រដ្ឋអាជ្ញាកូរ៉េខាងត្បូង ចោទលោកស្រីប៉ាក់ គុនហេ ជាផ្លូវការ ពីបទពុករលួយ
ប៉ុន្មានសប្តាហ៍បន្ទាប់ពីបានចាប់លោកស្រី ប៉ាក់ គុនហេ ដាក់ឃុំបណ្តោះអាសន្ន រដ្ឋអាជ្ញានិងក្រុមស៊ើបអង្កេត កូរ៉េខាងត្បូង បានសម្រេចកាលពីថ្ងៃចន្ទ ទី១៧ មេសា ធ្វើការចោទប្រកាន់ជាផ្លូវការ ទៅលើរូបលោកស្រី អតីតប្រធានាធិបតីកូរ៉េខាងត្បូង ពីបទប្រព្រឹត្តិអំពើពុករលួយ ព្រមទាំង ប្រើប្រាស់អំណាច ឥទ្ធិពលខុសច្បាប់។ ចាប់ពីពេលនេះទៅ នីតិវិធីជំនុំជំរះ នឹងត្រូវបញ្ជូនទៅកាន់តុលាការ ដែលនឹងត្រូវធ្វើការកាត់ក្តី លើសំណុំរឿងនេះ។
ចុះផ្សាយនៅថ្ងៃ៖
ស្តាប់ - ០២:០១
លោកស្រីប៉ាក់ គុនហេ អតីតប្រធានាធិបតីកូរ៉េខាងត្បូង ត្រូវបានរដ្ឋអាជ្ញាចោទជាផ្លូវការ ពីបទប្រព្រឹត្តិអំពើពុករលួយ រំលោភអំណាចប្រើប្រាស់ឥទ្ធិពលខុសច្បាប់ និងពីបទធ្វើឲ្យខូចកិច្ចការសម្ងាត់របស់ជាតិ។ ទាំងនេះ គឺជាបទចោទប្រកាន់ធ្ងន់ៗបំផុត ដែលក្រុមការងារស៊ើបអង្កេត បានសម្រេចប្រកាសផ្សាយ កាលពីថ្ងៃចន្ទទី១៧មេសា។
សំណុំរឿងនេះ សង្កត់ធ្ងន់ទៅលើករណីរឿងអាស្រូវ ដែលពាក់ព័ន្ធរវាងលោកស្រី ប៉ាក់ គុនហេ និងស្ត្រីជំនិតម្នាក់ឈ្មោះ ឆយ ស៊ុនស៊ីល។ ស្រ្តីឈ្មោះឆយ ស៊ុនស៊ីលនេះ បច្ចុប្បន្នស្ថិតក្នុងនីតិវិធីជំនុំជំរះ ដែលតុលាការចោទប្រកាន់ស្ត្រីរូបនេះ ថាបានបង្កើតមូលនិធី២ ដោយប្រើឈ្មោះខ្លួន និងលោកស្រីប៉ាក់ គុនហេ ដើម្បីជំរិតទារប្រាក់ ពីក្រុមហ៊ុនសហគ្រាសធំៗ ជាថ្នូរនឹងសម្បទានផ្សេងៗ។ ទឹកប្រាក់ដែលគេសង្ស័យ ថាស្ត្រីនេះប្រមូលបានយកទៅ ចាយវាយផ្ទាល់ខ្លួន មានប្រមាណជា៧០លានដុល្លារ។
ដោយឡែក ក្រុមស៊ើបអង្កេត កូរ៉េខាងត្បូង ក៏បានទើបចោទប្រកាន់លោកប្រធានក្រុមហ៊ុនបណ្តាញផ្សារទំនើប Lotte របស់កូរ៉េខាងត្បូង ក្នុងសំណុំរឿងនេះដែរ។ ក្រុមហ៊ុននេះ ត្រូវបានគេសង្ស័យថា បានសូកប្រាក់ប្រមាណជាជិត៦លានដុល្លារ ទៅមូលនិធីរបស់ស្ត្រីឈ្មោះ ឆយ ស៊ុនស៊ីល ដើម្បីជាថ្នូរ ឲ្យលោកស្រីប្រធានាធិបតីប៉ាក់ គុនហេ អនុញ្ញាតិឲ្យបើកហាងទំនិញ ដោយមិនបាច់ជាប់ពន្ធ។ នេះគឺជាប្រធានក្រុមហ៊ុនកូរ៉េខាងត្បូងទី២ហើយ បន្ទាប់ពីនាយករងក្រុមហ៊ុន Samsung ដែលត្រូវបានក្រុមស៊ើបអង្កេត សម្រេចចោទប្រកាន់ ក្នុងសំណុំរឿងនេះដែរ។
សូមរំលឹកថា រឿងអាស្រូវនេះ បានធ្វើឲ្យមហាជន ភ្លឺភ្នែក បានដឹងពីទំនាក់ទំនងយ៉ាងស្អិតរមួត និងស្មោគគ្រោគ រវាងលោកស្រីប្រធានាធិបតីប៉ាក់ គុនហេ ជាមួយនឹងក្រុមហ៊ុនគ្រាក់ៗ នៅកូរ៉េខាងត្បូង។ ជាងនេះទៅទៀត គ្រប់គ្នាបានស្រង៉ាកចិត្ត នៅពេលបានដឹងថា លោកស្រីប៉ាក់ គុនហេ បានបណ្តោយ យកកិច្ចការរដ្ឋ មិនថាការតែងតាំងមន្ត្រីមុខតំណែងធំៗ រឺក៏សេចក្តីសម្រេចសំខាន់ៗ យកទៅសួរយោបល់ ពីស្រ្តីឈ្មោះ ឆយ ស៊ុនស៊ីល ទាំងដែលស្ត្រីរូបនោះ គ្មានមុខតំណែងអ្វីសោះ។ លោកស្រី ប៉ាក់ គុនហេ គឺជាប្រធានាធិបតីកូរ៉េខាងត្បូងទីបីហើយ ដែលត្រូវតុលាការចោទពីបទប្រព្រឹត្តិអំពើពុករលួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ