អ្នកវិទ្យាសាស្រ្តអាមេរិកគាំទ្រលោកអូបាម៉ាក្នុងការចុះកិច្ចព្រមព្រៀងនុយក្លេអ៊ែរជាមួយអ៊ីរ៉ង់
កិច្ចព្រមព្រៀងនុយក្លេអ៊ែរជាមួយអ៊ីរ៉ង់ នៅតែជាប្រធានបទដ៏ក្តៅគគុក ដែលធ្វើឲ្យលោកអូបាម៉ាត្រូវទទួលរងនូវការវាយប្រហារឥតឈប់ឈរពីសំណាក់អ្នកនយោបាយដែលគាំទ្រអ៊ីស្រាអែល ជាពិសេស សមាជិកសភាមកពីគណបក្សសាធារណរដ្ឋ។ ក៏ប៉ុន្តែ ក្នុងពេលប្រឈមមុខនឹងការរិះគន់នេះ លោកអូបាម៉ាទើបនឹងបានទទួលការគាំទ្រដ៏សំខាន់មួយ គឺការគាំទ្រពីសំណាក់ក្រុមអ្នកវិទ្យាសាស្រ្តរបស់អាមេរិកជំនាញខាងនុយក្លេអ៊ែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៣
យោងតាមការចុះផ្សាយរបស់កាសែត The New York Times លិខិតគាំទ្រកិច្ចព្រមព្រៀងនុយក្លេអ៊ែរអ៊ីរ៉ង់ ដែលផ្ញើទៅកាន់លោកប្រធានាធិបតីអូបាម៉ាកាលពីថ្ងៃសៅរ៍ មានចុះហត្ថលេខាដោយអ្នកវិទ្យាសាស្រ្តអាមេរិកចំនួន ២៩រូប ដែលសុទ្ធតែមានឈ្មោះល្បីក្នុងវិស័យនុយក្លេអ៊ែរ ក្នុងចំណោមនោះ មាន ៥រូប គឺជាជ័យលាភីណូបែលខាងរូបវិទ្យា។ អ្នកវិទ្យាសាស្រ្តអស់ទាំងនេះ សុទ្ធតែធ្លាប់ដើរតួនាទីសំខាន់ៗក្នុងកម្មវិធីនុយក្លេអ៊ែររបស់អាមេរិក អ្នកខ្លះធ្លាប់ជាទីប្រឹក្សាសភា សេតវិមាន និងក្រសួងសំខាន់ៗរបស់អាមេរិក។
នៅក្នុងលិខិតដែលមាន២ទំព័រ ពួកគេបានលើកសរសើរដល់លោកអូបាម៉ា និងសហការី ដែលបានចរចាសម្រេចបាននូវកិច្ចព្រមព្រៀងមួយ ដែលពួកគេយល់ឃើញថានឹងមានប្រសិទ្ធភាពក្នុងការទប់ស្កាត់អ៊ីរ៉ង់មិនឲ្យផលិតអាវុធនុយក្លេអ៊ែរ ព្រមទាំងអាចរក្សាស្ថិរភាព និងសន្តិសុខ នៅក្នុងតំបន់មជ្ឈិមបូព៌ា។
ផ្ទុយពីការរិះគន់របស់អ៊ីស្រាអែល និងអ្នកនយោបាយមកពីគណបក្សសាធារណរដ្ឋ អ្នកវិទ្យាសាស្រ្តអាមេរិកបានធ្វើការកត់សម្គាល់ថា កិច្ចព្រមព្រៀង ដែលបានចុះនៅទីក្រុងវីយ៉ែន កាលពីថ្ងៃទី១៤កក្កដាកន្លងទៅនេះ មានកំណត់អំពីនីតិវិធីនៃការត្រួតពិនិត្យ ព្រមទាំងកាតព្វកិច្ចយ៉ាងតឹងតែងបំផុតលើកម្មវិធីនុយក្លេអ៊ែរអ៊ីរ៉ង់ ពោលគឺ តឹងតែងជាងអ្វីដែលមានចែងនៅក្នុងសន្ធិសញ្ញាមិនរីកសាយភាយអាវុធនុយក្លេអ៊ែរទៅទៀត។
សំឡេងគាំទ្រពីសំណាក់អ្នកវិទ្យាសាស្រ្តដ៏មានឥទ្ធិពលលំដាប់ពិភពលោកនេះ អាចនឹងជាទម្ងន់នយោបាយដ៏សំខាន់មួយ សម្រាប់លោកអូបាម៉ា ដែលកំពុងតែបញ្ចុះបញ្ចូលសភាអាមេរិក ឲ្យអនុម័តច្បាប់គាំទ្រកិច្ចព្រមព្រៀងនុយក្លេអ៊ែរអ៊ីរ៉ង់។ សភា ដែលសំឡេងភាគច្រើនស្ថិតក្រោមការគ្រប់គ្រងរបស់គណបក្សសាធារណរដ្ឋដែលមានជំហរប្រឆាំងនឹងកិច្ចព្រមព្រៀងនុយក្លេអ៊ែរអ៊ីរ៉ង់ គ្រោងនឹងបោះឆ្នោត នៅខែកញ្ញាខាងមុខ ដើម្បីសម្រេចទទួលយក ឬច្រានចោលកិច្ចព្រមព្រៀងនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ