ប្រទេសមហាអំណាច និយាយមិនត្រូវគ្នា រឿងដំណោះស្រាយវិបត្តិកូរ៉េខាងជើង
មួយថ្ងៃក្រោយពេលដែលកូរ៉េខាងជើង បានបាញ់សាកល្បងគ្រាប់នុយក្លេអ៊ែរ ក្រុមប្រឹក្សាសន្តិសុខ បានបើកការប្រជុំបន្ទាន់ កាលពីថ្ងៃចន្ទម្សិលមិញ ដើម្បីរកដំណោះស្រាយ។ ខណៈដែលសហរដ្ឋអាមេរិក ទាមទារឲ្យដាក់ទណ្ឌកម្មឲ្យធ្ងន់ ដើម្បីបិទដង្ហើមសេដ្ឋកិច្ច កូរ៉េខាងជើង រុស្ស៊ីនិងចិនឯណោះ មានគំនិតដូចគ្នា គឺថាទណ្ឌកម្មសេដ្ឋកិច្ច មិនបានហុចផលអ្វីទេ ក្រៅពីរុញរបបកូរ៉េខាងជើង ឲ្យកាន់តែទ័លច្រក។ ចិននិងរុស្ស៊ី អំពាវនាវឲ្យអាមេរិក និងកូរ៉េខាងត្បូងធ្វើសម្បទាន ដើម្បីចរចាជាមួយកូរ៉េខាងជើង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៤
សហរដ្ឋអាមេរិកបានស្នើនូវវិធានការទណ្ឌកម្មសេដ្ឋកិច្ច ជាច្រើនចំណុច ទាក់ទិននឹងការនាំចូលប្រេង វិស័យទេសចរណ៍ និងក្រុមបុគ្គលិកកូរ៉េខាងជើង ដែលព្យុងយ៉ាងបញ្ជូន ឲ្យទៅធ្វើការនៅបរទេស។ ក្រុមហ៊ុន ឬមនុស្សដែលអាចជាប់ក្នុងទណ្ឌកម្មនេះ មានភាគច្រើន គឺជាក្រុមហ៊ុនចិន និងរុស្ស៊ីតែម្តង។ តាមការគ្រោងទុក ក្រុមប្រឹក្សាសន្តិសុខ នឹងបោះឆ្នោតសម្រេច នៅថ្ងៃទី១១កញ្ញា។
រដ្ឋាភិបាលចិន ដែលបានប្រកាសថ្កោលទោសកូរ៉េខាងជើងនោះ បានសន្យាថានឹងអនុវត្តសេចក្តីសម្រេចចិត្ត របស់ក្រុមប្រឹក្សាសន្តិសុខឲ្យបានខ្ជាប់ខ្ជួន។ តែយ៉ាងណា ចិន និងរុស្ស៊ី មានជំហរដូចគ្នា ដោយបានលើកឡើងថា ទណ្ឌកម្មសេដ្ឋកិច្ចលើកូរ៉េខាងជើង គឺមិនបានផលទេ ព្រោះនេះមិនមែនជាលើកទីមួយទេ ដែលគេដាក់ទណ្ឌកម្ម តែកូរ៉េខាងជើង នៅតែមិនឈប់ដដែល។
លោកពូទីន បានថ្លែងថា "ដ៏រាបណា កូរ៉េខាងជើង នៅតែមានអារម្មណ៍ខ្លាចថាមានគេមកវាយប្រហារខ្លួន នោះកូរ៉េខាងជើង នឹងនៅតែបន្តការផលិតអាវុធនុយក្លេអ៊ែរ"។ លោកអគ្គរដ្ឋទូតចិនប្រចាំអង្គការសហប្រជាជាតិ លើកឡើងថា "មធ្យោបាយតែមួយគត់ គឺដោះស្រាយដោយសន្តិវិធី តាមរយៈការចរចា"។ លោកទូតចិនដដែលបញ្ជាក់ថា ចិន និងរុស្ស៊ី បានស្នើឲ្យមានការធ្វើសម្បទាន ពីសំណាក់ សហរដ្ឋអាមេរិក និងកូរ៉េខាងត្បូង តាមរយៈការបិទបញ្ចប់ការធ្វើសមយុទ្ធយោធារួមគ្នា។ ហើយជាថ្នូរ កូរ៉េខាងជើងនឹងព្រមចូលតុចរចា ដើម្បីបញ្ឈប់ផលិតមីស៊ីល និងអាវុធនុយក្លេអ៊ែរ។
សំណើរនេះ ត្រូវបានលោកស្រី Nikki Haley អគ្គរដ្ឋទូតអាមេរិក ច្រានចោលភ្លាម ហើយបានចាត់ទុកថាជាសំណើរដែលមានន័យ "ជេរប្រមាថ”។ លោកស្រី Nikki Haley បានលើកឡើងថា "ទង្វើរបស់កូរ៉េខាងជើង គឺជាការដុតភ្លើងសង្រ្គាម។ នៅចំពោះមុខរបបយូកូងផ្តាច់ការ កំរោលចូលដូចកូរ៉េខាងជើងនេះ យើងដាច់ខាត ត្រូវតែប្រុងប្រយ័ត្នជានិច្ច "។
ដោយឡែក នៅព្រឹកថ្ងៃអង្គារនេះ កងទ័ពកូរ៉េខាងត្បូង បានធ្វើការបាក់សាកល្បងគ្រាប់ពិត នៅតំបន់មាត់សមុទ្រ ដើម្បីជាការកំញើញតបវិញ។ កូរ៉េខាងត្បូង និងអាមេរិក ក៏បានព្រមព្រៀងគ្នា បំពាក់បន្ថែមនូវប្រព័ន្ធខែលការពារគ្រាប់មីស៊ីលដែរ។
យ៉ាងណាក៏ដោយ អ្នកវិភាគស្ថានការណ៍ជាច្រើន បានលើកឡើងថា ការប្រើកម្លាំងតបវិញ គឺជារឿងមួយខុសធ្ងន់ និងគ្រោះថ្នាក់ណាស់។ កូរ៉េខាងជើងកំពុងទ័លច្រក ហើយត្រូវការការចរចា ដើម្បីធានាពីអាយុជីវិតរបស់របបដឹកនាំខ្លួន ដូច្នេះភាគីផ្សេងទៀត ត្រូវតែពិចារណាឲ្យបានច្បាស់ មុននឹងសម្រេចធ្វើអ្វីមួយទៅតាមចិត្តខឹង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ