ឥណ្ឌា និងប៉ាគីស្តង់ព្រមសន្ទនាជាមួយគ្នាឡើងវិញ
នាយករដ្ឋមន្ត្រីឥណ្ឌា ម៉ាន់ ម៉ូហាន់ ស៊ីន (Manmohan Singh) និងនាយករដ្ឋមន្រ្តីប៉ាគីស្តង់រ៉ាហ្សា ហ្ស៊ីឡានី (Raza Gilani) បានជួបគ្នា នៅថ្ងៃព្រហស្បិ៍ទី២៩មេសានេះ នៅប្រទេសប៊ូតង់។ ជំនួបដែលប្រព្រឹត្តទៅ នៅក្រៅក្របខណ្ឌនៃជំនួបកំពូលសមាគមន៍ប្រជាជាតិអាស៊ីខាងត្បូង មានគោលដៅមួយច្បាស់ នោះគឺ ធ្វើយ៉ាងណាឲ្យមានកិច្ចចរចាសន្តិភាពជាមួយគ្នាឡើងវិញ រវាងឥណ្ឌា និងប៉ាគីស្តង់។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ តាន់ ហ្សង់-ហ្វ្រង់ស័រ
ប្រទេសបងប្អូនគូសត្រូវទាំងពីរ បានផ្អាកការចរចាសន្តិភាព តាំងពីខែវិច្ឆិកាឆ្នាំ២០០៨ គឺក្រោយពីមានភេរវកម្មនៅទីក្រុង ប៊ុំបៃ(Bombay) ដែលកាលណោះ ឥណ្ឌាបានចោទថា ជាស្នាដៃរបស់ក្រសួងស៊ើបការណ៍សម្ងាត់ប៉ាគីស្តង់។
យ៉ាងណាមិញ ជំនួបរវាងលោកនាយករដ្ឋមន្ត្រីឥណ្ឌា និងលោកនាយករដ្ឋមន្ត្រីប៉ាគីស្តង់នៅធីមហ៊្វូ(Thimphu) ប្រទេសប៊ូតង់ថ្ងៃនេះ ក៏បានប្រព្រឹត្តទៅក្នុងបរិបទមួយតានតឹងដែរ។ ពីព្រោះ កាលពីថ្ងៃអង្គារទី២៧មេសាកន្លងទៅ អាជ្ញាធរឥណ្ឌាបានចាប់ខ្លួនអ្នកការទូតរបស់ខ្លួនម្នាក់ដែលធ្វើការនៅស្ថានទូតឥណ្ឌា ក្នុងទីក្រុងអ៊ីស្លាម៉ាបាត(Islamabad) ប្រទេសប៉ាគីស្តង់។ ឥណ្ឌាចោទមន្រ្តីរូបនេះ ថាបានផ្តល់ព័ត៌មានទៅឲ្យក្រសួងស៊ើបការណ៍សម្ងាត់ប៉ាគីស្តង់។
ដើមដំបូង គេបារម្ភក្រែងរឿងអាស្រូវចារកិច្ចនេះ បង្កជាឧបសគ្គមួយថ្មីសម្រាប់កិច្ចចរចា សន្តិភាពរវាងប្រទេសទាំងពីរ ដែលបានធ្វើសង្គ្រាមនឹងគ្នាអស់បីលើករួចមកហើយ តាំងពីឆ្នាំ១៩៤៧មក។ នៅទីបំផុត ជំនួបរវាងនាយករដ្ឋមន្ត្រីឥណ្ឌា និងនាយករដ្ឋមន្រ្តីប៉ាគីស្តង់បានប្រព្រឹត្តទៅរលូនល្អ ហើយភាគីទាំងពីរសន្យាថា នឹងជួបគ្នាជាថ្មី នាពេលឆាប់ៗខាងមុខ ដើម្បីកំណត់របៀបបែបបទនៃកិច្ចចរចាសន្តិភាព។
កាលពីខែកុម្ភៈកន្លងទៅនេះ ប្រទេសគូសត្រូវទាំងពីរបានសាកល្បងផ្តើមកិច្ចចរចាជាមួយគ្នាឡើងវិញ ត្រឹមថ្នាក់រដ្ឋមន្ត្រីក្រសួងការបរទេស រួចម្តងទៅហើយ។ តែគ្មានបានផលអ្វីទាំងអស់។ កាលណោះ ប៉ាគីស្តង់ចង់បានការចរចាទាំងស្រុងមួយឡើងវិញ រីឯឥណ្ឌាវិញ ដាក់លក្ខខណ្ឌឲ្យប៉ាគីស្តង់ចាប់ខ្លួនអ្នកបង្កភេរវកម្មនៅទីក្រុងប៊ុំបៃឲ្យបានសិន រួចហើយចាំ ការចរចាសន្តិភាពជាមួយគ្នាឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ