New York និង New Jersey ត្រូវវាយប្រហារដោយព្យុះថ្មីទៀត
នៅថ្ងៃពុធនេះ ទីក្រុង New York និងរដ្ឋ New Jersey បានទទួលរងព្យុះមួយថ្មីទៀតដែលបានធ្វើអោយប្រជាពលរដ្ឋក្នុងតំបន់ទាំងពីរ ដែលជាជនរងគ្រោះនៃព្យុះកំណាច Sandy កាលពីសប្តាហ៍មុន កំពុងព្រួយបារម្ភឡើងវិញ។ អាជ្ញាធរបានប្រកាសអោយប្រជាជនរើចេញ ដោយសារតែព្យុះថ្មីនេះនឹងអាចធ្វើអោយជន់លិចជាថ្មីទៀត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
ស្ថានភាពបានធូរស្រាលតែរយៈពេលនៃការបោះឆ្នោតប្រធានាធិបតីតែប៉ុណ្ណោះ។ នៅថ្ងៃពុធទីក្រុង ew York និងរដ្ឋ New Jersey បានរងការវាយប្រហារសាជាថ្មី ដោយខ្យល់ព្យុះមួយទៀត។ ជាព្យុះដែលបាននាំទាំងភ្លៀង និងព្រិលមកជាមួយផង។ ព្យុះនេះក៏នឹងជះឥទ្ធិពលដល់តំបន់ដែលនៅជុំវិញក្រុងទាំងពីរនេះផងដែរ។
ប្រជាពលរដ្ឋអាមេរិកជាច្រើនលាននាក់ដែលរស់នៅក្នុងភាពងងឹត ក្នុងស្ថានភាពរងាត្រជាក់ខ្លាំងដោយសារផ្ទះត្រូវបំផ្លាញអស់នោះ មិនទាន់បាត់ភ័យខ្លាចឥទ្ធិពលខ្យល់ព្យុះសង្ឃរាSandy កាលពីសប្តាហ៍មុនផង។
នៅរដ្ឋ New Jersey អាជ្ញាធរបានប្រកាសព្រមានអំពីវត្តមានខ្យល់ព្យុះថ្មីនេះ ដែលនឹងមានឥទ្ធិពលកាន់តែខ្លាំងនៅល្ងាច និងយប់ថ្ងៃពុធនេះ ហើយដែលអាចនាំអោយមានទឹកជំនន់ និងខ្យល់បក់ផ្តួលដើមឈើទៀតផង។ ដោយសារតែខ្យល់ព្យុះថ្មីនេះ ការកាត់ផ្តាច់ចរន្តអគ្គិសនីនឹងត្រូវពន្យារពេលបន្តទៀត នេះបើតាមការប្រកាសរបស់អាជ្ញាធរមូលដ្ឋាន។ នៅពេលនេះអាជ្ញាធរកំពុងសាងសង់ទំនប់បាវខ្សាច់ដាក់តាមមាត់ច្រាំង ដើម្បីការពារមិនមានការបោកបក់ដោយកំលាំងទឹករលក ហើយពលរដ្ឋមួយចំនួនត្រូវជម្លៀសទៅរកកន្លែងសុវត្ថិភាព។
នៅក្នុងទីក្រុងញូយ៉កវិញ ប៉ូលីសបានទៅដល់តំបន់ទំនាប ហើយស្រែកប្រកាសតាមមីក្រូប្រាប់អោយពលរដ្ឋចាកចេញពីគេហដ្ឋានពួកគេ។ រីឯការដ្ឋានសំណងត្រូវបានបញ្ជាអោយផ្អាក ទីចំណតរថយន្តត្រូវបានបិទដោយសារខ្លាចការបាក់រលំដើមឈើ ហើយអ្នកធ្វើដំណើរតាមរថយន្តក៏ត្រូវព្រមានអោយឈប់ធ្វើដំណើរក្រោយពីម៉ោង៥ល្ងាចផងដែរ។
បម្រាមទាំងនេះត្រូវបានចាត់វិធានការឡើង ក្រោយពីបទពិសោធន៍ខ្យល់កំណាច Sandy កាលពីសប្តាហ៍មុន ដែលបានបោកបក់កំទេចតំបន់ភាគខាងកើតនៃសហរដ្ឋអាមេរិក។ ជើងហោះហើរចំនួន១៣០០ដែលភ្ជាប់ទីក្រុងញូយ៉កក៏ត្រូវបានលុបចោលមកដល់ពេលនេះ។
ភ្នាក់ងារគ្រប់គ្រងការសង្គ្រោះបន្ទាន់របស់រដ្ឋាភិបាលអាមេរិកបានសន្និដ្ឋានថា ពលរដ្ឋប្រមាណជិត៣សែននាក់ នៅក្នុងទីក្រុង New York, New Jersey និងរដ្ឋ Connecticut ត្រូវការជម្រកសុវត្ថិភាព។
គេនៅមិនទាន់ដឹងថា តើព្យុះថ្មីមួយនេះនឹងអាចធ្វើអោយខូចខាតប៉ុណ្ណានោះទេ ខណៈដែលខ្យល់ព្យុះ Sandy បានបំផ្លាញថវិកាអស់មិនតិចជាង២០ពាន់លានដុល្លារនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ