នុយក្លេអ៊ែរអ៊ីរ៉ង់ ៖ អាមេរិកនិងអ៊ីស្រាអែលប្រឹងបញ្ចុះបញ្ចូលរកអ្នកគាំទ្ររៀងខ្លួនៗ
នៅល្ងាចថ្ងៃអង្គារទី ៤ សីហានេះ នាយករដ្ឋមន្ត្រីអ៊ីស្រាអែល លោក នេតាន់យ៉ាហ៊ូ បានធ្វើសន្និសីទមួយទៅកាន់សហគមន៍ជ្វីហ្វនៅអាមេរិក ដែលមានសរុបប្រមាណ៥០ក្រុម ដើម្បីបញ្ចុះបញ្ចូលឱ្យក្រុមនេះងើបឡើងប្រឆាំងនឹងកិច្ចព្រមព្រៀងនុយក្លេអ៊ែរអ៊ីរ៉ង់។ ចំណែកខាងប្រធានាធិបតីអាមេរិកវិញ លោក បារ៉ាក់ អូបាម៉ា ក៏បានទទួលជួបតំណាងសហគមន៍ជ្វីហ្វដដែលនេះ ដើម្បីពន្យល់អំពីផលល្អនៃកិច្ចព្រមព្រៀងនុយក្លេអ៊ែរអ៊ីរ៉ង់ជាប្រវត្តិសាស្ត្រ។ លោក អូបាម៉ា នឹងត្រូវថ្លែងសុន្ទរកថានៅចំពោះមុខនិស្សិតអាមេរិក ស្តីអំពីប្រធានបទនុយក្លេអ៊ែរអ៊ីរ៉ង់ នៅថ្ងៃពុធនេះទៀត។
ចុះផ្សាយនៅថ្ងៃ៖
ជនជាតិជ្វីហ្វអាមេរិក ប្រមាណ ១ម៉ឺននាក់ បានភ្ជាប់បណ្តាញ ដើម្បីបានស្តាប់នាយករដ្ឋមន្ត្រីអ៊ីស្រាអែល ធ្វើអត្ថាធិប្បាយ និងបញ្ចេញសក្ខីកម្មប្រឆាំងនឹងកិច្ចព្រមព្រៀងក្រុងវីយ៉ែន ស្តីអំពីនុយក្លេអ៊ែរអ៊ីរ៉ង់។ នេះបើតាមរៀបចំកម្មវិធី។
តាមទូរស័ព្ទពីទីក្រុង ហ្សេរ៉ុយសាឡិម លោក នេតាន់យ៉ាហ៊ូ បានថ្លែងសុន្ទរកថា ដោយគ្មានភ្ញាក់ផ្អើលរិះគន់កិច្ចព្រមព្រៀងរបស់អន្តរជាតិ។ បន្ទាប់មកពលរដ្ឋអាមេរិក ដើមកំណើតជ្វីហ្វ ដែលរស់នៅគ្រប់ជ្រុងរបស់សហរដ្ឋ បាននាំគ្នាចោទជាសំណួរបន្ថែម។ សំណួរដែលអនុញ្ញាតឱ្យលោកនាយករដ្ឋមន្ត្រីអ៊ីស្រាអែល បានវាយប្រហារកាន់ខ្លាំង និងបញ្ជាក់ថា កិច្ចព្រមព្រៀងនុយក្លេអ៊ែរអ៊ីរ៉ង់ ជាមួយក្រុមប្រទេសមហាអំណាចទាំង៥បូកអាល្លឺម៉ង់ គឺជាសុបិនអាក្រក់។ លោក នេតាន់យ៉ាហ៊ូ បានស្នើសុំឱ្យសហគមន៍ជ្វីហ្វនៅអាមេរិកទាំងអស់នាំគ្នាដាក់សម្ពាធលើសភាអាមេរិក ដើម្បីឱ្យសភាបោះឆ្នោតច្រានចោលកិច្ចព្រមព្រៀងនោះ។
ចំណែកខាងលោកអូបាម៉ាវិញ លោកប្រធានាធិបតីបានទទួលជួបសហគមន៍ជ្វីហ្វ នៅសេតវិមាន។ ជំនួបបានប្រព្រឹត្តទៅដោយបិទទ្វារ ប៉ុន្តែដោយគ្មានការសង្ស័យ លោកប្រធានាធិបតី ទំនងជាបានបង្ហាញអំពីចំណុចល្អៗ ដូចដែលលោកធ្លាប់លើកជាសាធារណៈ គាំទ្រកិច្ចព្រមព្រៀងនុយក្លេអ៊ែរនេះ ព្រោះជាដំណោះស្រាយដ៏ប្រសើរជាងគេតែមួយ ដែលអាចទប់ស្កាត់អ៊ីរ៉ង់ មិនឱ្យមានអាវុធនុយក្លេអ៊ែរ។
សម្ពាធមានកាន់តែខ្លាំងឡើងៗ នៅសហរដ្ឋអាមេរិក ជុំវិញសំណុំរឿងនុយក្លេអ៊ែរអ៊ីរ៉ង់ ហើយពេលវេលាក៏កាន់តែខ្លី។ សភាអាមេរិក ត្រូវផ្តល់សច្ចាប័នលើកិច្ចព្រមព្រៀងនុយក្លេអ៊ែរអ៊ីរ៉ង់នេះ តាមរយៈការបោះឆ្នោត នៅដើមខែកញ្ញានេះ។ ហេតុដូច្នេះហើយបានជាលោកអូបាម៉ា ត្រូវខិតខំបញ្ចុះបញ្ចូល គ្រប់គ្នា ដើម្បីបានទទួលការគាំទ្រពីសភាឱ្យកិច្ចព្រមព្រៀងអាចចូលជាធរមានបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ