ឥណ្ឌូណេស៊ីបិទបញ្ចប់ឆ្នាំ២០១៥ ជាមួយនឹងការគម្រាមកំហែងរបស់ក្រុមជីហាដអ៊ីស្លាម
ឥណ្ឌូណេស៊ី ប្រទេសកាន់សាសនាអ៊ីស្លាម ដ៏ធំជាងគេលើលោក។ ថ្វីត្បិតតែនៅឆ្ងាយពីតំបន់ដើមបូព៌ា ទីមូលដ្ឋានកណ្តាល របស់ក្រុមជីហាដអ៊ីស្លាមជ្រុលនិយម តែឥណ្ឌូណេស៊ី កំពុងតែជួបបញ្ហាកាន់តែធ្ងន់ធ្ងរ ដោយសារចំនួនអ្នកងុបងុលនឹងជំនឿជ្រុលនិយមជីហាដអ៊ីស្លាមនេះ បានកើនឡើងកាន់តែខ្លាំង។ កាលពីដើមសប្តាហ៍នេះ អាជ្ញាធរឥណ្ឌូណេស៊ី បានចេញប្រតិបត្តិការចាប់ខ្លួន ដៃជើងក្រុមជីហាដអ៊ីស្លាម ចំនួន៩នាក់ ដែលពួកវា មានគម្រោងរៀបចំធ្វើភេរវកម្ម ជាច្រើនកន្លែង នៅក្នុងឱកាសបុណ្យណូអែល និងបុណ្យឆ្លងឆ្នាំសកល។ នៅថ្ងៃសៅរ៍នេះ នគរបាលឥណ្ឌូណេស៊ី កំពុងតាមប្រម៉ាញ់ មេក្លោងដ៏ធំម្នាក់ ឈ្មោះ សាន់តូសូ ហើយដាក់កំហិតឲ្យជននេះ ប្រគល់ខ្លួន មុនថ្ងៃ៩មករា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:៤៥
បើនិយាយពីថា ក្រុមជីហាដអ៊ីស្លាម អាចបង្កគ្រោះថ្នាក់កំរិតណា នៅឥណ្ឌូណេស៊ី គឺថាយើងមិនអាចធ្វេសប្រហេស លេងសើចបានទេ។ ព្រោះថានេះ មិនមែនជាលើកទីមួយទេ ដែលក្រុមជីហាដអ៊ីស្លាមនេះ បានធ្វើភេរវកម្ម នៅឥណ្ឌូណេស៊ី។ ហើយមួយវិញទៀត ក្រុមនេះកំពុងតែអូសទាញមនុស្ស ឲ្យដើរតាមពួកវា បានកាន់តែច្រើន។ កន្លងមក ក្រុមនេះធ្លាប់ធ្វើភេរវកម្មច្រើនដងមកហើយ។ នៅឆ្នាំ២០០២ ភេរវកម្មនៅបាលី ស្លាប់មនុស្សជាង២០០នាក់។ ឆ្នាំ២០០៣ ឆ្នាំ២០០៩ មានភេរវកម្មដាក់គ្រាប់បែបបន្តបន្ទាប់ទៀត នៅហ្សាកាតា។
ចាប់បាន៩នាក់ ជាភេរវករកំពុងត្រៀមដាក់គ្រាប់បែក៖
សកម្មភាពបោសសម្អាតបណ្តញពួកនេះ ដែលអាជ្ញាធរឥណ្ឌូណេស៊ី បានធ្វើនាពេលថ្មីៗនេះ គឺត្រូវបានគេទទួលស្គាល់ថា មានប្រសិទ្ធិភាពគ្រាន់បើ។ បើយោងតាមការបញ្ជាក់ ពីអ្នកនាំពាក្យនគរបាលជាតិឥណ្ឌូណេស៊ី ពួកគេបានចាប់បានក្រុមភេរវករចំនួន៩នាក់។ យោងតាមភស្តុតាង ផ្សេងដែររឹបអូសបាន គឺពួកភេរវករទាំងនោះ កំពុងរៀបចំធ្វើភេរវកម្មជាច្រើនកន្លែង ជាពិសេស នៅលើកោះហ្សាវ៉ាតែម្តង។ នគរបាលបានរឹបអូសបាន សារធាតុគីមី ដើម្បីផលិតគ្រាប់បែកជាច្រើន ព្រមទាំងសៀវភៅក្បួនមាគ៌ាជីហាដ ជាច្រើនក្បាលផងដែរ។ ការធ្វើប្រតិបត្តិការប្រម៉ាញ់ បានទាន់ពេលវេលាបែបនេះ ក៏ដោយសារ មានការផ្តល់ព័ត៌មានជាសម្ងាត់ ពីសំណាក់បណ្តាញស៊ើបការណ៍ របស់អាមេរិក និងអូស្ត្រាលី។
តាមការសន្និដ្ឋាន របស់ប៉ូលីសឥណ្ឌូណេស៊ី ក្រុមនេះមានគម្រោង ដាក់គ្រាប់បែក នៅតាមទីតាំងមួយចំនួន ដូចជា នៅវិហារម៉ូស្កេ របស់ពួកអ៊ីស្លាមឈីអ៊ីត នៅតាមតំបន់ទេសចរ ដែលមានពួកបរទេសច្រើន និងនៅកន្លែងកម្សាន្តសប្បាយ ក្នុងឱកាសបុណ្យណូអែល និងបុណ្យឆ្លងឆ្នាំសកលនេះតែម្តង។ កងកម្លាំងប្រមាណជា ១សែន ៥ម៉ឺននាក់ ត្រូវបានដាក់ពង្រាយដើម្បីការពារសន្តិសុខ ជាពិសេសនៅតាមកន្លែង ដែលមានការជួបជុំគ្នា រវាងសហគមក្រុមអ្នកកាន់សាសនាកាតូលិក នៅឥណ្ឌូណេស៊ី។
ចាប់បានតែកូនចៅ នៅឡើយមេធំ៖
មនុស្សទាំង៩នាក់ ដែលត្រូវបានចាប់ខ្លួននេះ ជាបណ្តាញរបស់ក្រុមជីហាដអ៊ីស្លាមីយ៉ាស ដែលពីមុនជាកូនចៅរបស់ក្រុមអាល់កាអ៊ីដា តែឥឡូវក្រុមនេះក៏ប្រកាសខ្លួនថាដើរតាមមាគ៌ារបស់ក្រុមជីហាដអង្គការរដ្ឋអ៊ីស្លាមដែរ។ តែអ្នកដែលត្រូវបានចាប់ខ្លួន គឺសុទ្ធតែជាកូនចៅតូចតាចតែប៉ុណ្ណោះ។ មេធំរបស់ពួកវា គេនៅមិនទាន់ចាប់បាននៅឡើយទេ ហើយថាមិនត្រូវ ពួកវាអាចកំពុងតែបញ្ជា ឲ្យធ្វើភេរវកម្មផ្សេងទៀតជាមិនខាន។
មេក្លោងដ៏ធំឈ្មោះ សាន់តូសូ វាប្រកាសខ្លួនវា ថាជាមេក្រុមជីហាដអង្គការរដ្ឋអ៊ីស្លាម ប្រចាំនៅឥណ្ឌូណេស៊ីតែម្តង។ កាលពីមុនមនុស្សនេះ គឺស្ថិតនៅក្នុងក្រុមជីហាដអ៊ីស្លាមីយ៉ាស។ គេធ្លាប់លឺឈ្មោះវាយូរហើយ ទើបតែនៅឆ្នាំ២០១៣ គេបានឃើញមុខជននេះ នៅតាមវីដេអូមួយ ដែលពួកជីហាដបានបង្ហោះផ្សាយ។
តាមចាប់ សាន់តូសូ ដូចរាវម្ជុលក្នុងបាតសមុទ្រ៖
យើងដឹងហើយថា ឥណ្ឌូណេស៊ីជាប្រទេសដ៏ធំជាងគេ ដែលកាន់សាសនាអ៊ីស្លាម បើយើងនិយាយពីចំនួនប្រជាជន។ ក៏ប៉ុន្តែមិនមានមានន័យថា ឲ្យតែប្រជាជនឥណ្ឌូណេស៊ី សុទ្ធតែជាអ្នកគាំទ្រក្រុមជីហាដជ្រុលនិយមទាំងអស់នោះទេ។ ជនឈ្មោះ សាន់តូសូនេះ ជាមេក្រុមជ្រុលនិយម ហើយក៏ជាមនុស្សទីមួយនៅឥណ្ឌូណេស៊ី ដែរ ដែលប្រកាសខ្លួនដើរតាមមាគ៌ារបស់ក្រុមជីហាដអង្គការរដ្ឋអ៊ីស្លាម ដែលកំពុងតែធ្វើសង្រ្គាមនៅស៊ីរី និងអ៊ីរ៉ាក់។
រហូតមកដល់ឥឡូវនេះ គេមិនដឹងថា ជននេះលាក់ខ្លួននៅកន្លែងណាទេ។ ឥណ្ឌូណេស៊ីធំណាស់ សំបូរកោះដាច់ស្រាយ៉ាល និងព្រៃឈើ ដូច្នេះការតាមប្រម៉ាញ់ជននេះ មិនមែនជាការងាយស្រួលទេ។ ហើយបើទោះជាជននេះ នៅចម្ងាយរាប់រយគីឡូម៉ែត្រ ពីក្រុងហ្សាកាតា ក៏ដោយ ក៏ជននេះអាចបញ្ជា និងប្រើឥទ្ធិពលពង្វក់កូនចៅវា បានដែរ។ កន្លងមកគេបានឃើញជននេះ សកម្មណាស់នៅតាមបណ្តាញអ៊ីនធើនែត ដោយបានបង្ហោះផ្សាយវីដេអូ អូសទាញ ពង្វក់ស្មារតីអ្នកកាន់សាសនាអ៊ីស្លាម ដែលមានទំនោរជ្រុលនិយម។
អង្គការរដ្ឋអ៊ីស្លាម ប្រើលុយ និងប្រព័ន្ធអ៊ីនធើនែត ដើម្បីពង្វក់មនុស្ស៖
នៅសម័យទំនើបបច្ចុប្បន្ននេះ ពិភពលោកយើង លែងមានព្រំដែនហើយ។ ជាមួយនឹងបណ្តាញអ៊ីនធើណែត មនោគមវិជ្ជានិមួយៗអាចរីកសាយភាពបានយ៉ាងងាយ ហើយមនុស្សដែលល្ងង់ ស្មារតីទន់ខ្សោយតែងតែជាចំណី នៃការងុបងុល ទៅតាមការអូសទាញ។ នេះជាភាពងាយស្រួលមួយ របស់ក្រុមជីហាដអង្គការរដ្ឋអ៊ីស្លាម ក្នុងការពង្រីកឥទ្ធិពលពួកវា។
ចំណុចមួយទៀត គឺតាមរយៈការបញ្ជូនលុយ ទៅឧបត្ថម្ភ។ ការបញ្ជូនលុយនេះ អាចធ្វើដោយត្រង់ៗ ដើម្បីចាយវាយ ជួយទិញអាវុធដើម្បីធ្វើសកម្មភាព រឺតាមរយៈជាជំនួយដើម្បីជួបបណ្តុះបណ្តាល ក្នុងន័យមនុស្សធម៌សាសនា។ ជំនួយក្នុងន័យមនុស្សធម៌សាសនានេះហើយ ដែលគ្រោះថ្នាក់ ព្រោះវាចាក់ឬសបន្តិចម្តងៗ នៅក្នុងបណ្តាក្មេងជំនាន់ក្រោយ តាមរយៈការបង្ហាត់បង្រៀន ផ្សព្វផ្សាយ ពីជំនឿជ្រុលនិយម។ ឥណ្ឌូណេស៊ី បានទទួលជំនួយច្រើនណាស់ ពីប្រទេសអារ៉ាប់ធំៗ ដើម្បីអភិវឌ្ឍន៍វិស័យសាសនា កសាងវិហារម៉ូស្កេ បង្រៀនក្មេងឲ្យប្រកាន់ខ្ជាប់ក្បួនខ្នាតអ៊ីស្លាមជាដើម។
ឥណ្ឌូណេស៊ី ទឹកដល់ច្រមុះ៖
ប៉ូលីសឥណ្ឌូណេស៊ី បានរកឃើញថា ក្រុមរបស់ជនសាន់តូសូនេះ ធ្លាប់បានទទួលលុយ ពីក្រុមជីហាដអង្គការរដ្ឋអ៊ីស្លាមដោយផ្ទាល់ ជាច្រើនលើក។ មនោគមវិជ្ជារបស់ក្រុមជីហាដអង្គការរដ្ឋអ៊ីស្លាម គឺពង្រីកឥទ្ធិពលរបស់វា ឲ្យបានពាសពេញពិភពលោក។ ឥណ្ឌូណេស៊ី ជាប្រទេសមួយសំខាន់ណាស់ ព្រោះមានអ្នកកាន់សាសនាអ៊ីស្លាម ច្រើនលើសលុប ហើយមួយទៀត មានភូមិសាស្ត្រធំទូលាយ ដាច់ស្រយ៉ាល ដែលអំណាចកណ្តាលរបស់រដ្ឋ មិនអាចគ្រប់គ្រងបានទាំងអស់ទេ។
តាមការសន្និដ្ឋាន បច្ចុប្បន្ននេះ មានជនជាតិឥណ្ឌូណេស៊ី យ៉ាងហោចណាស់ ក៏៣០០នាក់ដែរ ដែលកំពុងតែបំរើក្រុមជីហាដអង្គការរដ្ឋអ៊ីស្លាមនៅស៊ីរី។ ហើយនៅក្នុងប្រទេសឥណ្ឌូណេស៊ីវិញ គឺមានពួកដែលជាកូនចៅរបស់ក្រុមនេះ យ៉ាងហោចណាស់ ក៏១០០០នាក់ដែរ។ ចំនួននេះនឹងកើនឡើងទៅទៀត ព្រោះរដ្ឋាភិបាលឥណ្ឌូណេស៊ី ហាក់ដូចជាគ្មានគោលនយោបាយទប់ស្កាត់ ឲ្យបានត្រឹមត្រូវទេ។ អ្នកដែលធ្លាប់ទៅស៊ីរី ត្រឡប់មកវិញ អូសទាញមនុស្សក្នុងស្រុក បានយ៉ាងងាយ ដោយគ្មានការត្រួតពិនិត្យទេ។
ដូច្នេះ ពេលនេះឥណ្ឌូណេស៊ី អាចទប់ស្កាត់ភេរវកម្មបានមួយរយៈមែន ក៏ប៉ុន្តែក្រុមនេះ កំពុងពង្រីកបណ្តាញយ៉ាងធំ ហើយអាចធ្វើភេរវកម្ម គ្រប់ពេលទាំងអស់។ ហើយប្រទេសក្បែរខាងឥណ្ឌូណេស៊ីក្នុងតំបន់អាស៊ីអាគ្នេយ៍ ក៏ត្រូវត្រៀមលក្ខណៈប្រុងប្រយត្ន័ដែរ អំពីចលនាអ៊ីស្លាមជ្រុលនិយមប្រភេទនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ