ពួកជីហាតបញ្ចេញតារាងឈ្មោះទាហានជើងទឹកអាមេរិក១០០នាក់ ដែលត្រូវសម្លាប់ចោល
តារាងឈ្មោះអនាមិកមួយ ត្រូវបានគេបង្ហោះផ្សាយ តាមប្រព័ន្ធអ៊ីនធើនែត ដែលក្នុងនោះមានរាយនាមទាហានជើងទឹកអាមេរិក ចំនួន១០០នាក់។ ក្នុងអត្ថបទនោះសរសេរថា ទាហានទាំង១០០នាក់នេះ នឹងត្រូវ សម្លាប់ចោល ក្នុងពេលខាងមុខ។ តាមការស្រាវជ្រាវរបស់ភ្នាក់ងារ ស៊ើបការណ័អាមេរិក អ្នកដែលធ្វើ និងផ្សព្វផ្សាយតារាងឈ្មោះនេះ គឺក្រុមជីហាតរដ្ឋអ៊ីស្លាម ដែលមានចេតនា បង្កការស្លន់ស្លោរ ក្នុងជួរកងទ័ពជើងទឹកអាមេរិក។
ចុះផ្សាយនៅថ្ងៃ៖
ស្តាប់ - ០១:៥៩
នៅថ្ងៃអាទិត្យ ទី ២២ មីនា មានចោរព័ត៌មានវិទ្យាមួយក្រុម បានលួចចូលទៅក្នុង ប្រព័ន្ធអ៊ីនធើនែតរបស់អគ្គបញ្ជាការកងទ័ពជើងទឹកអាមេរិក ហើយបានបង្ហោះផ្សាយ បញ្ជីរឈ្មោះមួយ។ ក្នុងបញ្ជីរនោះ ពួកវាបានរាយឈ្មោះ មនុស្ស១០០នាក់ ដែលសុទ្ធសឹងតែជាទាហានជើងទឹកអាមេរិក ហើយដែលមានដាក់អាស័យដ្ឋានផ្ទាល់ខ្លួន របស់ទាហានម្នាក់ៗទៀតផង។ ក្នុងបញ្ជីរដដែល មានសរសេរទៀតថា អ្នកទាំង១០០នាក់ នឹងត្រូវពួកវាសម្លាប់ ក្នុងពេលខាងមុខ ដោយសារតែ ទាហានទាំងនេះ ធ្លាប់បានចូលទៅធ្វើសង្រ្គាមនៅស៊ីរី និងនៅអ៊ីរ៉ាក់។
ក្រសួងការពារជាតិអាមេរិក ក៏ដូចជា ភ្នាក់ងារស៊ើបការណ៍សម្ងាត់របស់អាមេរិក បានទទួលព័ត៌មាននេះ ហើយកំពុងធ្វើការស្រាវជ្រាវ យ៉ាងម៉ត់ចត់។ ជាជំហានដំបូង គេបានដាក់ការសង្ស័យស្ទើរតែច្បាស់ប្រាដកទៅហើយថានេះ ជាស្នាដែរបស់ក្រុមជីហាតរដ្ឋអ៊ីស្លាម។ ពួកនេះ មានគ្នាវាមួយក្រុម ដែលជាអ្នកជំនាញ ខាងព័ត៌មានវិទ្យា ដើម្បីធ្វើការវាយលុក ក៏ដូចជាបង្កចលាចល លើអ៊ីនធើនែត។
យ៉ាងណាមិញ នេះមិនមែនជាលើកទីមួយទេ ដែលក្រុមចោរព័ត៌មានវិទ្យារបស់ក្រុមជីហាត ធ្វើការវាយលុក ទៅលើប្រព័ន្ធអ៊ីនធើនែត របស់ស្ថាប័នធំៗ នៅអាមេរិក។ ក្រុមនេះទើបតែបានអួតពីជោគជ័យរបស់ពួកវាទៀត ថាបានចូលទៅលួចយកឯកសារសម្ងាត់ និងអ៊ីម៉េល ជាច្រើន របស់រដ្ឋាភិបាលអាមេរិក តាមប្រព័ន្ធអ៊ីនធើនែត។
អគ្គបញ្ជាការកងទ័ពជើងទឹកអាមេរិក បានបញ្ជាឲ្យបុគ្គលិក ក៏ដូចជា នាយទាហានទាំងអស់ មានការប្រុងប្រយ័ត្ន ជាពិសេស ទាក់ទិនទៅនឹងចរាចរណ៍ ទិន្នន័យព័ត៌មានផ្ទាល់ខ្លួន នៅតាមអ៊ីនធើនែត។ ទោះបីជាយ៉ាងណា អ្នកនាំពាក្យកងទ័ពជើងទឹកអាមេរិក បានបញ្ជាក់ថា ផ្ទុយពីអ្វីដែលបានសរសេរ ក្នុងឯកសារអនាមិកនេះ ទាហានមួយចំនួនធំ ដែលមានឈ្មោះក្នុងបញ្ជីរនេះ មិនដែលធ្លាប់ទៅធ្វើបេសកកម្ម នៅអ៊ីរ៉ាក់ រឺក៏នៅស៊ីរីទេ។
ដោយឡែក លោក Philip Breedlove អគ្គមេបញ្ជាការកងទ័ពអូតង់ បានមានប្រតិកម្មភ្លាមៗ បន្ទាប់ពីបានដំណឹងនេះ។ លោកថា នេះគ្រាន់ជាយុទ្ធសាស្រ្ត របស់ពួកជីហាត ដែលកំពុងតែរិះរកគ្រប់វិធីដើម្បីបន្លាចគេ ហើយបង្ហាញឲ្យឃើញថា ពួកវាមានឥទ្ធិពលប៉ុណ្ណា។ តាមការពិត នៅសមរភូមិឯណោះ ពួកជីហាតអ៊ីស្លាម កំពុងតែភ័យខ្លួន ដោយសារកងទ័ពសម្ពន្ធ័មិត្ត កំពុងមានប្រៀបជាង។ ហេតុដូច្នេះហើយ នៅពេលដែលពួកវាកំពុងតែបាក់ទ័ព ពួកវាឆ្លៀតមកធ្វើរឿងនេះ ដើម្បីបង្វែរការចាប់អារម្មណ៍ របស់ទស្សនៈមហាជន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ