រុស្ស៊ីបញ្ជូនសព្វាវុធ និងចង់បង្កើតមូលដ្ឋានទ័ព នៅលើកោះគូរីល
រដ្ឋមន្ត្រីក្រសួងការពារជាតិរុស្ស៊ី បានថ្លែងឲ្យដឹងកាលពីថ្ងៃទី ២៥ មីនាថា រុស្ស៊ីនឹងសម្រេចបញ្ជូនគ្រឿងសព្វាវុធ ព្រមទាំងឧបករណ៍ដ្រូនប្រភេទទំនើបរបស់រុស្ស៊ី ជាច្រើនគ្រឿងទៅកាន់ប្រជុំកោះគូរីល ក្នុងពេលឆាប់ៗនេះ។ ការសម្រេចធ្វើបែបនេះ គឺដើម្បីបង្កើនសមត្ថភាពការពារខ្លួនរុស្ស៊ី នៅក្នុងតំបន់ប៉ាស៊ីហ្វិក។ ប៉ុន្តែការបញ្ជូនគ្រឿងសព្វាវុធទៅកោះគូរីល ពិតជានឹងបង្កជាបញ្ហាជាមួយជប៉ុន ព្រោះជប៉ុនបានទាមទារថាប្រជុំកោះនេះ ស្ថិតក្នុងដែនអធិបតេយ្យរបស់ខ្លួន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
លោក ស៊ែកហ្គៃ ឆួហ្គូ រដ្ឋមន្ត្រីក្រសួងការពារជាតិរុស្ស៊ី បានបញ្ជាក់ប្រាប់ថា រុស្ស៊ីនឹងបញ្ជូនគ្រឿងសព្វាវុធ ប្រព័ន្ធការពារការវាយប្រហារតាមសមុទ្រ និងឧបករណ៍ដ្រូនរុស្ស៊ី ទៅប្រចាំការនៅលើកោះគូរីល ក្នុងពេលដ៏ខ្លីខាងមុខនេះ។ បន្ថែមពីនេះ លោករដ្ឋមន្រ្តីរុស្ស៊ីបញ្ជាក់ថា រុស្ស៊ី មានគម្រោងសាងសង់មូលដ្ឋានទ័ពដ៏ធំមួយ នៅលើកោះគូរីលទៀតផង។ នៅដើមខែមេសាខាងមុខនេះ ទាហានជើងទឹករុស្ស៊ី និងចេញធ្វើប្រតិបត្តិការពិនិត្យមើលស្ថានភាពភូមិសាស្ត្រ នៅជុំវិញកោះគូរីល ក្នុងរយៈពេល៣ខែ មុននឹងចាប់ផ្តើមដំណើរការសាងសង់មូលដ្ឋានទ័ពថ្មី។
សូមបញ្ជាក់ថា បច្ចុប្បន្ននេះ នៅប៉ែកចុងបូព៌ា ឆ្នេរមហាសមុទ្រប៉ាស៊ីហ្វិក រុស្ស៊ីមានមូលដ្ឋានទ័ពចំនួនពីរកន្លែង គឺមួយនៅក្រុង Vladivostok និងនៅ Viliouchinsk។ កាលពីខែធ្នូ រដ្ឋាភិបាលរុស្ស៊ី ធ្លាប់បានប្រកាសរួចទៅហើយថានឹងកសាងមូលដ្ឋានទ័ពថ្មី បន្ថែមទៀត ដើម្បីត្រៀមការពារខ្លួន នៅតាមឆ្នេរមហាសមុទ្រប៉ាស៊ីហ្វិក។
ការបញ្ជូនសម្ភារៈ សព្វាវុធ ព្រមទាំងគម្រោងសាងសង់មូលដ្ឋានទ័ពនៅលើប្រជុំកោះគូរីល ពិតជាអាចបង្កើនភាពតានតឹងរវាងជប៉ុននិងរុស្ស៊ី។ រដ្ឋាភិបាលជប៉ុន នៅមិនទាន់មានប្រតិកម្មអ្វីទាំងអស់ ជុំវិញដំណឹងនេះ។ តែយ៉ាងណាក៏ដោយ គេមិនជឿថាជប៉ុន ដែលជាសម្ព័ន្ធមិត្តរបស់អាមេរិកមួយដែរ សុខចិត្តឲ្យរុស្ស៊ីធ្វើបែបនេះដោយស្រួសៗទេ។
គួររំលឹកថា ប្រជុំកោះគូរីលស្ថិតនៅខាងជើងបង្អស់ នៃប្រជុំកោះរបស់ជប៉ុន។ ទីកោះតូចៗដែលមានមនុស្សរស់នៅប្រមាណជាជិត២ម៉ឺននាក់នេះ ធ្លាប់ស្ថិតក្រោមការកាន់កាប់របស់ជប៉ុន តែត្រូវសហភាពសូវៀតចូលមកត្រួតត្រា នៅពេលដែលជប៉ុនបានចាញ់សង្រ្គាមលោកលើកទីពីរ។ តាំងពីនោះមក ជប៉ុនតែងតែធ្វើការតវ៉ាថា ប្រជុំកោះគូរីល គឺជារបស់ខ្លួន។
ក្រៅពីចង់សម្តែងកម្លាំងដាក់ជប៉ុន ការបញ្ជូនសម្ភារៈ និងគម្រោងសាងសង់មូលដ្ឋានទ័ពនេះ គឺរុស្ស៊ីចង់សំដៅប្រាប់ទៅដល់សម្ព័ន្ធមិត្តរបស់អង្គការអូតង់។ សម្រាប់រុស្ស៊ីវាជារឿងដែលត្រូវតែធ្វើតបវិញ ព្រោះមួយរយៈពេលចុងក្រោយនេះ អូតង់ដែលមានកងទ័ពអាមេរិកនាំមុខ បានបន្ថែមកម្លាំងដាក់រាយ នៅតាមតំបន់អឺរ៉ុបខាងកើត។ លោករដ្ឋមន្ត្រីការពារជាតិរុស្ស៊ីបានថ្លែងចំៗថា រុស្ស៊ីត្រូវត្រៀមកំលាំងការពារខ្លួន ពីគ្រប់ច្រកទាំងអស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ