មានមនុស្សស្លាប់ ៣នាក់ និងរបួស ៧នាក់នៅក្នុងព្រឹត្តិការណ៍បាញ់រះលើមូលដ្ឋានទ័ពអាមេរិក
នៅសហរដ្ឋអាមេរិក មានការបាញ់ប្រហារមួយបានកើតឡើងនៅក្នុងមូលដ្ឋានទ័ពអាកាសនាវាចរណ៍ Pensacola ស្ថិតក្នុងរដ្ឋ Florida ដោយបណ្តាលឲ្យស្លាប់មនុស្ស ៣នាក់ និងរបួស ៧នាក់ផ្សេងទៀត។ ចំណែកជនខ្មាន់កាំភ្លើងក៏ត្រូវបានសម្លាប់ភ្លាមៗនៅនឹងកន្លែងដែរ នេះបើការបញ្ជាក់របស់ទ័ពជើងទឹកអាមេរិក។ ជនខ្មាន់កាំភ្លើងដែលគេស្គាល់ជាជនជាតិអារ៉ាប៊ីសាអូឌីត គឺជាទ័ពជើងអាកាសដែលបានទៅរៀនសូត្រនៅទីនោះ។ នៅមុនបញ្ចេញសកម្មភាពរបស់ខ្លួន ជនខ្មាន់កាំភ្លើងបានបង្ហោះសារប្រឆាំងនឹងអាមេរិកដោយចោទអាមេរិកពីបទគាំទ្រ ចាយលុយ និងប្រព្រឹត្តទង្វើឧក្រិដ្ឋប្រឆាំងនឹងអ្នកកាន់សាសនាអ៊ីស្លាម និងមនុស្សលោកទូទៅ។
ចុះផ្សាយនៅថ្ងៃ៖
ស្តាប់ - ០២:០៩
ព្រឹត្តិការណ៍បាញ់ប្រហារបានកើតមាននៅក្នុងបន្ទប់រៀនមួយដែលស្ថិតលើមូលដ្ឋានទ័ពអាកាសនាវាចរណ៍ Pensacola ក្នុងរដ្ឋ Florida។ គឺជាមូលដ្ឋានទ័ពមួយដែលមានទាហានប្រចាំការចំនួន ១៦ ០០០នាក់ និងបុគ្គលិកស៊ីវិលធ្វើការចំនួន ៧ ០០០នាក់។ ជនខ្មាន់កាំភ្លើងជាទាហានជនជាតិអារ៉ាប៊ីសាអូឌីតដែលស្ថិតក្នុងអង្គភាពទ័ពអាកាស និងដែលត្រូវបានអង្គភាពបញ្ជូនឲ្យរៀនសូត្រនៅមូលដ្ឋានទ័ពអាមេរិកាំង Pensacola ដូចជាទាហានអាមរ៉ាប៊ីសាអូឌីតជាច្រើនរយនាក់ផ្សេងទៀតក្នុង ១ឆ្នាំៗ។ រហូតមកដល់ពេលនេះ គេនៅមិនទាន់ដឹងពីកម្មវត្ថុរបស់រូបជនខ្មាន់កាំភ្លើងនៅឡើយទេ។ តែក្រុមអ្នកស៊ើបអង្កេតកំពុងព្យាយាមចង់ដឹងថា តើជាការវាយប្រហារភេរវនិយម ឬយ៉ាងណា?។
អ្វីដែលគេដឹងពេលនេះគឺថា នៅមុនពេលផ្តើមសកម្មភាពរបស់ខ្លួន ជនខ្មាន់កាំភ្លើងបានបង្ហោះសារប្រឆាំងនឹងអាមេរិកនៅលើបណ្តាញសង្គម Twitter។ « ខ្ញុំប្រឆាំងនឹងអំពើអាក្រក់ ហើយសហរដ្ឋអាមេរិកទាំងមូលបានប្រែខ្លួនជាប្រជាជាតិអាក្រក់ » នេះជាសាររបស់ជនខ្មាន់កាំភ្លើងដែលក្រុមឃ្លាំមើលចលនាជីហាតបានផ្តល់ឲ្យ។ ផ្អែកតាមស្ថាប័នអាមេរិកមួយនេះដដែល ជនខ្មាន់កាំភ្លើងមានអត្តសញ្ញាណជាឈ្មោះ Mohammed al-Shamrani។ « ខ្ញុំមិនប្រឆាំងអស់លោកដោយសារតែអស់លោកជាជនជាតិអាមេរិកាំងទេ។ ខ្ញុំមិនស្អប់អស់លោកដោយសារតែសេរីភាពរបស់អស់លោកទេ។ ខ្ញុំស្អប់អស់លោកព្រោះជារៀងរាល់ថ្ងៃ អស់លោកគាំទ្រ ចាយលុយ និងប្រព្រឹត្តបទឧក្រិដ្ឋប្រឆាំងនឹងអ្នកកាន់សាសនាអ៊ីស្លាម និងមនុស្សលោកទាំងមូល » នេះជាសារបន្ថែមរបស់ជនខ្មាន់កាំភ្លើង។
បើតាម ABC News ក្រុមអ្នកស៊ើបអង្កេតកំពុងស្វែងរកផ្ទៀងផ្ទាត់មើលថា តើជនខ្មាន់កាំភ្លើងពិតជាអ្នកដែលបានសរសេរ និងបង្ហោះសារទាំងនេះមែនឬទេ។ ក្រោយព្រឹត្តិការណ៍បាញ់ប្រហារនេះ ប្រធានាធិបតីអាមេរិកលោកដូណាល់ ត្រាំបានសន្ទនាតាមទូរស័ព្ទជាមួយមហាក្សត្រអារ៉ាប៊ីសាអូឌីតសាលម៉ាន។ មហាក្សត្រសាលម៉ានបានបរិហារលើទង្វើដ៏ព្រៃផ្សែ និងសន្យាចូលរួមនៅក្នុងការស៊ើបអង្កេត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ