រដ្ឋមន្ត្រីការពារជាតិអាមេរិកទៅហ្វីលីពីន ដើម្បីបង្កើតមូលដ្ឋានទ័ព
លោក អាហ្សតុន ការទឺ រដ្ឋមន្ត្រីក្រសួងការពារជាតិអាមេរិក កំពុងមានវត្តមានក្នុងប្រទេសហ្វីលីពីន ដើម្បីរៀបចំជាស្ថាពរនូវការដាក់តាំងមូលដ្ឋានទ័ពអាមេរិក ក្នុងប្រទេសនេះ សារជាថ្មី។ មូលដ្ឋានទ័ពចំនួន៥ នឹងត្រូវបើកឲ្យដំណើរការជាបឋម មុននឹងចាប់ផ្តើមបន្ថែមមូលដ្ឋានផ្សេងទៀត ក្នុងពេលខាងមុខ។ ការវិលត្រលប់ទៅកាន់ហ្វីលីពីនរបស់កងទ័ពអាមេរិក គឺជាការចង់បានរបស់ហ្វីលីពីន ដែលកំពុងតែព្យាយាមរកមធ្យោបាយការពារខ្លួន ទល់នឹងភាពក្អេងក្អាងរបស់មហាយក្សចិន ក្នុងតំបន់សមុទ្រចិនខាងត្បូង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៧
សហរដ្ឋអាមេរិក និងហ្វីលីពីនបានចុះហត្ថលេខាជាមួយគ្នា ដើម្បីអនុញ្ញាតិឲ្យបើកមូលដ្ឋានទ័ពចំនួន៥កន្លែង នៅហ្វីលីពីន សម្រាប់កងទ័ពអាមេរិក។ ក្រសួងការពារជាតិអាមេរិក បានបញ្ជាក់បន្ថែមថា ចំនួនមូលដ្ឋានទ័ពនឹងត្រូវបើកបន្ថែមឲ្យលើសនេះទៀត ក្នុងពេលខាងមុខ។
លោកអាហ្សតុន ការទឺ រដ្ឋមន្ត្រីក្រសួងការពារជាតិអាមេរិក កំពុងតែមានវត្តមាននៅហ្វីលីពីន ដើម្បីដាក់សម្ភោធកិច្ចព្រមព្រាងថ្មីនេះ។ នៅថ្ងៃព្រហស្បតិ៍ទី ១៤ មេសានេះ លោករដ្ឋមន្ត្រីនឹងអញ្ជើញទៅកាន់មូលដ្ឋានយោធាឈ្មោះ Antonio Bautista ដែលស្ថិតនៅលើកោះ Palawan ទល់មុខនឹងប្រជុំកោះ Spratleys។ លោកបានមានប្រសាសន៍ថា កោះ Palawan នេះគឺជាតំបន់យុទ្ធសាស្ត្រសម្រាប់ហ្វីលីពីន ដូច្នេះហើយទើបលោកបានមកដល់មូលដ្ឋានទ័ពនៅលើកោះនេះ មុនដំបូងគេបង្អស់។
គួរបញ្ជាក់ថា កោះ Palawanនេះឯង ស្ថិតនៅទល់មុខនឹងប្រជុំកោះ Spratleys ដែលជាប្រជុំកោះមានជម្លោះជាមួយចិន។ មួយឆ្នាំចុងក្រោយនេះ ចិនបានចាក់បំពេញខ្សាច់ នៅតាមចន្លោះកោះតូចៗ កសាងជាមូលដ្ឋានទ័ព និងព្រលានយន្តហោះ ដោយគ្មានរងចាំការកាត់សេចក្តីពីស្ថាប័នអន្តរជាតិណាទេ។ ហ្វីលីពីន នៅតែបន្តទាមទារថានេះជាការរំលោភបំពាន មកក្នុងដែនទឹករបស់ខ្លួន។ ដោយហេតុនេះហើយ ទើបហ្វីលីពីន អូសដៃកងទ័ពអាមេរិក ឲ្យមកតាំងមូលដ្ឋានក្នុងទឹកដីខ្លួន ដើម្បីបានជាបង្អែក។
សូមរំលឹកផងដែរថា កងទ័ពអាមេរិក បានដកចេញពីហ្វីលីពីន អស់ទាំងស្រុង ក្នុងរវាងទសវត្សឆ្នាំ១៩៩០។ ការវិលត្រលប់មកវិញនៃកងទ័ពអាមេរិកនាពេលនេះ គឺធ្វើឡើងតាមរយៈការបង្កើតមូលដ្ឋានទ័ព និងបេសកកម្មយាមល្បាតឃ្លាំមើល ដែលបានចុះក្នុងកិច្ចព្រមព្រាងសហប្រតិបត្តិការយោធា រវាងប្រទេសទាំងពីរ។ កិច្ចព្រមព្រាងនេះ បានចុះហត្ថលេខានៅឆ្នាំ២០១៤ ហើយទើបតែថ្មីៗនេះត្រូវបានតុលាការកំពូលហ្វីលីពីនសម្រេចយល់ព្រមផងដែរ។
ដោយឡែក ការចាប់ផ្តើមបើកមូលដ្ឋានយោធាថ្មីនេះ គឺធ្វើឡើងស្របពេលដែល ហ្វីលីពីន និងអាមេរិក កំពុងតែបិទបញ្ចប់សមយុទ្ធយោធារួមគ្នា ដែលមានឈ្មោះថា Balikatan ប្រែថា”ស្មាប្រកៀកស្មា” ។ សមយុទ្ធដែលបានចាប់ផ្តើម តាំងពីថ្ងៃទី៤មេសានេះ មានការចូលរួមពីទាហានអាមេរិកចំនួន៤៤០០នាក់ ទាហានហ្វីលីពីន៣០០០នាក់ និងទាហានអូស្ត្រាលី៨០នាក់ផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ