លោកស្រីហ៊ីឡារីគ្លីនតុនប្រកាសឈរឈ្មោះជាបេក្ខនារីប្រធានាធិបតីអាមេរិក
លោកស្រីហ៊ីឡារី គ្លីនតុន បានប្រកាសជាផ្លូវការថា លោកស្រីនឹងឈរឈ្មោះជាបេក្ខនារី សម្រាប់ការបោះឆ្នោតប្រធានាធិបតីអាមេរិក ដែលនឹងត្រូវរៀបចំធ្វើ នៅឆ្នាំ២០១៦ខាងមុខ។ ក្រោយពីត្រូវទទួលបរាជ័យ កាលពីឆ្នាំ២០០៨ អតីតជំទាវទី១អាមេរិក គឺជាបេក្ខនារីដែលមានប្រជាប្រិយភាពនាំមុខគេ នៅក្នុងចំណោមគណបក្សប្រជាធិបតេយ្យ នៅក្នុងពេលបច្ចុប្បន្ននេះ។
ចុះផ្សាយនៅថ្ងៃ៖
ស្តាប់ - ០៥:២៦
នៅក្នុងវីដេអូខ្លី ចេញផ្សាយតាមប្រព័ន្ធអ៊ីនធ័រនែត កាលពីថ្ងៃអាទិត្យ លោកស្រី ហ៊ីឡារី គ្លីនតុន បានលើកឡើងថា “ខ្ញុំនឹងឈរឈ្មោះជាប្រធានាធិបតី”ដើម្បីការពារផលប្រយោជន៍របស់ពលរដ្ឋសាមញ្ញអាមេរិក។
ដើម្បីឈានទៅឈរឈ្មោះក្នុងការបោះឆ្នោតប្រធានាធិបតី ដែលនឹងត្រូវរៀបចំធ្វើ នៅខែវិច្ឆិកា ឆ្នាំ២០១៦ លោកស្រីគ្លីនតុន ត្រូវឆ្លងកាត់ការបោះឆ្នោត ប្រកួតប្រជែងជាមួយបេក្ខជនផ្សេងទៀតមកពីគណបក្សប្រជាធិបតេយ្យដូចគ្នា។ នៅក្នុងការបោះឆ្នោតក្នុងបក្សនេះហើយ ដែលលោកស្រីធ្លាប់ទទួលបរាជ័យ កាលពីឆ្នាំ២០០៨ ដោយចាញ់លោកអូបាម៉ា។ នៅក្នុងការបោះឆ្នោត ឆ្នាំក្រោយនេះ លោកអូបាម៉ា ដែលបានកាន់តំណែងជាប្រធានាធិបតីរយៈពេល ២អាណត្តិមកហើយនោះ មិនអាចឈរឈ្មោះសាជាថ្មីទៀតបានទេ ហើយនៅក្នុងពេលបច្ចុប្បន្ននេះ លោកស្រីគ្លីនតុន គឺជាឥស្សរជនដែលមានប្រជាប្រិយភាពខ្ពស់ជាងគេ នៅក្នុងចំណោមគណបក្សប្រជាធិបតេយ្យ។
នៅក្នុងការស្ទាបស្ទង់មតិ កាលពីខែមីនាកន្លងទៅនេះ អ្នកគាំទ្រគណបក្សប្រជាធិបតេយ្យរហូតដល់ទៅ ៦០% ចង់ឲ្យលោកស្រីគ្លីនតុន ឈរឈ្មោះតំណាងបក្ស នៅក្នុងការបោះឆ្នោតប្រធានាធិបតី។ លោកអូបាម៉ា ដែលជាអតីតគូប្រជែងកាលពីឆ្នាំ២០០៨ ក៏បានបញ្ចេញសំឡេងគាំទ្រលោកស្រីគ្លីនតុនដែរ នៅក្នុងការបោះឆ្នោតលើកនេះ ដោយលោកបានថ្លែង កាលពីថ្ងៃសៅរ៍ថា លោកស្រីគ្លីនតុននឹងជាបេក្ខនារីដ៏ល្អបំផុត សម្រាប់គណបក្សប្រជាធិបតេយ្យ។
លោកស្រីគ្លីនតុន គឺជាបេក្ខនារី ដែលមានប្រជាប្រិយភាពនាំមុខគេ នៅក្នុងការបោះឆ្នោតក្នុងបក្ស ក៏ប៉ុន្តែ ក្នុងការបោះឆ្នោតប្រធានាធិបតី ប្រជែងជាមួយបេក្ខជនមកពីគណបក្សសាធារណរដ្ឋ គឺជារឿងមួយផ្សេង ហើយលោកស្រីគ្លីនតុន នឹងត្រូវប្រឈមមុខនឹងបញ្ហាស្មុគស្មាញច្រើន។
បើនិយាយពីចំណុចវិជ្ជមាន លោកស្រីគ្លីនតុន អាចមានប្រៀបត្រង់បទពិសោធន៍។ លោកស្រីធ្លាប់ចំណាយពេល ៨ឆ្នាំ នៅសេតវិមាន ក្នុងឋានៈជាជំទាវទីមួយ ក្នុងពេលដែលលោកប៊ីល គ្លីនតុន ធ្វើជាប្រធានាធិបតី (១៩៩៣-២០០១)។ បន្ទាប់មកទៀត លោកស្រីបានជាប់ឆ្នោតជាសមាជិកព្រឹទ្ធសភាតំណាងរដ្ឋញូវយ៉ក រយៈពេលពីរអាណត្តិ (២០០១-២០០៩) ហើយពីឆ្នាំ២០០៩ ដល់ឆ្នាំ២០១៣ លោកស្រីកាន់តំណែងជារដ្ឋមន្រ្តីការបរទេស ក្នុងរដ្ឋាភិបាលរបស់លោកអូបាម៉ា។
ក៏ប៉ុន្តែ ការកាន់តំណែងនយោបាយជាច្រើនឆ្នាំជាប់ៗគ្នាមកនេះ ក្រៅពីអាចទទួលបទពិសោធន៍ច្រើន និងមានគេគោរពច្រើន លោកស្រីគ្លីនតុន ក៏ជាប់រឿងអាស្រូវជាច្រើនផងដែរ។ រឿងអាស្រូវធំៗអស់ទាំងនេះ មានទាំងរឿងអាស្រូវដែលជាប់ពាក់ព័ន្ធនឹងលោកប៊ីល គ្លីនតុន កាលពីលោកកាន់តំណែងជាប្រធានាធិបតី និងទាំងរឿងអាស្រូវពាក់ព័ន្ធនឹងលោកស្រីហ៊ីឡារី គ្លីនតុន ខ្លួនឯងផ្ទាល់ ជាពិសេស បញ្ហាធំៗពីរ ដែលកើតឡើង នៅក្នុងពេលដែលលោកស្រីកាន់តំណែងជារដ្ឋមន្រ្តីការបរទេស។ បញ្ហាទីមួយ ហេតុការណ៍វាយប្រហារលើស្ថានទូតអាមេរិក នៅលីប៊ី កាលពីឆ្នាំ២០១២ ដែលបណ្តាលឲ្យឯកអគ្គរដ្ឋទូតអាមេរិកស្លាប់ ហើយដែលគណបក្សសាធារណរដ្ឋទម្លាក់ការទទួលខុសត្រូវទៅលើលោកស្រីគ្លីនតុនថាមានការធ្វេសប្រហែស ក្នុងការចាត់វិធានការរក្សាសន្តិសុខស្ថានទូត។ បញ្ហាចម្រូងចម្រាសធំទីពីរ គឺរឿងលោកស្រីគ្លីនតុនប្រើអ៊ីមែលផ្ទាល់ខ្លួន នៅក្នុងការបំពេញការងារជារដ្ឋមន្រ្តីការបរទេស ដែលជាការរំលោភទៅលើវិធានផ្ទៃក្នុងទាក់ទងនឹងការរក្សាការណ៍សម្ងាត់រដ្ឋ។ ទាំងអស់នេះ សុទ្ធសឹងតែជារឿងអាស្រូវ ដែលអាចជាចំណុចខ្សោយ ឲ្យគូប្រជែងលើកយកមកវាយប្រហារលោកស្រី នៅក្នុងយុទ្ធនាការឃោសនាបោះឆ្នោត។
បញ្ហាចោទដ៏ធំមួយទៀត សម្រាប់លោកស្រីគ្លីនតុន គឺការឈរឈ្មោះតំណាងគណបក្សប្រជាធិបតេយ្យ ដែលជាគណបក្សកាន់អំណាច ២អាណត្តិមកហើយ។ វាជារឿងធម្មតា នៅប្រទេសប្រជាធិបតេយ្យ គណបក្សកាន់អំណាចច្រើនតែទទួលការរិះគន់ច្រើនជាងគណបក្សប្រឆាំង។ ក្រោយពីកាន់អំណាច ៨ឆ្នាំ គណបក្សប្រជាធិបតេយ្យកំពុងតែត្រូវទទួលការរិះគន់ច្រើន ហើយមានប្រជាប្រិយភាពធ្លាក់ចុះ ក្នុងពេលដែលគណបក្សសាធារណរដ្ឋដែលជាបក្សប្រឆាំង កំពុងតែមានប្រជាប្រិយភាពកើនឡើង រហូតដណ្តើមកាន់កាប់សំឡេងភាគច្រើនទាំងនៅ រដ្ឋសភា និងព្រឹទ្ធសភា។
ដូច្នេះ សម្រាប់លោកស្រីហ៊ីឡារី គ្លីនតុន ដំណើរឆ្ពោះទៅសេតវិមាន ក្នុងឋានៈជាប្រធានាធិបតីស្រីទីមួយ ក្នុងប្រវត្តិសាស្រ្តអាមេរិក មិនមែនជារឿងងាយស្រួលនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ