អាមេរិកកំពុងជួបព្យុះទឹកកកជាប្រវត្តិសាស្ត្រ
សហរដ្ឋអាមេរិកកំពុងតែជួបនូវហេតុការណ៍ព្យុះទឹកកក ជាប្រវត្តិសាស្ត្រមួយ នៅថ្ងៃសៅរ៍នេះ។ ក្នុងក្រុងបូស្តុន និងក្រុងញូវយក នៅប៉ែកឥសានប្រទេស អាកាសយានដ្ឋាននានាបានលុបចោលនូវការហោះហើរយន្តហោះ ច្រើនរាប់ពាន់ជើង។ រដ្ឋចំនួន៥កំពុងត្រៀមអោយធ្វើការប្រុងប្រយ័ត្នខ្ពស់។ ទឹកកកបានធ្លាក់ចុះខ្លាំង ជាមធ្យមអាចនឹងមានកម្រាស់ពី ៣០ ទៅ ៦០ សង់ទីម៉ែត្រ នៅលើដី ហើយទន្ទឹមនឹងនេះ ក៏មានខ្យល់បក់បោកខ្លាំងដូចជាព្យុះសង្ឃរាផងដែរ។ ព្យុះទឹកកកនេះធ្វើអោយគេនឹកឃើញដល់ព្យុះសង្ឈរា សាន់ឌី នាឆ្នាំ២០១២ កន្លងទៅ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១៦
អ្វីដែលគួរអោយចាប់អារម្មណ៍នៅសហរដ្ឋអាមេរិក នៅថ្ងៃសៅរ៍នេះ គឺមិនមែនជាការធ្លាក់ទឹកកកនោះឡើយ ប៉ុន្តែគឺបរិមាណនៃទឹកកកដែលធ្លាក់ និងកំលាំងនៃខ្យល់ត្រជាក់បក់មកពីទិសខាងជើង ដែលនឹងធ្វើអោយហេតុការណ៍ធ្លាក់ទឹកកកថ្ងៃនេះ ក្លាយជាហេតុការណ៍ធ្លាក់ទឹកកកជាប្រវត្តិសាស្ត្រ នៅក្នុងប្រទេស។
យោងតាមឧត្តុនិយមអាមេរិក ទឹកកកដែលធ្លាក់អាចមានកម្រាស់ជាមធ្យមពី ៣០ ទៅ ៦០ សង់ទីម៉ែត្រ នៅលើដី។ ទឹកកកធ្លាក់ចុះខ្លាំង ហើយមានលាយឡំទៅដោយកម្លាំងនៃខ្យល់បក់លើសលុប ប្រៀបបានទៅនឹងព្យុះសង្ឃរា។ ហេតុការណ៍នេះ បានធ្វើអោយអាជ្ញាធរអាមេរិក ដាក់រដ្ឋចំនួន៥ ក្នុងភាគពាយព្យប្រទេស អោយត្រៀមធ្វើការប្រុងប្រយ័ត្នខ្ពស់។ រដ្ឋទាំងនេះមាន Massachusetts, Rhode Island, Connecticut, New York និង Maine។
រដ្ឋម៉ាសាឈូសេត បានហាមឃាត់មិនអោយមានដំណើរការចរាចរណ៍យានយន្ត។ វាជាការហាមឃាត់មួយដ៏កម្រ នៅក្នុងរដ្ឋនេះ។ ក្នុងក្រុងបូស្តុន និងក្រុងញូវយក អាកាសយានដ្ឋាននានាបានលុបចោលនូវការហោះហើរយន្តហោះ ច្រើនរាប់ពាន់ជើង។ ដោយសារតែមានទឹកកកលើសលុប ហួសហេតុនោះ អាជ្ញាធរអាមេរិក ក៏បានលុបចោលនូវការប្រកួតរំអិលស្នូកទឹកកក ផងដែរ។
ព្យុះទឹកកកនេះធ្វើអោយគេនឹកឃើញដល់ព្យុះសង្ឈរា សាន់ឌី នាឆ្នាំ២០១២ កន្លងទៅ។ ប្រជាជនអាមេរិក ពិសេសប្រជាជននៅញូវយក នៅចងចាំនៅឡើយ នូវការគំរាមកំហែងនៃគ្រោះធម្មជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ