ពួកអង្គការរដ្ឋអ៊ីស្លាមសម្រុកវាយប្រហារមរណៈនៅស៊ីរី ពេលចូលឆ្នាំថ្មី
លង់ខ្លួនក្នុងសង្គ្រាមស៊ីវិល អស់ជាងបួនឆ្នាំ ស្លាប់ជីវិតមនុស្សអស់ជាង២១៥០០០នាក់ ស៊ីរីកំពុងរងគ្រោះមួយជាន់ទៀតក្នុងអំពើហិង្សា ដែលផ្តាច់ជីវិតមនុស្សរាប់សិបនាក់។ ប្រឈមមុខនឹងកម្លាំងសង្គ្រាប់របស់ទាហានស៊ីរី និងកងយុទ្ធជនគូដ ពួកអង្គការរដ្ឋអ៊ីស្លាមបានបើកការវាយប្រហារទ្រង់ទ្រាយធំមួយគួរឱ្យភ្ញាក់ផ្អើល ក្នុងរយៈពេល២៤ម៉ោងចុងក្រោយនេះ។ អំពើហិង្សាដែលបានជំរុញឱ្យមានជនស៊ីរីភៀសខ្លួនកាន់ច្រើន។ ហើយបើតាមអ្នកទទួលខុសត្រូវអឺរ៉ុបផ្នែកប្រឆាំងភេរវនិយម អាចមានពួកជីហាត បន្លំខ្លួនចំណោមជនភៀសខ្លួនផង។
ចុះផ្សាយនៅថ្ងៃ៖
ស្តាប់ - ០១:៥៨
ប៉ុន្មានសប្តាហ៍ចុងក្រោយនេះ កងកម្លាំងរបស់រដ្ឋាភិបាលស៊ីរី បានវាតកម្លាំងរុញច្រើនពួកអ៊ីស្លាមជ្រុលនិយម អង្គការរដ្ឋអ៊ីស្លាមផង និងពួកភេរវនិយមអាល់ណូស្រា ស្និទ្ធនឹងអាល់កៃដាផង ប៉ុន្តែស្រាប់នៅថ្ងៃម្សិលមិញនេះ ពួកជីហាតរដ្ឋអ៊ីស្លាម បានស្ទុះងើបមកវាយប្រហារប្រឆាំងនឹងប៉ុស្តិ៍ត្រួតពិនិត្យជាច្រើន ក្នុងផ្ទៃប្រទេស ក្នុងពេលតែមួយ មិនថាកន្លែងដែលគ្រប់គ្រងដោយរបបលោក បាស្ហា អាល់អាសាដ ឬដោយក្រុមប្រដាប់អាវុធគួដទេ។
បើតាមអង្គការសិទ្ធិមនុស្សស៊ីរី មានស្លាប់យ៉ាងហោច៧០នាក់ នៅថ្ងៃម្សិលមិញ ក្នុងការវាយប្រហារនេះ និងក្នុងភេរវកម្មអត្តឃាតនៅ ខេត្តម៉ូស៊ូល ជាយុទ្ធសាស្ត្រ ភាគឦសាន ជាប់ព្រំដែនអ៊ីរ៉ាក់ ដែលជាទីតាំងគ្រប់គ្រងមួយភាគធំដោយកងកម្លាំងគួដ និងកងទ័ពរដ្ឋាភិបាល។ ភេរវកម្ម ប្រឆាំងនឹងក្រុមគួដ កំពុងប្រារព្ធពិធីបុណ្យចូលឆ្នាំថ្មី បានសម្លាប់ជីវិតមនុស្សយ៉ាងហោចណាស់៥០នាក់ ភាគច្រើនជាស៊ីវិល។ លោក បានគីមូន អគ្គលេខាធិការអង្គការប្រជាជាតិបានចេញមុខថ្កោលទោសការវាយប្រហារភេរវកម្មនេះមុនគេ។
ហេតុការណ៍ហិង្សាលើសមរភូមិ បានផ្ទុះសកម្មភាពឡើងវិញ ក្នុងខណៈចំនួនជនភៀសខ្លួនសង្គ្រាម មានកាន់តែច្រើន។ ចំនួនអ្នកសុំសិទ្ធិជ្រកកោននៅសហភាពអឺរ៉ុប បានកើន៤៤%។ នៅក្នុងចំណោមនោះ បើតាមការិយាល័យសិ្ថតិអឺរ៉ុប ជិតពាក់កណ្តាលតែបានទទួលចម្លើយវិជ្ជមានក្រោមហេតុផលមនុស្សធម៌។
មនុស្សធម៌ជាកាតព្វកិច្ចមួយ តែទន្ទឹមនឹងនោះ អ្នកសម្របសម្រួលរបស់សហភាពអឺរ៉ុប ផ្នែកប្រយុទ្ធប្រឆាំងនឹងភេរវនិយម ក៏បានទាញសញ្ញាអាសន្ន រំលឹកដល់ភ្នាក់ងារព្រំដែនអឺរ៉ុបឱ្យបង្កើនការប្រុងប្រយ័ត្នខ្ពស់ ខ្លាចមានជនជីហាតអង្គការរដ្ឋអ៊ីស្លាម បន្លំខ្លួនក្នុងចំណោមជនភៀសខ្លួន ដើម្បីចូលមកធ្វើសកម្មភាពនៅអឺរ៉ុប។ អ្នកសម្របសម្រួលសញ្ជាតិប៊ែលហ្សិក បានអះអាងថ្វីបើការវាយប្រហារភេរវកម្មប្រឆាំងអឺរ៉ុបមានលក្ខណៈជាបុគ្គលប្រកាសខ្លួនជាអង្គការរដ្ឋអ៊ីស្លាមមែន តែសហភាពអឺរ៉ុបប្រឈមខ្លាំងនឹងភេរវកម្មទ្រង់ទ្រាយធំ ដូចសកម្មភាពរបស់ពួកអាល់កៃដាជានិច្ច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ