កិច្ចព្រមព្រៀងស្តីពីការដោះដូរសេរី អន្តរ ប៉ាស៊ីហ្វិកបានចេញជារូបរាង
នៅទីបំផុតទៅ ប្រទេសចំនួន១២ នៅថ្ងៃ ចន្ទទី ៥តុលា បានចុះសម្រុងគ្នា ចរចា រកឃើញ កិច្ចព្រមព្រៀងស្តីពីការដោះដូរសេរី អន្តរប៉ាស៊ីហ្វិក។ លោកប្រធានាធិបតីអាមេរិក បារ៉ាក់ អូបាម៉ា ដែលជាអ្នកគាំទ្រ ចង់ឲ្យឃើញ កិច្ចព្រមព្រៀង លេចរូបរាង នៅក្នុងអាណត្តិរបស់ខ្លួន បានថ្លែង អបអរសាទរក្រុមការងារ មកពី១២ប្រទេស ដែលបានប្រជុំគ្នា ៥ថ្ងៃមកហើយ ក្នុងទីក្រុងអាត្លង់តា ប៉ែកខាងត្បូងសហរដ្ឋអាមេរិក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
អាមេរិក ជប៉ុន និងប្រទេសចំនួន ១០ ទៀត (អូស្ត្រាលី ព្រុយណេ កាណាដា ឈីលី ម៉ាឡេស៊ី ម៉ិចស៊ិក ពេរូ សិង្ហបុរី នូវែលហ្សេឡង់ និង វៀតណាម) ដែលតំណាង ឲ្យ ៤០ភាគរយ នៃសេដ្ឋកិច្ចពិភពលោក បានរកឃើញ កិច្ចព្រមព្រៀង ស្តីពីការដោះដូរសេរី អន្តរប៉ាស៊ីហ្វិក នៅទីក្រុងអាត្លង់តា ក្នុងរដ្ឋចរជា សហរដ្ឋអាមេរិក។
ក្រោយពីចរចាយ៉ាងស្វិតស្វាញ អស់រយៈពេល ៧ឆ្នាំ កិច្ចព្រមព្រៀង ស្តីពីការដោះដូរសេរី អន្តរប៉ាស៊ីហ្វិក បានលេចចេញជារូបរាង។ លោកនាយករដ្ឋមន្រ្តីជប៉ុន ស៊ីនហ្សូ អាបេបានបញ្ជាក់ដំណឹងនេះ កាលពីថ្ងៃចន្ទ ក្នុងពេលដែលលោកប្រធានាធិបតីអាមេរិក បារ៉ាក់ អូបាម៉ាវិញ បានសំដែងស្វាគមកិច្ចព្រមព្រៀង អន្តរប៉ាស៊ីហ្វិក ដែលតាមលោកនឹងផ្តល់ចំណេញច្រើន ដល់ជនជាតិអាមេរិកាំង។ តាមលោកប្រធានាធិបតី អាមេរិក កិច្ចព្រមព្រៀងរកឃើញក្នុងទីក្រុងអាត្លង់តា បានជួយកាត់បន្ថយ របាំងពន្ធគយ ដល់១៨០០ ដែលប្រទេសដទៃទៀត ដាក់លើទំនិញនាំចូល ពីអាមេរិក។ “នៅពេលដែល ៩៥ភាគរយ នៃអតិថិជនរបស់ទំនិញអាមេរិក មាននៅក្រៅដែនដីអាមេរិក ប្រជាជនអាមេរិកមិនអាចទុកឲ្យចិន ជាអ្នកសរសេរ ក្តោបក្តាប់ សេដ្ឋកិច្ច សកលនោះទេ។ អាមេរិកត្រូវតែ បង្កើតច្បាប់ថ្មី ដើម្បីបង្កើតទីផ្សារថ្មី សម្រាប់ផលិតផលអាមេរិក ដោយមិនភ្លេចចូលរួមថែរក្សាបរិស្ថាន និងការពារល័ក្ខខ័ណ្ឌការងាររបស់ពលករ អាមេរិក។ កិច្ចព្រមព្រៀង នឹងពង្រឹងទំនាក់ទំនង យុទ្ធសាស្រ្តជាមួយ ប្រទេសដៃគូ និងសម្ព័ន្ធមិត្តរបស់អាមេរិក នៅក្នុងតំបន់”។ នេះជាការអះអាងរបស់លោកប្រធានាធិបតីអាមេរិក។
តាំងពីឆ្នាំ ២០០៨ ការចរចា ដើម្បីបង្កើតកិច្ចព្រមព្រៀង អន្តរប៉ាស៊ីហ្វិក ធ្លាប់ជួបបរាជ័យ ជាច្រើនដង ដោយសារតែការនិយាយមិនត្រូវគ្នា រវាងប្រទេសដែលត្រូវចូលរួមជាសមាជិក ជាពិសេស ជប៉ុន និងអាមេរិក។ ចំណុចសំខាន់ ដែលភាគីនៅតឹងសសៃក ធ្លាប់និយាយមិនត្រូវគ្នា មាននិយាយតាំងពី រយៈពេល នៃការការពារកម្មសិទ្ធិបញ្ញា របស់ថ្នាំពេទ្យ ផលិតផលទឹកដោះគោ ដែលត្រូវនាំចេញពី អូស្តា្រលី ទៅកាណាដា ឬគ្រឿងដំឡើងរថយន្ត ដែលជប៉ុនត្រូវនាំចូលទៅអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ