លោកអូបាម៉ាសុំទោសអង្គការ MSF រឿងវាយប្រហារទៅលើមន្ទីរពេទ្យនៅអាហ្វហ្កានីស្ថាន
លោកអូបាម៉ាបានទូរស័ព្ទទៅប្រធានអង្គការគ្រូពេទ្យគ្មានព្រំដែន កាលពីថ្ងៃពុធម្សិលមិញ ដើម្បីធ្វើការសុំទោសចំពោះការណ៍ដែលកងទ័ពអាមេរិកធ្វើការវាយប្រហារដោយច្រឡំ ទៅលើមន្ទីរពេទ្យ នៅអាហ្វហ្កានីស្ថាន។ ការវាយប្រហារ កាលពីថ្ងៃសៅរ៍ ដែលបានបណ្តាលឲ្យមនុស្សយ៉ាងតិច ២២នាក់ ត្រូវបាត់បង់ជីវិត។ អង្គការគ្រូពេទ្យគ្មានព្រំដែនវិញបានទាមទារឲ្យបង្កើតគណៈកម្មការអន្តរជាតិឯករាជ្យមួយ ដើម្បីធ្វើការស៊ើបអង្កេតលើករណីនេះ។
ចុះផ្សាយនៅថ្ងៃ៖
ស្តាប់ - ០១:៥៦
លោកអូបាម៉ាបានទូរស័ព្ទពីការិយាល័យរបស់លោកនៅសេតវិមាន ទៅកាន់លោកស្រី Joanne Liu ប្រធានអង្គការគ្រូពេទ្យគ្មានព្រំដែន ដើម្បីធ្វើការសុំទោស និងចូលរួមរំលែកទុក្ខចំពោះការស្លាប់បុគ្គលិករបស់អង្គការគ្រូពេទ្យគ្មានព្រំដែន នៅក្នុងការវាយប្រហារទៅលើមន្ទីរពេទ្យនៅអាហ្វហ្កានីស្ថាន កាលពីថ្ងៃសៅរ៍។ នេះបើយោងតាមការអះអាងរបស់លោក Josh Earnest មន្រ្តីអ្នកនាំពាក្យសេតវិមាន ដែលបានបញ្ជាក់បន្ថែមថា លោកអូបាម៉ាក៏បានទូរស័ព្ទទៅលោកប្រធានាធិបតីអាហ្វហ្កានីស្ថានផងដែរ ដើម្បីសម្តែងការសោកស្តាយចំពោះហេតុការណ៍នេះ។
ក៏ប៉ុន្តែ លោក Josh Earnest បានព្យាយាមគេចវេសមិនព្រមឆ្លើយនឹងសំណួរទាក់ទងនឹងការទាមទារឲ្យបង្កើតគណៈកម្មការឯករាជ្យ ដើម្បីស៊ើបអង្កេតលើការវាយប្រហារនេះ ដោយគ្រាន់តែបានធានាថា ការស៊ើបអង្កេតដែលកងទ័ពអាមេរិកកំពុងតែបើកធ្វើនៅពេលនេះ នឹងត្រូវធ្វើឡើង “យ៉ាងពេញលេញ មិនលម្អៀង និងប្រកបដោយតម្លាភាព”។
គួរបញ្ជាក់ថា គិតមកទល់នឹងពេលនេះ មានការស៊ើបអង្កេត៣កំពុងតែប្រព្រឹត្តទៅ ចំពោះការវាយប្រហារទៅលើមន្ទីរពេទ្យរបស់អង្គការគ្រូពេទ្យគ្មានព្រំដែននៅអាហ្វហ្កានីស្ថានកាលពីយប់ថ្ងៃសៅរ៍ គឺការស៊ើបអង្កេតរបស់អាមេរិក ការស៊ើបអង្កេតរបស់អាហ្វហ្កានីស្ថាន និងការស៊ើបអង្កេតរបស់អង្គការអូតង់។ ក៏ប៉ុន្តែ អង្គការគ្រូពេទ្យគ្មានព្រំដែនវិញបានទាមទារដោយទទូចឲ្យមានការស៊ើបអង្កេតជាលក្ខណៈអន្តរជាតិ ក្នុងក្របខ័ណ្ឌអនុសញ្ញាក្រុងហ្សឺណែវ ស្តីពីឧក្រិដ្ឋកម្មសង្រ្គាម។
ក្រោយពីបានទទួលទូរស័ព្ទរបស់លោកអូបាម៉ា អង្គការគ្រូពេទ្យគ្មានព្រំដែនបានចេញសេចក្តីថ្លែងការណ៍មួយបញ្ជាក់ថា ពួកគេពិតជាបានទទួលការសុំទោសពីសំណាក់លោកប្រធានាធិបតីអាមេរិកមែន ក៏ប៉ុន្តែ ពួកគេនៅតែទាមទារឲ្យមានការស៊ើបអង្កេតអន្តរជាតិ ដោយលើកហេតុផលថា ពួកគេមិនទុកចិត្តលើការស៊ើបអង្កេតផ្ទៃក្នុងរបស់ប្រទេស ដែលពាក់ព័ន្ធដោយផ្ទាល់នឹងការវាយប្រហារនេះទេ។
គួរបញ្ជាក់ផងដែរថា នៅថ្ងៃព្រហស្បតិ៍នេះ មេបញ្ជាការកងទ័ពអាមេរិកប្រចាំប្រទេសអាហ្វហ្កានីស្ថានត្រូវចូលខ្លួនទៅបំភ្លឺនៅចំពោះមុខគណៈកម្មការសភាអាមេរិក ជុំវិញហេតុការណ៍នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ