អាមេរិក៖ទីក្រុងវ៉ាស៊ីនតោន និងរដ្ឋប៉ែកខាងកើតទទួលមហាព្យុះទឹកកកមិនធ្លាប់មាន
ចាប់ពីរសៀលថ្ងៃសុក្រ ទី២២ ដល់យប់ថ្ងៃសៅរ៍ ទី២៣ មករា មហាព្យុះទឹកកកបោកបង់យ៉ាងខ្លាំងសម្បើមនៅក្នុងទីក្រុងវ៉ាស៊ីនតោន និងរដ្ឋប៉ែកខាងកើត នេះជាការប្រកាសរបស់ទីភ្នាក់ងារឧតុនិយមអាមេរិកាំង។ កម្រាស់ទឹកកកសំឡីអាចនឹងមានកំពស់ដល់ទៅ ៦០សង់ទីម៉ែត្រ គួបផ្សំនឹងកម្លាំងខ្យល់ដែលមានល្បឿនជាង ៩០គីឡូម៉ែត្រក្នុងមួយម៉ោង។ ជាសរុប មហាព្យុះទឹកកកអាចនឹងប៉ះពាល់ដល់មនុស្សជាង ៥០លាននាក់។ មធ្យោបាយដឹកជញ្ជូនសាធារណៈ ដូចជារថយន្តក្រុង និងរថភ្លើងក្រោមដីត្រូវបានផ្អាកនាចុងសប្តាហ៍នេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០១
គឺជាមហាព្យុះទឹកកប្រវត្តិសាស្រ្តមួយដែលអាមេរិកមិនធ្លាប់ជួបប្រទះទេ ពិសេសនៅក្នុងទីក្រុងវ៉ាស៊ីនតោនជិត ១សតវត្សកន្លងទៅ។ តែបានប៉ះពាល់ខ្លាំងតែនៅក្នុងទីក្រុងវ៉ាស៊ីតោន និងតំបន់ជុំវិញ ព្រមទាំងនៅក្នុងរដ្ឋចំនួន ១៥ ស្ថិតប៉ែកខាងកើត។ នៅក្នុងទីក្រុងវ៉ាស៊ីតោនក៏ដូចជាបណ្តារដ្ឋដែលជាប់ពាក់ព័ន្ធនឹងមហាព្យុះទឹកកកសំឡីនេះ រដ្ឋអំណាចបានប្រកាសបិទសេវាសាធារណៈតាំងពីដើមរសៀលថ្ងៃសុក្រ ទី២២ មករា។ ក្រុងវ៉ាស៊ីតោនត្រូវបានគេមើលឃើញថា នឹងមានធ្លាក់ទឹកកកច្រើនជាងគេ ដោយនំាមកជាមួយនូវកម្លាំងខ្យល់បោកបក់ខ្លាំងក្នុងល្បឿនដល់ទៅ ៩០គីឡូម៉ែត្រក្នុងមួយម៉ោង។
ទីភ្នាក់ងារឧតុនិយមជាតិបានព្រមានទុកជាមុនពីគ្រោះថ្នាក់ដល់ជីវិតមនុស្ស និងការបំផ្លាញទ្រព្យសម្បតិ្តដែលអាចកើតចេញពីមហាព្យុះទឹកកក ហើយវិស័យដែលអាចប៉ះពាល់ខ្លាំងជាងគេ គឺការដឹកជញ្ជូនសាធារណៈ។ អ៊ីចឹងហើយបានជាស្ថាប័នគ្រប់គ្រងដឹកជញ្ជូនសាធារណៈក្នុងទីក្រុងវ៉ាស៊ីតោនបានប្រកាសផ្អាកដំណើរការរថយន្តក្រុង ព្រមទំាងបិទដំណើរការរថភ្លើងក្រោមដីពេញមួយចុងសប្តាហ៍នេះ។ គួរជម្រាបជូនថា រថភ្លើងក្រោមដីក្នុងក្រុងវ៉ាស៊ីនតោនមានមនុស្សធ្វើដំណើរច្រើនលំដាប់ទី២ បន្ទាប់ពីរថភ្លើងក្រោមដីនៅក្រុងញូយ៉ក ពោលមានមនុស្សធ្វើដំណើរក្នុងមួយថ្ងៃៗប្រមាណជា ៧០០ ០០០នាក់។
តាំងពីដាក់ឲ្យដំណើរការជាង ៤០ឆ្នាំកន្លងមក នេះជាលើកទី១ ដែលរថភ្លើងក្រោមដីក្នុងទីក្រុងវ៉ាស៊ីនតោនត្រូវបានគេផ្អាកដំណើរការយ៉ាងយូររបៀបនេះ។ ក្រៅពីការផ្អាកដំណើរការរថយន្តក្រុង និងរថភ្លើងក្រោមដី មហាព្យុះទឹកកកក៏បានបង្ខំឲ្យមានការកាត់បន្ថយ និងលប់ចោលជើងហោះនៅតាមអាកាសយានដ្ឋានដែរ។ គិតក្នុងថ្ងៃសុក្រ ទី២២ មករា មានលប់ជើងហោះហើរសរុបជិត ២ ៤០០ជើង និងអាចលប់ចោលជាង ៤ ៥០០ជើងនៅចុងសប្តាហ៍នេះ។
ក្តីបារម្ភមួយទៀតកើតចេញពីមហាព្យុះទឹកកក គឺការដាច់បណ្តាញខ្សែអគ្គសនីដែលធ្វើឲ្យប៉ះពាល់ដល់ពលរដ្ឋអាមេរិកំាំងរាប់ម៉ឺនគ្រួសារ ពិសេសចំពេលត្រជាក់ខ្លាំង។ នៅអាមេរិក បណ្តាញខ្សែភ្លើងភាគច្រើនមិនត្រូវបានកប់ក្រោមដីទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ