ព្រំដែន គឺជាដើមចមនៃវិបត្តិការទូតរវាងប្រទេសកូឡុំប៊ី និងប្រទេសវ៉េណេស៊ុយអេឡា
វិបត្តិការទូតរវាងប្រទេសជិតខាងពីរ គឺកូឡុំប៊ី និងវ៉េណេស៊ុយអេឡាកំពុងបន្តយ៉ាងក្តៅគគុក។ ជំនួបជាលើកទី២ រវាងប្រមុខការទូតនៃប្រទេសទំាងពីរនាថ្ងៃសៅរ៍ ទី១២ កញ្ញាក្នុងទីក្រុងគីតូ ប្រទេសអេក្វាទ័រនៅតែគ្មានលទ្ធផលអ្វីជាដុំកំភួនទេ ពិសេសមិនអាចកំណត់ថ្ងៃជំនួបរវាងលោកប្រធានាធិបតីកូឡុំប៊ី ជាន់ ម៉ានុយអែល សង់តូស (Juan Manuel Santos) និងលោកប្រធានាធិបតីវ៉េណេស៊ុយអេឡានីកូឡា ម៉ាឌុយរ៉ូ (Nicolas Maduro)។ សព្វថ្ងៃនេះ ព្រំដែនគោកប្រវែងជាង ២ ០០០គីឡូម៉ែត្រដែលខ័ណ្ឌចែកប្រទេសជិតខាងទំាងពីរត្រូវបានបិទជាបណ្តោះអាសន្ន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:៤៧
អ្វីៗបានចាប់ផ្តើមកាលពីថ្ងៃទី ២០ សីហាកន្លងទៅ។ នៅថ្ងៃនោះ លោកប្រធានាធិបតីវ៉េណេស៊ុយអេឡា នីកូឡា ម៉ាឌុយរ៉ូ (Nicolas Maduro)បានប្រកាសបិទព្រំដែនគោកប្រវែងជាង ២ ០០០គីឡូម៉ែត្រដែលខ័ណ្ឌចែកប្រទេសជិតខាងទំាងពីររយៈពេល ៣ថ្ងៃ។ លោកម៉ាឌុយរ៉ូបានលើកយកហេតុផលនៃការបិទព្រំដែនទៅពន្យល់ថា គឺដោយសារតែមានការវាយប្រហារលើកម្លំាងទាហានវ៉េណេស៊ុយអេឡាដែលកំពុងបំពេញបេសកកម្មប្រឆំាងនឹងការរត់ពន្ធនៅតាមបណ្តោយព្រំដែន។ ការវាយប្រហារកាលណោះត្រូវបានរដ្ឋាភិបាលវ៉េណេស៊ុយអេឡាទម្លាក់កំហុសដាក់លើទាហានកូឡុំប៊ី។
ទន្ទឹមគ្នានឹងថ្ងៃប្រកាសបិទព្រំដែន រដ្ឋាភិបាលទីក្រុងការ៉ាកាសក៏បានបណ្តេញប្រជាជនកូឡុំប៊ីប្រមាណជា ១ ៥០០នាក់ភ្លាមៗចេញពីទឹកដីវ៉េណស៊ុយអេឡាដែរ។ ប្រជាជនកូឡុំប៊ីទំាងនោះ មានភាគច្រើនបានរស់នៅក្នុងទឹកដីវ៉េណេស៊ុយអេឡាដោយគ្មានក្រដាសស្នាមត្រឹមត្រូវ។ ក្រៅពីអ្នកដែលរងការបណ្តេញចេញដោយបង្ខំ ក៏នៅមានប្រជាជនកូឡុំប៊ីជិត ២០ ០០០នាក់បានស្ម័គចិត្តចាកចេញពីប្រទេសវ៉េណេស៊ុយអេឡាទៅកាន់កូឡុំប៊ី ដោយពួកគេខ្លាចរងការបណ្តេញចេញដោយបង្ខំ។ តំាងពីពេលនោះមក ប្រទេសជិតខាងទំាងពីរក៏បានព្យាយាមជួបចរចាក្នុងគោលដៅផ្សះផ្សាគ្នាឡើងវិញ។
ប្រមុខការទូតនៃប្រទេសទំាងពីរបានជួបចរចាគ្នាជាលើកទី២ នៅថ្ងៃសៅរ៍ ទី១២ កញ្ញាក្នុងទីក្រុងគីតូ ប្រទេសអេក្វាទ័រ តែនៅទាន់ចុះសម្រុងគ្នាក្នុងការកំណត់ឲ្យមានជំនួបរវាងលោកប្រធានាធិបតីកូឡុំប៊ី ជាន់ ម៉ានុយអែល សង់តូស និងលោកប្រធានាធិបតីវ៉េណេស៊ុយអេឡានីកូឡា ម៉ាឌុយរ៉ូ។
សង្រ្គាមពាក្យសម្តីរវាងលោកជាន់ ម៉ានុយអែល សង់តូស និងលោកនីកូឡា ម៉ាឌុយរ៉ូ
តំាងពីថ្ងៃផ្ទុះវិបត្តិដំបូងមកដល់ពេលនេះ សង្រ្គាមពាក្យសម្តីបាននិងកំពុងកើតមានយ៉ាងខ្ទរខ្ទាររបស់បុរសរដ្ឋខ្លំាងទំាងពីររូប គឺលោកប្រធានាធិបតីកូឡុំប៊ី ជាន់ ម៉ានុយអែល សង់តូស និងលោកប្រធានាធិបតីវ៉េណេស៊ុយអេឡានីកូឡា ម៉ាឌុយរ៉ូ។ កាលពី ១០ថ្ងៃមុននេះ លោកម៉ាឌុយរ៉ូបានចោទលោកសង់តូជាសាធារណៈពីបទបានឃុបឃិតនៅក្នុងទង្វើប៉ុនប៉ងធ្វើឃាតសម្លាប់លោក។ ហើយកាលពី ១សប្តាហ៍កន្លងទៅទៀត លោកសង់តូក៏បានធ្វើការគំរាមលោកម៉ាឌុយរ៉ូវិញ ដោយគ្រោងប្តឹងលោកម៉ាឌុយរ៉ូទៅកាន់តុលាការព្រហ្មទ័ណ្ឌអន្តរជាតិពីបទឧក្រិដ្ឋកម្មប្រមាជមនុស្សជាតិ។
ខណៈនេះ លោកប្រធានាធិបតីកូឡុំប៊ីកំពុងស្វែងរកការគំាទ្រពីសហគមន៍អន្តរជាតិឲ្យជួយដោះស្រាយវិបត្តិព្រំដែនជាមួយប្រទេសវ៉េណេស៊ុយអេឡា ពិសេសសុំការគំាទ្រពីអង្គការនៃរដ្ឋអាមេរិកដែលមានសមាជិក ៣៥ប្រទេស។ លោកសង់តូសចង់ឲ្យមានការបើកជំនួបកំពូលមួយស្តីពីវិបត្តិកូឡុំប៊ី និងវ៉េណេស៊ុយអេឡា។ តែមានសមាជិកតែ ១៧ប្រទេសរបស់អង្គការនៃរដ្ឋអាមេរិកប៉ុណ្ណោះដែលបានគំាទ្រគំនិតផ្តួចផ្តើមរបស់លោកសង់តូស។ ចំណែកទីក្រុងការ៉ាកាសក៏បានប្រឆំាងនឹងគំនិតផ្តួចផ្តើមរបស់លោកសង់តូស ព្រមទំាងនិយាយលែបខាយដាក់ទីក្រុងបូហ្គោតាថា វ៉េណេស៊ុយអេឡាមិនត្រូវការទទួលមេរៀនពីអ្នកណាទេ។
ជម្រៅនៃបញ្ហាព្រំដែនរវាងកូឡុំប៊ី និងវ៉េណេស៊ុយអេឡា
រឿងបញ្ហាព្រំដែនរវាងកូឡុំប៊ី និងវ៉េណេស៊ុយអេឡាជារឿងចាស់ ច្រំដែល និងស្មុគស្មាញ។ វិបត្តិមួយនេះបានកើតមានតំាងពីជំនាន់ប្រធានាធិបតីមុនៗម្ល៉េះ។ តាមពិតទៅ វិបត្តិព្រំដែនរវាងប្រទេសជិតខាងទំាងពីរមិនមែនដោយសារតែរឿងដណ្តើមដីគ្នា ឬមួយក៏មិនចុះសម្រុងគ្នាក្នុងការវាស់វែង បោះបង្គោលព្រំដែនរវាងគ្នាទេ តែដោយសាររឿងអាណាធិបតេយ្យ និងអសន្តិសុខដែលកើតចេញពីការរត់ពន្ធ មានទំាងការជួញដូរមនុស្ស អាវុធ និងទំនិញគ្រប់ប្រភេទ។ ទីក្រុងការ៉ាកាស និងទីក្រុងបូហ្គោតាតែងតែចោទគ្នាទៅវិញ ទៅមកពីបទមិនបានចាត់វិធានការទប់ស្កាត់។
មួយវិញទៀត កូឡុំប៊ីក៏ធ្លាប់បានចង្អុលមុខវ៉េណេស៊ុយអេឡាពីបទបានអនុញ្ញាតឲ្យពួកឧទ្ទាមហ្វាកជ្រកកោន ពួនសំងំក្នុងទឹកដីរបស់ខ្លួន។ គួររម្លឹកជូនថា ជិតកន្លះសតវត្សដែលដែលកូឡំប៊ីបានឆ្លងកាត់ជម្លោះប្រដាប់អាវុធជាមួយនឹងពួកឧទ្ទាមហ្វាក មុននឹងរកឃើញកិច្ចព្រមព្រៀងសន្តិភាពដែលនៅផុយស្រួយនាខែកក្កដាកន្លងទៅ។ តែវ៉េណេស៊ុយអេឡាបានបញ្ជាក់ថា ខ្លួនជាអ្នកដែលបានទទួលរងថ្មបាក់ធ្ងន់ជាងគេដោយសារជម្លោះប្រដាប់អាវុធផ្ទៃក្នុងនៅកូឡុំប៊ី។
លំហូរជនភៀសខ្លួន ការជួរដូរអាវុធ និងការរត់ពន្ធទំនិញគ្រប់សព្វសារពើបានកើតមានជាប្រចំាថ្ងៃនៅតាមបណ្តោយព្រំដែនរវាងប្រទេសទំាងពីរ នេះជាការថ្លែងរបស់លោកស្រីប្រមុខការទូតវ៉េណេស៊ុយអេឡាដែលស៊ី រ៉ូឌ្រីហ្គេនៅក្នុងជំនួបជាមួយលោកអគ្គលេខាធិការអង្គការសហប្រជាជាតិបាន គីមូនក្នុងទីក្រុងញូយ៉កកាលពីថ្ងៃសុក្រ ទី១១ កញ្ញា។ សម្រាប់លោកស្រីរ៉ូឌ្រីហ្គេ ការដែលវ៉េណេស៊ុយអេឡាបានបិទព្រំដែនពេលនេះ គឺជាវិធានការត្រឹមត្រូវ។
កូឡុំប៊ីបដិសេធមិនទទួលខុសត្រូវតែម្នាក់ឯង
កូឡុំប៊ីមិនបានបដិសេធលើការលើកឡើងរបស់វ៉េណេស៊ុយអេឡាចំពោះរឿងរ៉ាវដែលកំពុងកើតមាននៅតាមបណ្តោយព្រំដែនសព្វថ្ងៃ ដូចជារឿងជនភៀសខ្លួន ការជួរដូរអាវុធ និងការរត់ពន្ធទំនិញគ្រប់សព្វសារពើទេ។ តែបានបដិសេធថា ខ្លួនមិនមែនជាអ្នកទទួលខុសត្រូវតែម្នាក់ឯងទេ មានន័យថា វ៉េណេស៊ុយអេឡាក៏មានចំណែកទទួលខុសត្រូវដែរ។ ដូច្នេះឃើញថា រឿងរ៉ាវរវាងប្រទេសជិតខាងទំាងពីរនឹងត្រូវបន្តវែងឆ្ងាយដែលមិនអាចមានដំណោះស្រាយឆាប់ៗទេ។
ម្យ៉ាងទៀត រឿងនេះក៏ប្រហែលមិនមែនជាប្រធានបទអាទិភាពរបស់លោកប្រធានាធិបតីកូឡុំប៊ីសង់តូស និងលោកប្រធានាធិបតីវ៉េណេស៊ុយអេឡាម៉ាឌុយរ៉ូផងក៏មិនដឹង ព្រោះថា រដ្ឋបុរសទំាងពីររូបកំពុងខ្វាយខ្វល់យ៉ាងខ្លំាងចំពោះបញ្ហានយោបាយ និងសេដ្ឋកិច្ចនៅក្នុងប្រទេសរៀងៗខ្លួន។ នៅថ្ងៃទី២៥ តុលាខាង កូឡុំប៊ីត្រូវរៀបចំបោះឆ្នោតឃុំ សង្កាត់ រីឯនៅទី៦ ធ្នូខាងមុខ វ៉េណេស៊ុយអេឡាត្រូវរៀបចំបោះឆ្នោតសភា។ ដូច្នេះចង់ ឬមិនចង់ លោកសង់តូស និងលោកម៉ាឌុយរ៉ូអាចនឹងឆ្លៀតយកវិបត្តិរវាងគ្នាដើម្បីទាញចំណេញប្រជាប្រិយភាព និងនយោបាយផ្ទៃក្នុងរៀងៗខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ