សន្និសីទអាកាសធាតុនៅលីម៉ាផលិតចេញបានត្រឹមកិច្ចព្រមព្រៀងគោល
បន្ទាប់ពីពន្យារពេលពិភាក្សាបន្ថែម រយៈពេល ៣០ម៉ោង សន្និសីទអាកាសធាតុនៅទីក្រុងលីម៉ា ប្រទេសប៉េរូ បានបង្កើតចេញ នូវកិច្ចព្រមព្រៀងគោលមួយ ដែលគ្រប់អ្នកតំណាងប្រទេសចំនួន១៩៥ អះអាងថា អាចទទួលយកបាន នៅថ្ងៃអាទិត្យទី ១៤ ធ្នូ។ ប៉ុន្តែ ក្រុមអង្គការការពារបរិស្ថានវាយតម្លៃថា អត្ថបទកិច្ចព្រមព្រៀងគ្មានប្រសិទ្ធិភាព ព្រោះវាមិនបានតម្រូវចាប់បង្ខំក្រុមប្រទេសបញ្ចេញឧស្ម័នពុល ឲ្យទទួលខុសត្រូវលើសកម្មភាពរបស់ខ្លួន។
ចុះផ្សាយនៅថ្ងៃ៖
ស្តាប់ - ០២:១៣
បន្ទាប់ពីជួបពិភាក្សាគ្នារយៈពេល១០ ថ្ងៃ និងបូកបន្ថែម ៣០ម៉ោងដោយសារតែជំហរមិនចុះសម្រុងគ្នារវាងក្រុមប្រទេសខាងជើង និងក្រុមប្រទេសនៅខាងត្បូងនៃផែនដី នៅទីបំផុត ប្រទេសសមាជិករបស់អង្គការសហប្រជាជាតិបានយល់ព្រមព្រៀងគ្នា ទៅលើកម្រិតនៃការចូលរួមរបស់ប្រទេសនីមួយៗ ដើម្បីទប់ស្កាត់ការប្រែប្រួលអាកាសធាតុ។ ជាកិច្ចព្រមព្រៀងដែលកើតចេញពីការពិភាក្សាក្នុងពេលដ៏ប្រថុចញ៉ុចមួយ។
តាំងពីថ្ងៃបើកសន្និសីទអាកាសធាតុ មតិខ្វែងគំនិតគ្នាបានកើតមានជាហូរហែរវាងប្រទេសអភិវឌ្ឍន៍ ឬប្រទេសអ្នកមាន នៅខាងជើងផែនដី និងក្រុមប្រទេសកំពុងអភិវឌ្ឍន៍ ឬប្រទេសដែលស្ថិតនៅភាគខាងត្បូងផែនដី។ ក្រុមប្រទេសនៅខាងត្បូង បានទម្លាក់កំហុសទៅលើប្រទេសអភិវឌ្ឍ ឬប្រទេសឧស្សាហកម្មថា ជាអ្នកបញ្ចេញឧស្ម័នផ្ទះកញ្ចក់ច្រើនជាងគេ។ ដូច្នេះ គេទាមទារឲ្យក្រុមប្រទេសអ្នកមានជាអ្នកត្រូវកាត់បន្ថយឧស្ម័នពុលច្រើនជាងគេ និងត្រូវផ្តល់ថវិកាដល់ប្រទេសក្រីក្រផ្សេងទៀត ដែលកំពុងរងគ្រោះដោយសារការប្រែប្រួលអាកាសធាតុ ដែលជាលទ្ធផលនៃការកើនឡើងនៃឧស្ម័នផ្ទះកញ្ចក់។ សម្រាប់ក្រុមប្រទេសអ្នកមាន ប្រទេសកំពុងអភិវឌ្ឍដូចជាចិន និងឥណ្ឌា ជាជើងឯកបញ្ចេញឧស្ម័នពុល លេខ១ និងលេខ៤ ក្នុងលំដាប់ពិភពលោក។
ក្រុមប្រទេសខាងត្បូងបានទាមទារផងដែរឲ្យគេចាត់ថ្នាក់ សកម្មភាពទប់ស្កាត់កុំឲ្យមានការឡើងកំដៅនៃភពផែនដី ចូលទៅក្នុងការចូលរួមវិភាគទានថ្នាក់ជាតិ។ ក្រុមប្រទេសខាងត្បូង ដែលមិនមែនជាប្រភពបញ្ចេញឧស្ម័នផ្ទះកញ្ចក់ច្រើន ដូចយ៉ាងនៅអាហ្វ្រិក នៅអាស៊ី ឬនៅអាមេរិកឡាទីនជាដើម បានទាមទារយ៉ាងដូច្នេះ ដោយសង្ឃឹមថា ពួកគេនឹងអាចទទួលបានកញ្ចប់ជំនួយអន្តរជាតិសម្រាប់សកម្មភាពថ្នាក់ជាតិប្រយុទ្ធប្រឆាំងនឹងការប្រែប្រួលអាកាសធាតុ។ ក្រុមប្រទេសខាងត្បូងធ្លាប់សង្ឃឹមទទួលប្រយោជន៍ពីកញ្ចប់ថវិកា១០០ពាន់លានដុល្លារ ដែលគេបានព្រមព្រៀងគ្នានៅក្នុងសន្និសីទ ក្នុងប្រទេសដាណឺម៉ាក ឆ្នាំ ២០០៩។ ប៉ុន្តែ ថវិកាដែលនឹងត្រូវផ្តល់នៅឆ្នាំ ២០២០ ដល់ប្រទេសដែលសន្យាចូលរួមកាត់បន្ថយឧស្ម័នពុល រហូតមកដល់ពេលនេះ នៅស្ថិតនៅក្នុងក្តីស្រមៃនៅឡើយ។
សូមបញ្ជាក់ថា កិច្ចព្រមព្រៀងនៅទីក្រុងលីម៉ា ក្នុងប្រទេសប៉េរូ គ្រាន់តែជាកិច្ចព្រមព្រៀង គោល ដែលគេនឹងលើកយកទៅពិភាក្សាលម្អិតបន្ថែម ដើម្បីអាចផលិតចេញជាកិច្ចព្រមព្រៀងសាច់ការ នៅក្នុង សន្និសីទអន្តរជាតិស្តីពីអាកាសធាតុ នៅទីក្រុងប៉ារីស នៅខែធ្នូ ឆ្នាំ។ ក្នុងរយៈពេលរង់ចាំ កិច្ចព្រមព្រៀងដ៏មានមហិច្ឆតា នៅឆ្នាំ ២០១៥ ក្រុមអ្នកតំណាងប្រទេសទាំង១៩៥បានសុខចិត្តសន្យារៀបចំកម្មវិធីនយោបាយថ្នាក់ជាតិ ដើម្បីចូលរួមកាត់បន្ថយឧស្ម័នផ្ទះកញ្ចក់ ដែលជាប្រភពធ្វើឲ្យឡើងកំដៅភពផែនដី។ កម្មវិធីនយោបាយជាតិរបស់ប្រទេសនីមួយៗ នឹងត្រូវលើកយកទៅបង្ហាញ នៅក្នុងសន្និសីទ ក្នុងទីក្រុងប៉ារីស ដែលគេនឹងផ្តោតក្តីសង្ឃឹមសាជាថ្មីថា នឹងអាចចូលរួមកុំឲ្យកំដៅភពផែនដីឡើងខ្ពស់ជាង ២អង្សាសេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ