អាហ្វហ្កានីស្ថាន៖មេកើយតាលីបង់ម៉ូឡា អូម៉ាបានស្លាប់តំាងពីឆ្នំា ២០១៣
នៅយប់ថ្ងៃពុធ ទី២៩ កក្កដា រដ្ឋអំណាចនៃប្រទេសអាហ្វហ្កានីស្ថានបានប្រកាសឲ្យដឹងពីការស្លាប់មេកើយតាលីបង់ឈ្មោះម៉ូឡា អូម៉ា (Mollah Omar)។ យោងតាមទីក្រុងកាប៊ូល ជនម៉ូឡា អូម៉ាបានស្លាប់តំាងពីខែមេសា ឆ្នំា ២០១៣ នៅក្នុងទឹកដីប៉ាគីស្ថានដោយជម្ងឺ។ សហរដ្ឋអាមេរិកនៅមិនទាន់បានបញ្ជាក់ព័ត៌មាននេះជាផ្លូវការនៅឡើយទេ តែគ្រាន់អះអាងថា ជាព័ត៌មានអាចជឿទុកចិត្តបាន។ គួររម្លឹកជូនថា តំាងពីក្រោយការដួលរលំរបបតាលីបង់នៅអាហ្វហ្កានីស្ថានក្នុងឆ្នំា ២០០១ មក ជនម៉ូឡា អូម៉ាជាមនុស្សដែលអាមេរិកតាមរកចាប់ខ្លួនជាងគេ និងយល់ព្រមឲ្យលុយចំនួន ១០លានដុល្លារចំពោះនរណាដែលអាចចាប់ម៉ូឡា អូម៉ាបានទំាងរស់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:៤៣
មេកើយតាលីបង់ម៉ូឡា អូម៉ាបានលេចមុខចុងក្រោយកាលពី ១៤ឆ្នំាមុន ពោលក្នុងឆ្នំា ២០០១។ ឆ្នំា ២០០១ ជាឆ្នំាដែលអាមេរិកបានផ្តើមធ្វើសង្រ្គាមនៅក្នុងប្រទេសអាហ្វហ្កានីស្ថានដើម្បីផ្តួលរំលំរបបតាលីបង់ នៅក្រោយមហាភេរវកម្ម ១១ កញ្ញា ឆ្នំា ២០០១ នៅសហរដ្ឋអាមេរិក។ នៅក្នុងឆ្នំា ២០០១ ដដែល ពោលក្រោយការដួលរលំរបបតាលីបង់ ជនម៉ូឡា អូម៉ាបានរត់ភៀសខ្លួននៅជ្រកកោណក្នុងប្រទេសប៉ាគីស្ថានជិតខាង។ តំាងពីពេលនោះមក មេកើយតាលីបង់រូបនេះបានក្លាយជាមនុស្សដែលអាមេរិកតាមរកចាប់ខ្លួនជាងគេ និងសុទ្ធចិត្តបង់លុយចំនួន ១០លានដុល្លារឲ្យអ្នកណាដែលអាចចាប់ម៉ូឡា អូម៉ាបានទំាងរស់។ តែនៅក្នុងរយៈពេល ១៤ឆ្នំាចុងក្រោយនេះ ការស្លាប់របស់រូបម៉ូឡា អូម៉ាត្រូវបានរដ្ឋអំណាចអាហ្វហ្កានីស្ថានប្រកាសឲ្យដឹងជាច្រើនលើក ច្រើនសារ។
កាលពី ២ឆ្នំាមុន ពោលក្នុងខែឧសភា ឆ្នំា ២០១១ ព័ត៌មាននៃការស្លាប់មេកើយតាលីបង់ម៉ូឡា អូម៉ាធ្លាប់ត្រូវបានក្រសួងស៊ើបការសម្ងាត់អាហ្វហ្កានីស្ថានប្រកាសឲ្យដឹង និងថែមទំាងបានបញ្ជាក់ជាផ្លូវការពីរដ្ឋាភិបាលអាហ្វហ្កានីស្ថានទៀតផង។ តែគ្មានប្រភពណាផ្សេងអាចបញ្ជាក់ជាផ្លូវការបានឡើយ ហើយចលនាតាលីបង់ក៏បានច្រានចោលព័ត៌មាននេះ ព្រមទំាងបញ្ជាក់ពីវត្តមានជាប់ជាប្រចំារបស់ម៉ូឡា អូម៉ានៅក្នុងសកម្មភាពរបស់ចលនាតាលីបង់។ នៅក្នុងខែមេសា ឆ្នំា ២០១៥ កន្លងទៅថ្មីៗនេះ ចលនាតាលីបង់បានផ្សព្វផ្សាយជីវប្រវត្តិរបស់ម៉ូឡា អូម៉ាដោយអះអាងថា មេកើយរបស់ខ្លួនកំពុងបន្តចូលរួមយ៉ាងសកម្មនៅក្នុងសកម្មភាពជីហាត។
ឥឡូវនេះ ព័ត៌មាននៃការស្លាប់រូបម៉ូឡា អូម៉ាត្រូវបានប្រកាសឲ្យដឹងជាថ្មី ដោយរដ្ឋអំណាចអាហ្វហ្កានីស្ថានបញ្ជាក់ថា មេកើយតាលីបង់រូបនេះបានបាត់បង់ជីវិតកាលពីខែមេសា ឆ្នំា ២០១៣ ដោយជម្ងឺនៅក្នុងទឹកដីប៉ាគីស្ថាន ហើយសពម៉ូឡា អូម៉ាក៏ប្រហែលជាបានបញ្ជូនទៅអាហ្វហ្កានីស្ថានដើម្បីកប់នៅស្រុកកំណើតរបស់គេដែរ។
សហរដ្ឋអាមេរិកមិនទាន់បញ្ជាក់ជាផ្លូវការ តែថាជាព័ត៌មានគួរឲ្យជឿទុកចិត្ត
ការដែលអាមេរិកនៅមិនទាន់ទុកចិត្តព័ត៌មាននេះទំាងស្រុង គឺមកពីអាមេរិកខ្លួនឯងមិនមែនជាអ្នកសម្លាប់ម៉ូឡា អូម៉ាផ្ទាល់ដៃ។ សូមជម្រាបជូនថា នៅក្នុងការស្លាប់មេភេរវជន ឬមួយក៏អ្នកទទួលខុសត្រូវរបស់ចលនាជ្រុលនិយមណាមួយនៅក្នុងប្រទេសអាហ្វហ្កានីស្ថាន ឬមួយក៏ប៉ាគីស្ថាន គឺច្រើនជាស្នាដៃរបស់ទាហានអាមេរិកនៅក្នុងប្រតិបត្តិការទម្លាក់គ្រាប់បែកពីយន្តហោះគ្មានមនុស្សបើកបរទៅលើជំរំរបស់ពួកឧទ្ទាមតាលីបង់។ តែព័ត៌មានស្លាប់ម៉ូឡា អូម៉ាពេលនេះត្រូវបានប្រកាសដោយរដ្ឋអំណាចអាហ្វហ្កានីស្ថានដែលថា មេកើយតាលីបង់បានស្លាប់ដោយជម្ងឺនៅក្នុងទឹកដីប៉ាគីស្ថាន។
សេតវិមានបានត្រឹមតែចាត់ទុកព័ត៌មាននេះថាអាចជឿទុកចិត្តបាន ហើយអ្នកនំាពាក្យរបស់លោកប្រធានាធិបតីអាមេរិកអូបាម៉ាក៏មិនបានផ្តល់អ្វីលំអិតជុំវិញលទ្ធផលនៃការផ្ទៀងផ្ទាត់ព័ត៌មាននេះដែរ ពិសេសមិនបានទម្លាយឲ្យដឹងថា តើអាមេរិកទើបបានទទួលដំណឹងពីការស្លាប់ម៉ូឡា អូម៉ាពេលនេះ ឬមួយក៏បានដឹងពីពេលណាមក។ អ្វីដែលគេបានដឹង រដ្ឋបាលអាមេរិកកំពុងធ្វើការផ្ទៀងផ្ទាត់ដើម្បីស្វែងរកការពិត មុននឹងចេញសេចក្តីថ្លែងការណ៍ផ្លូវការអ្វីមួយ។
រីឯនៅខាងក្រុមតាលីបង់ឯណោះវិញ ចលនាឧទ្ទាមមួយនេះក៏នៅមិនទាន់បានទទួលស្គាល់ ឬក៏ទាត់ចោលទំាងស្រុងនូវព័ត៌មានជុំវិញមរណៈភាពមេកើយរបស់ខ្លួនដែរ។ នៅក្នុងសេចក្តីជូនដំណឹងមួយរបស់ខ្លួនចេញផ្សាយនៅព្រលឹមស្រាងៗព្រឹកនេះ ចលនាតាលីបង់មិនបានសរសេរអ្វីមួយម៉ាត់ទាក់ទងនឹងព័ត៌មានស្លាប់ម៉ូឡា អូម៉ាទេ តែបែរជានិយាយពីរឿងកិច្ចចរចាសន្តិភាពជាមួយរដ្ឋាភិបាលអាហ្វហ្កានីស្ថានទៅវិញ ដោយបញ្ជាក់ថា ខ្លួននៅមិនទាន់បានទទួលដំណឹងអ្វីទាក់ទងនឹងគម្រោងកិច្ចចរចាសន្តិភាពជាមួយរបបក្រុងកាប៊ូលដែលត្រៀមរៀបចំនៅក្នុងប្រទេសប៉ាគីស្ថាន ឬមួយប្រទេសចិននោះទេ។
ដូច្នេះឃើញថា វិលចុះ វិលឡើង ដំណឹងមរណៈភាពម៉ូឡា អូម៉ានៅបន្តស្រពិចស្រពិល ដោយនៅទាន់មានអ្វីអាចយកជាផ្លូវការបានទេនៅពេលនេះ។
តើម៉ូឡា អូម៉ា ជានរណា?
ជាផ្លូវការ ម៉ូឡា អូម៉ាជាប្រមុខចលនាតាលីបង់តំាងពីឆ្នំា ១៩៩៦ ហើយតំាងពីចលនាមួយនេះបានឡើងកាន់អំណាចនៅអាហ្វហ្កានីស្ថានពីឆ្នំា ១៩៩៦ ដល់ឆ្នំា ២០០១ រូបម៉ូឡា អូម៉ាបានកាន់តំណែងជាប្រធានាធិបតីអាហ្វហ្កានីស្ថាន។ នៅក្រោយមហាភេរវកម្មថ្ងៃ ១១ កញ្ញា ឆ្នំា ២០០១ នៅសហរដ្ឋអាមេរិក រដ្ឋបាលអាមេរិកំាងក៏បានបើកការវាយប្រហារនៅក្នុងប្រទេសអាហ្វហ្កានីស្ថានដើម្បីផ្តួលរំលំរបបតាលីបង់ដឹកនំាដោយម៉ូឡា អូម៉ាដែលជាមនុស្សជំនិតនឹងអ៊ូសាម៉ា បិនឡាដិន មេភេរវនិយមអាល់កៃដា។
ក្នុងឆ្នំា ២០០១ ដដែល ពោលក្រោយការដួលរលំរបបតាលីបង់ ម៉ូឡា អូម៉ាក៏បានរត់ភៀសខ្លួនទៅជ្រកកោណក្នុងស្រុកកឺតាទឹកដីប៉ាគីស្ថានជាប់នឹងព្រំដែនអាហ្វហ្កានីស្ថាន។ តែព័ត៌មានមួយនេះត្រូវបានចលនាតាលីបង់ច្រានចោលជាច្រើនដងដោយអះអាងថា ម៉ូឡា អូម៉ាស្ថិតក្នុងទឹកដីអាហ្វហ្កានីស្ថានជានិច្ច ដោយមិនធ្លាប់ចាកចេញពីទឹកដីអាហ្វហ្កានីស្ថានម្តងណាទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ