពស់ បន្តពីលោក Hugo Chavez។ ក្នុងការឃោសនាបោះឆ្នោតកន្លងមក លោកបានសំដែងវោហារបែបដំឡើងសាច់ដុំ ត្រាប់តាមអតីប្រធានាធិបតី ដោយលោកសន្យាថា នឹងបន្តមាគ៌ានយោបាយបដិវត្តន៍របស់លោក Hugo Chavez តទៅទៀត។
ប្រសិនបើលោកឈ្នះឆ្នោតជាប្រធានាធិបតីថ្មីមែននោះ Nicolas Maduro ត្រូវប្រឈមនឹង បញ្ហាចំបងគឺថា លោកត្រូវធ្វើយ៉ាងណាគ្រប់គ្រងអោយបាននូវសម្ព័ន្ធចំរុះរបស់អតីតប្រធានាធិបតីចាស់ ដែលក្នុងនោះសមាសភាពសមាជិកនានា មានបែបផែនប្លែកពីគ្នា គឺថាមានបណ្តាជនដែលមានទស្សនបែបឆ្វេងនិយម ពាណិជ្ជករ រឺក៏ក្រុមទាហានផ្សេងៗ នៅផ្តុំធ្វើការជាមួយគ្នា។
ផ្ទុយទៅវិញ បើមេដឹកនាំបក្សប្រឆាំង គឺលោក Henrique Capriles បានទទួលជោគជ័យវិញ គណបក្សប្រឆាំងត្រូវធ្វើយ៉ាងណាអោយសកម្មជនគាំទ្រប្រធានាធិបតី Hugo Chavez រាប់លាននាក់ ផ្តល់ទំនុកចិត្តលើខ្លួន។ កន្លងមក គណបក្សប្រឆាំងធ្លាប់បានសន្យាថា នឹងសំរេចអោយបាននូវសេដ្ឋកិច្ចបែបប្រទេសប្រេស៊ីល តាមរយៈគោលនយោបាយសេដ្ឋកិច្ចសេរីនិយម រួមគ្នានឹងកម្មវិធីសង្គមផ្សេងៗ។
លោក Nicolas Maduro ធ្លាប់ចោទ លោក Henrique Capriles ថាជាកូនអ្នកមានទ្រព្យសម្បត្តិ ចាំតែការពារបញ្ញវន្តដែលមានលុយកាក់ និងគាំទ្រអាមេរិកដែលជាសត្រូវរបស់ជាតិ។ លោក Henrique Capriles បានចោទទៅលោក Nicolas Maduro វិញថា បានក្បត់នឹងកេរដំណែលរបស់ប្រធានាធិបតី Hugo Chavez ដោយគិតតែពីបំពេញលុយកាក់ក្នុងហោប៉ៅរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ