អាហ្វហ្កានីស្ថាន មិនទុកចិត្តលើគម្រោងកិច្ចព្រមព្រៀង រវាងអាមេរិកនិងក្រុមតាលីបង់
រដ្ឋាភិបាលអាហ្វហ្កានីស្ថាន បានសម្តែងការព្រួយបារម្ភ និងបានសុំឲ្យភាគីអាមេរិក ធ្វើការពន្យល់ឲ្យបានល្អិតល្អន់ ស្តីអំពីគម្រោងកិច្ចព្រមព្រៀង ដែលអាមេរិកបានចរចាជាមួយក្រុមតាលីបង់។ ជាគម្រោងកិច្ចព្រមព្រៀង ដែលអាមេរិក សន្យាដកទ័ពខ្លះ ចេញពីអាហ្វហ្កានីស្ថាន ហើយជាថ្នូរវិញ ក្រុមតាលីបង់សុខចិត្តកាត់បន្ថយការធ្វើសកម្មភាពវាយប្រហារ។ តែយ៉ាងណា សម្រាប់រដ្ឋាភិបាលអាហ្វហ្កានីស្ថាន ដែលមិនត្រូវបានគេហៅឲ្យចរចានោះ មានការបារម្ភថា ក្រុមតាលីបង់កំពុងតែលេងខ្សែលើ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៤
ប្រេសិតពិសេសរបស់អាមេរិក បានទៅដល់រដ្ឋធានីកាប៊ូល នៅដើមសប្តាហ៍នេះ ដើម្បីធ្វើការបង្ហាញប្រាប់ទៅរដ្ឋាភិបាលអាហ្វហ្កានីស្ថាន នូវលទ្ធផលចរចា រវាងអាមេរិក និងក្រុមតាលីបង់។ កិច្ចព្រមព្រៀងគោលមួយ ត្រូវបានភាគីទាំង២នេះ យល់ស្របគ្នា ដោយអាមេរិកសន្យាដកទ័ពមួយចំនួនធំ ហើយក្រុមតាលីបង់សន្យាកាត់បន្ថយការវាយប្រហារ ហើយនិងការពារកុំឲ្យក្រុមជីហាតភេរវកម្ម ធ្វើសកម្មភាព ដូចជាក្រុមអាល់កាយដាជាដើម។
ក៏ប៉ុន្តែភាគីអាហ្វហ្កានីស្ថាន បានសម្តែងការព្រួយបារម្ភច្រើន ទាក់ទិននឹងកិច្ចព្រមព្រៀងនេះ។ អ្នកនាំពាក្យប្រធានាធិបតីអាហ្វហ្កានីស្ថាន បានលើកឡើងថា អាហ្វហ្កានីស្ថានសោកស្តាយដែលខ្លួន មិនត្រូវបានគេរាប់បញ្ចូលក្នុងតុចរចា។ ដោយសុំឲ្យភាគីអាមេរិក បកស្រាយពន្យល់ឲ្យបានច្បាស់ អាហ្វហ្កានីស្ថានបារម្ភ ក្រែងថាអាមេរិកដកទ័ពចេញដោយតក់ក្រហល់ពេក ហើយថាក្រុមតាលីបង់ អាចនឹងមិនគោរពការសន្យា ហើយមិនសហការ ជាមួយរដ្ឋាភិបាលអាហ្វហ្កានីស្ថាន។
គួរបញ្ជាក់ថា យោងតាមព័ត៌មានខ្លះៗ ស្តីពីកិច្ចព្រមព្រៀងរវាងអាមេរិក និងក្រុមតាលីបង់នេះ គឺបានឲ្យដឹងថា ក្នុងដំណាក់កាលដំបូង ប្រមាណ១៣៥ថ្ងៃ អាមេរិកត្រូវដកទ័ពចេញពីមូលដ្ឋានចំនួន៥។ មានន័យថា ទ័ពអាមេរិកបច្ចុប្បន្ននៅអាហ្វហ្កានីស្ថាន ដែលមានប្រមាណ១៤០០០នាក់ នឹងនៅសល់តែ៨៦០០នាក់ប៉ុណ្ណោះ។ ចំណែកក្រុមតាលីបង់ សន្យាត្រឹមតែកាត់បន្ថយការវាយប្រហារ នៅតាមតំបន់ខ្លះ តែមិនបានសន្យាទម្លាក់អាវុធទាំងស្រុងនោះទេ។ ក្រុមតាលីបង់ ក៏បានសន្យាថានឹងបើកការចរចាសន្តិភាព ជាមួយរដ្ឋាភិបាលអាហ្វហ្កានីស្ថាន។
គួរកត់សំគាល់ថា ក្រោយដំណឹងនៃកិច្ចព្រមព្រៀងនេះ អតីតអគ្គរដ្ឋទូតអាមេរិកចំនួន៥នាក់ ដែលធ្លាប់បានបំពេញការងារនៅអាហ្វហ្កានីស្ថាន ក្រោយថ្ងៃ១១កញ្ញា ២០០១ បានរួមគ្នាធ្វើលិខិតមួយ សំដែងការព្រួយបារម្ភថា កិច្ចព្រមព្រៀងនេះអាចជាគ្រោះថ្នាក់សម្រាប់ស្ថិរភាពនៅអាហ្វហ្កានីស្ថាន។ លិខិតដដែល លើកឡើងថា ការដកទ័ពចេញគឺត្រូវធ្វើនៅពេលណា មានកិច្ចព្រមព្រៀងសន្តិភាពមួយជាក់លាក់ ជាមួយក្រុមតាលីបង់ធានា មិនមែនដកទ័ពចេញ ដោយគ្មានការធានាបែបនេះទេ។
គួរបញ្ជាក់ដែរថា គម្រោងកិច្ចព្រមព្រៀងនេះ នឹងត្រូវបញ្ជូនឲ្យលោកដូណាល់ ត្រាំពិនិត្យ។ សម្រាប់ពេលនេះ ក្រុមតាលីបង់នៅតែបន្តធ្វើភេរវកម្មដដែល។ កាលពីថ្ងៃចន្ទទី ២កញ្ញា ក្រុមតាលីបង់បានបំផ្ទុះគ្រាប់បែក នៅសង្កាត់ដែលសំបូរដោយអង្គការក្រៅរដ្ឋាភិបាល ក្នុងរដ្ឋធានីកាប៊ូល ដោយបានផ្តាច់ជីវិតមនុស្ស១៦នាក់ និងរបួស១២០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ