រញ្ជួយដីនៅភាគខាងត្បូងជប៉ុន
ប្រទេសជប៉ុនបានជួបគ្រោះរញ្ជួយដី នៅវេលាម៉ោងប្រែលជា៩ និង៣០នាទីយប់ កាលពីថ្ងៃទី១៤ មេសា នៅភាគខាងត្បូងប្រទេស ក្នុងស្រុកគូម៉ាម៉ូតូ ដែសស្ថិតលើកោះឃ្យូស៊ូ។ រហូតមកត្រឹមពេលនេះ ចំនួនមនុស្សស្លាប់ ត្រូវបានគេរាយការណ៍ថាមានចំនួន៩នាក់ តែអ្នករបួសមានជាង៨០០នាក់ ដែលក្នុងនោះ ជាង៥០នាក់ កំពុងស្ថិតក្នុងស្ថានភាពធ្ងន់ធ្ងរ។ ប្រជាជនប្រមាណជា៤៤០០០នាក់ កំពុងតែស្ថិតនៅជួបជុំគ្នា នៅក្នុងទីវាល ដោយក្រែងមានការរំជួយជាថ្មីធ្វើឲ្យបាក់ស្រុតអាគារ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
សំណង់អាគារ ផ្ទះសម្បែង ដែលភាគច្រើនសង់ពីឈើ នៅក្នុងស្រុកគូម៉ាម៉ូតូ បានដួលរលំស្ទើតែទាំងស្រុង ដោយសារគ្រោះរញ្ជួយដី កាលពីយប់ថ្ងៃព្រហស្បតិ៍ នៅវេលាម៉ោងប្រមាណជា៩ និង២៦នាទីយប់។ គ្រោះរញ្ជួយដី ដែលមានកំរិតប្រមាណជា ៦,៥ រិចទើរ បានបង្ករឲ្យមានរំញោច ដល់ទៅ១២៣ដង ក្នុងវេលាយប់ថ្ងៃព្រហស្បតិ៍ នេះបើតាមការផ្តល់ព័ត៌មានរបស់ទីភ្នាក់ងារធរណីវិទ្យារបស់ជប៉ុន។ ក៏ប៉ុន្តែករណីរញ្ជួយដីនេះ ផ្តើមចេញពីស្នាមប្រេះដំបូង ដែលមានជំរៅប្រមាណតែ១១គីឡូម៉ែត្រ តែប៉ុណ្ណោះ។
ប្រជាជនប្រមាណជាជាង៤ម៉ឺននាក់ ដែលបាត់បង់ផ្ទះសំបែង បាននាំគ្នាជួបជុំគ្នានៅទីវាល ទាំងកណ្តាលយប់ ហើយមួយចំនួនធំត្រូវបានទទួលឲ្យសំរាកនៅតាមមណ្ឌលទទួលជនរងគ្រោះ ដើម្បីបញ្ចៀសពីការបាក់ស្រុតអាគារថ្មីផ្សេងទៀត។ ផ្ទះ១៤០០០ខ្នង ត្រូវរងការខូចខាត ដោយគ្មានភ្លើងអគ្គីសនី បណ្តាញហ្គាស និងទឹកស្អាតត្រូវបានកាត់ផ្តាច់។ ដោយឡែកប្រាសាទបុរាណមួយ ដែលមានចំណាស់៤០០ឆ្នាំ ក៏បានរងការខូចខាតមួយផ្នែកផងដែរ។ ទូរថភ្លើងល្បឿនលឿនមួយខ្សែរ ត្រូវបានខ្ទាតធ្លាក់ពីផ្លូវដែក ក៏បន្តែមិនមានអ្នកដំណើរនៅក្នុងនោះទេ។ សេវាដឹកជញ្ជូនផ្លូវដែក ក្នុងតំបន់នោះ ត្រូវបានផ្អាក ដូចគ្នានឹងចរាចរណ៍ផ្លូវថ្នល់ផងដែរ ដែលរងការខូចខាតយ៉ាងដំណំ។
រដ្ឋាភិបាលជប៉ុន បានធ្វើការប្រកាសអាសន្នភ្លាមៗ ហើយបានបញ្ជូនកម្លាំងសង្រ្គោះប្រមាណជា៦៥០០នាក់ ទៅដល់តំបន់ដែលមានគ្រោះថ្នាក់។ ចំណែកសហគ្រាសធំៗរបស់ជប៉ុន ដែលមានទីតាំងក្នុងតំបន់រញ្ជួយដី មានដូចជា ក្រុមហ៊ុនToyota Bridgeston Honda និង Sony ជាដើម បានសម្រេចបិទទ្វារ ផ្អាកការផលិតនៅថ្ងៃសុក្រនេះ ដើម្បីធ្វើការបូកសរុបការខូចខាត។
សូមបញ្ជាក់ថា អ្វីដែលជាការព្រួយបារម្ភរបស់អាជ្ញាធរជប៉ុន គឺស្ថានីយ៍ផលិតថាមពលនុយក្លេអ៊ែរ ២កន្លែង ដែលមានទីតាំងនៅមិនឆ្ងាយពីតំបន់កើតហេតុ។ យោងតាមព័ត៌មានបឋម ស្ថានីយ៍ទាំងនោះ មិនបានទទួលរងការខូចខាតទេ។
ប្រជាជនជប៉ុននៅចាំមិនទាន់ភ្លេចទេ កាលពីខែមីនា ឆ្នាំ២០១១ ដែលមានរញ្ជួយដីនៅហ្វូគូឈីម៉ា បង្ករជារលកស៊ូណាមី ហើយបានវាយកម្ទេចរោងចក្រផលិតថាមពលនុយក្លេអ៊ែរពីរកន្លែង។ គ្រោះមហន្តរាយនុយក្លេអ៊ែរ បង្ករឡើងដោយការរញ្ជួយដី រឺរលកស៊ូណាមី ស្ថិតនៅក្នុងការភ័យខ្លាចរបស់ប្រជាជនជប៉ុនជានិច្ច។ តែយ៉ាងណាក៏ដោយ យោងតាមអ្នកជំនាញ ការរញ្ជួយនៅតំបន់ គូម៉ាម៉ូតូលើកនេះ គឺមានកំរិតខ្សោយជាងខ្លាំង បើប្រៀបធៀបទៅករណីរញ្ជួយកាលពីឆ្នាំ២០១១៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ