វៀតណាម៖ ស្ត្រីអ្នកសរសេរអត្ថបទរិះគន់ម្នាក់ទៀត ត្រូវតុលាការកាត់ទោសជាប់គុក៩ឆ្នាំ
អ្នកសរសេរអត្ថបទរិះគន់រដ្ឋាភិបាលវៀតណាម តាមបណ្តាញអ៊ីនធើនែត ម្នាក់ទៀត ទើបតែត្រូវបានតុលាការវៀតណាម កាត់ទោសឲ្យជាប់ពន្ធនាគាររយៈពេល៩ឆ្នាំ ពីបទ ធ្វើការឃោសនាប្រឆាំងនឹងរដ្ឋាភិបាល។ ស្ត្រីម្នាក់នោះមានឈ្មោះថា ត្រាន់ ធីង៉ា អាយុ៣៩ឆ្នាំ។ នេះគឺជាអ្នករិះគន់រដ្ឋាភិបាលវៀតណាម ទីពីរហើយ ដែលត្រូវបានតុលាការវៀតណាម ចាប់ដាក់គុក ក្នុងរយៈពេលមិនដល់មួយខែចុងក្រោយនេះផង។
ចុះផ្សាយនៅថ្ងៃ៖ កែប្រែថ្ងៃទី៖
តុលាការវៀតណាម ខេត្តហាណាម បានបើកសវនាកាយ៉ាងតក់ក្រហល់ នៅថ្ងៃអង្គារទី ២៥កក្កដា ដើម្បីកាត់ទោសស្ត្រីឈ្មោះ ត្រាន់ ធីង៉ា ពីបទ ធ្វើសកម្មភាពឃោសនាប្រឆាំងនឹងរដ្ឋាភិបាល នៅតាមបណ្តាញអ៊ីនធើនែត។ លោក ហា ហ៊ុយសុន ដែលជាមេធាវីស្រ្តីជាប់ចោទ បានថ្លែងថា ទោស៩ឆ្នាំ ដែលតុលាការបានសម្រេចនេះ គឺជាទោសដ៏អយុតិ្តធម៌បំផុត។ ស្រ្តី ត្រាន់ ធីង៉ា ត្រូវបានអាជ្ញាធរវៀតណាម ចាប់ឃាត់ខ្លួន រយៈពេល៦ខែមកហើយ។
ដោយឡែក កាលពីថ្ងៃចន្ទកន្លងទៅនេះ អាជ្ញាធរវៀតណាម ទើបតែបានចាប់ឃាត់ខ្លួន បុរសម្នាក់ទៀត ឈ្មោះ ឌិញ លួង អាយុ៥១ឆ្នាំ ដោយចោទថាបានធ្វើសកម្មភាពចង់ផ្តួលរំលំរដ្ឋាភិបាល។ ការកាត់ទោសស្ត្រីឈ្មោះ ត្រាន់ ធីង៉ា ព្រមជាមួយនឹងការឃាត់ខ្លួនលោក ឌិញ លួង ក្នុងពេលថ្មីៗនេះ បានធ្វើឡើងមិនដល់មួយខែផងទេ ក្រោយពេលដែលតុលាការ វៀតណាម បានកាត់ទោសស្ត្រីម្នាក់ទៀតឈ្មោះ ង្វៀន ង៉ុក ញូគីញ ឲ្យជាប់គុក១០ឆ្នាំ។ ស្ត្រីម្នាក់នេះ ក៏ជាសកម្មជនសរសេរអត្ថបទរិះគន់ អាជ្ញាធរវៀតណាម តាមបណ្តាញសង្គមដែរ។
បើតាមការឲ្យដឹង ស្ត្រីឈ្មោះ ត្រាន់ ធីង៉ា និង ង្វៀន ង៉ុកញូគីញ សុទ្ធតែបានសរសេរលើទំព័រប្លុករបស់ពួកគេ រិះគន់ពីការធ្វេសប្រហែស ភាពអសកម្ម របស់អាជ្ញាធរវៀតណាម ទាក់ទិនទៅនឹងគ្រោះថ្នាក់មួយដែលបានកើតឡើង កាលពីខែមេសា ឆ្នាំ២០១៦។ គ្រោះថ្នាក់នោះ គឺរោងចក្ររបស់ចិនតៃវ៉ាន់ ឈ្មោះ Formosa Plastics បានបង្ហូរកាកសំណល់សារធាតុពុល ទៅក្នុងទឹកសមុទ្រនៅខេត្ត ហាទីញ ដែលបានធ្វើឲ្យងាប់ត្រីចិញ្ចឹមរាប់ពាន់ក្បាល នៅតាមឆ្នេរ ព្រមទាំងបំពុលទឹកសមុទ្រ ប្រវែងឆ្នេរ យ៉ាងហោច ២០០គីឡូម៉ែត្រ។
ក្រោយការកាត់ទោសដ៏ធ្ងន់ និងការចាប់ឃាត់ខ្លួន ផ្ទួនៗគ្នានេះ ត្រូវបានក្រុមអ្នកតវ៉ារិះគន់ នៅតាមបណ្តាញសង្គម រឺតាមទំព័រប្លុកនានា បានបន្តសរសេររិះគន់រដ្ឋាភិបាលវៀតណាមកាន់តែខ្លាំង។ គួរកត់សម្គាល់ថា ដោយសារតែ បណ្តាញព័ត៌មានផ្លូវការទាំងមូល មិនថាកាសែត វិទ្យុ ទូរទស្សន៍ ត្រូវស្ថិតក្នុងដៃរបស់បក្សកុម្មុយនីស្តិវៀតណាមនោះ អ្នកដែលចង់សម្តែងមតិរិះគន់ បានងៀកទៅប្រើប្រាស់ អ៊ីនធើនែត Facebook Twitter Instagram និងទំព័រប្លុក ដើម្បីសរសេរ សម្តែងការតវ៉ា រិះគន់ ទៅលើអំពើពុករលួយ ព្រមទាំងសកម្មភាពរំលោភបំពាន នានា របស់អាជ្ញាធរកុម្មុនីស្តិវៀតណាម។ រាល់ការតវ៉ា រិះគន់ អាចត្រូវបានគេចាត់ទុកថា ជាសកម្មភាពចង់ផ្តួលរំលំរដ្ឋាភិបាល ហើយដែលអាចប្រឈមមុខនឹងទោសជាប់ ពន្ធនាគារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ