វ៉េណេស៊ុយអេឡា៖លោកហ័ន ហ្កាយដូអំពាវនាវឲ្យមានបាតុកម្មជាថ្មីដោយហៅកងទ័ពឲ្យរួមកម្លាំងជាមួយលោក
នៅក្នុងប្រទេសវ៉េណេស៊ុយអេឡា ស្ថានការណ៍នយោបាយកំពុងបន្តតានតឹងដោយនៅថ្ងៃអាទិត្យ ទី២៧ មករា លោកហ័ន ហ្កាយដូ ប្រធានសភា និងដែលបានប្រកាសដោយខ្លួនឯងជាប្រធានាធិបតីស្តីទីបានអំពាវនាវឲ្យមានបាតុកម្មជាថ្មីនៅថ្ងៃពុធ ទី៣០ មករា និងថ្ងៃសៅរ៍ ទី២ កុម្ភៈ។ ទន្ទឹមនឹងអំពាវនាវឲ្យមានក្បួនបាតុកម្មចំនួនពីរក្នុងសប្តាហ៍នេះ លោកហ្កាយដូក៏បានបោះដៃរកកងទ័ពឲ្យរួមសហការណ៍ជាមួយលោកក្នុងការទម្លាក់លោកប្រធានាធិបតីនីកូឡា ម៉ាឌូរ៉ូ។ គួររម្លឹកថាមកទល់ពេលនេះ វិបត្តិនយោបាយនៅវ៉េណេស៊ុយអេឡាកំពុងបន្តពុះចែកសហគមន៍អន្តរជាតិជាពីរ នៅម្ខាងបានបន្តគាំទ្រលោកម៉ាឌូរ៉ូ និងនៅម្ខាងទៀតបានងាកទៅគាំទ្រលោកហ្កាយដូ។
ចុះផ្សាយនៅថ្ងៃ៖
ស្តាប់ - ០២:៣៤
រហូតមកដល់ពេលនេះ កងទ័ពកំពុងបន្តមានសមានចិត្ត និងស្មោះស័គ្រចំពោះលោកនីកូឡា ម៉ាឌូរ៉ូ។ តែលោកហ័ន ហ្កាយដូសង្ឃឹមថា ជាមួយនឹងក្បួនបាតុកម្មនៅថ្ងៃពុធ ទី៣០ មករា និងថ្ងៃសៅរ៍ ទី២ កុម្ភៈខាងមុខ កងទ័ពនឹងងាកទៅគាំទ្រលោកវិញ។ « ថ្ងៃពុធ ទី៣០ មករាពីម៉ោង ១២ ថ្ងៃត្រង់ដល់ម៉ោង ២ រសៀលនៅទូទាំងប្រទេសវ៉េណេស៊ុយអេឡា យើងនឹងចុះផ្លូវដើម្បីទាមទារឲ្យកងទ័ពចូលរួមជាមួយប្រជាជន ហើយនៅថ្ងៃសៅរ៍ ទី២ កុម្ភៈ យើងអំពាវនាវឲ្យមានមហាបាតុកម្មនៅទូទាំងប្រទេសវ៉េណេស៊ុយអេឡា និងនៅលើពិភពលោកដើម្បីសាទរជំហរគាំទ្ររបស់សហភាពអឺរ៉ុប និងឱសានវាទ » នេះជាការថ្លែងរបស់លោកហ្កាយដូនៅក្នុងសារជាវីដេអូមួយតាមបណ្តាញសង្គម Twitter របស់លោក។
គម្រោងបាតុកម្មទាំងពីរលើកនៅថ្ងៃខាងមុខត្រូវបានលោកហ្កាយដូរៀបចំក្រោមទ្រង់ទ្រាយពីរខុសគ្នា។ សម្រាប់បាតុកម្មក្នុងថ្ងៃពុធ ទី៣០ មករា គ្មានពិធីដង្ហែក្បួន ឬជាការជួបជុំទេ តែជាការបញ្ចេញកំហឹងមិនសប្បាយចិត្តដោយគ្រាន់តែចេញឈរនៅមុខផ្ទះ ហើយសម្រាប់បាតុកម្មក្នុងថ្ងៃសៅរ៍ ទី២ កុម្ភៈ ជាការជួបជុំប្រមូលផ្តុំដូចធ្លាប់បានធ្វើក្នុងថ្ងៃពុធ ទី២៣ មករាកន្លងទៅ។ តែអ្វីដែលលោកហ្កាយដូចង់ធ្វើឲ្យលើសពីថ្ងៃពុធសប្តាហ៍មុន គឺការចូលរួមរបស់ប្រជាជនវ៉េណេស៊ុយអេឡាទាំងអស់នៅបរទេស ពោលមិនមែនត្រឹមប្រជាជនវ៉េណេស៊ុយអេឡាដែលកំពុងរស់ក្នុងប្រទេសវ៉េណេស៊ុយអេឡាប៉ុណ្ណោះទេ។
គោលដៅ គឺបន្តប្រឆាំងនឹងអំណាចផ្តាច់ការរបស់លោកប្រធានាធិបតីនីកូឡា ម៉ាឌូរ៉ូផង និងក៏ដើម្បីសាទរការបិទបញ្ចប់ឱសានវាទរបស់សហភាពអឺរ៉ុប។ អឺរ៉ុបដែលបានប្រកាសទុកពេល ៨ថ្ងៃ ពោលត្រឹមថ្ងៃសៅរ៍ ទី២ កុម្ភៈឲ្យលោកម៉ាឌូរ៉ូកោះឲ្យមានការរៀបចំការបោះឆ្នោតឡើងវិញ។ បើពុំនោះសោតទេ សហភាពអឺរ៉ុបនឹងប្រកាសទទួលស្គាល់លោកហ្កាយដូដូចប្រទេសមួយចំនួនដែរ។ តែនៅក្នុងបទសម្ភាសន៍ជាមួយទូរទស្សន៍ CNN តួកកី លោកម៉ាឌូរ៉ូបានរក្សាជំហរដោយថ្លែងច្បាស់ៗថា គ្មាននរណាម្នាក់អាចដាក់ឱសានវាទលើវ៉េណេស៊ុយអេឡាបានទេ។
គួររម្លឹកថាមកទល់ពេលនេះ វិបត្តិនយោបាយនៅវ៉េណេស៊ុយអេឡាកំពុងបន្តពុះចែកសហគមន៍អន្តរជាតិជាពីរ នៅម្ខាងមានសហរដ្ឋអាមេរិក កាណាដា អូស្រ្តាលី អ៊ីស្រាអែល និងប្រទេសមួយចំនួននៅអាមេរិកឡាទីនបានទទួលស្គាល់លោកហ្កាយដូ។ ចំណែកនៅម្ខាងទៀត មានរុស្ស៊ី ចិន ឬតួកគីបានបន្តគាំទ្រលោកម៉ាឌូរ៉ូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ