MH370៖ របាយការណ៍ចុងក្រោយរបស់ក្រុមស្រាវជ្រាវអូស្ត្រាលី បញ្ជាក់ពីបរាជ័យក្នុងការរុករកយន្តហោះ
ក្រុមការងារស្រាវជ្រាវអូស្ត្រាលី ដែលសហការក្នុងការរុករកយន្តហោះ ម៉ាឡេស៊ី ជើងហោះហើរលេខ MH370 ដែលបានបាត់កាលពីឆ្នាំ២០១៤នោះ ទើបបានចេញរបាយការណ៍ចុងក្រោយ របស់ខ្លួន នៅថ្ងៃអង្គារ ទី៣ តុលានេះ។ យោងតាមរបាយការណ៍នេះ ក្រុមការងារអូស្ត្រាលី បានត្រឹមតែបញ្ជាក់ ពីបរាជ័យ ក្នុងការរុករកយន្តហោះនេះ តែប៉ុណ្ណោះ។ សម្រាប់ក្រុមការងារ វាគឺជារឿងមួយ មិនអស់ចិត្តសោះ និងមិនអាចទទួលយកបានទេ ដែលយន្តហោះមួយទាំងមូល បាត់ស្រមោលឈឹងសូន្យបែបនេះ។
ចុះផ្សាយនៅថ្ងៃ៖ កែប្រែថ្ងៃទី៖
យន្តហោះដឹកអ្នកដំណើរ របស់ក្រុមហ៊ុន Malaysia Airlines ជើងហោះហើរលេខ MH370 បានបាត់ដំណឹងនៅថ្ងៃទី ៨ ខែមីនា ឆ្នាំ២០១៤ ដោយនាំយកទៅជាមួយ នូវជីវិតមនុស្សចំនួន២៣៩នាក់។ យន្តហោះដ៏ទំនើប ប្រភេទBoeing777 បាត់ស្រមោលឈឹងសូន្យ ដោយគ្មានទុកដានបែបនេះ គឺជារឿងមួយដ៏អាថ៌កំបាំងបំផុត ក្នុងប្រវត្តិសាស្ត្រអាកាសចរណ៍ស៊ីវីល។
ក្រុមការងារស្រាវជ្រាវអូស្ត្រាលី ATSB ដែលសហការជាមួយអាជ្ញាធរម៉ាឡេស៊ី ទើបតែបានចេញរបាយការណ៍ចុងក្រោយបង្អស់របស់ខ្លួន ស្តីពីលទ្ធផលនៃការរុករកសាកសពយន្តហោះនេះ។ ក្រុមការងារនេះ គ្មានពាក្យអ្វីនឹងថ្លែងក្រៅ តែពីបញ្ជាក់ពីការអស់សង្ឃឹម ដែលការរុករក នៅតែបរាជ័យ អស់រយៈពេលជាង៣ឆ្នាំមកនេះ។
ក្រុមការងារ ATSB បានលើកឡើងថា ដ៏រាបណា នៅតែរកយន្តហោះមិនទាន់ឃើញ នោះគេមិនអាចសន្និដ្ឋានពីមូលហេតុពិតប្រាដក ដែលបណ្តាលឲ្យមានគ្រោះថ្នាក់នេះទេ។ បន្ថែមពីនេះ របាយការណ៍ដែលមានកំរាស់ ៤៤០ទំព័រនេះ បានបន្តថា វាជារឿងមួយដែលមិនគួរឲ្យជឿ មិនអាចទទួលយកបាន និងមិនអស់ចិត្តទាល់តែសោះ ដែលក្នុងសម័យបច្ចេកវិទ្យាដ៏ទំនើប ក្នុងសតវត្សទី២១នេះ យន្តហោះធំ ដ៏ទំនើបមួយ បានបាត់ដានស្រមោល ដោយមិនអាចស្វែងរកឃើញបែបនេះ។
គួររំលឹកថា ប្រតិបត្តិការស្រាវជ្រាវរុករកយន្តហោះ MH370 បានចាប់ផ្តើមឡើង ជាមួយនឹងលក្ខខណ្ឌដ៏លំបាកបំផុត ដោយសារក្រុមការងារ ពុំមានព័ត៌មាន ឬទិន្ន័យអ្វីច្រើន ស្តីពីយន្តហោះនេះទេ។ ជាបឋម ក្រុមការងាររុករក បានកំណត់ទីតាំងធ្លាក់ នៅក្នុងមហាសមុទ្រឥណ្ឌា ភាគខាងត្បូង ក្នុងរង្វង់ប្រមាណជា ២៥០០០ គីឡូម៉ែត្រ ក្រឡា មុននឹងពង្រីក រហូតដល់ ១២០០០០ គីឡូម៉ែត្រក្រឡា។ តែបើតាមការសន្និដ្ឋាន របស់ទីភ្នាក់ងារអូស្ត្រាលី ដើម្បីការស្រាវជ្រាវ CSIRO យន្តហោះ MH370 អាចស្ថិតនៅភាគខាងជើងបង្អស់ នៃតំបន់រុករកតំបូងបំផុត។ រហូតមកទល់ពេលនេះ មានបំណែកយន្តហោះ MH370នេះ តែ៣ដុំប៉ុណ្ណោះ ដែលគេបានរកឃើញ នៅតាមឆ្នេរ ភាគខាងលិចមហាសមុទ្រឥណ្ឌា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ