ទីក្រុងប៉េកាំងអនុញ្ញាតឲ្យចេញផ្សាយរបាយការណ៍ទិតៀនរបស់FMIស្តីពីសេដ្ឋកិច្ចចិន
ជាលើកទីមួយចាប់តាំងពីឆ្នាំ២០០៦មក ទីក្រុងប៉េកាំងបានអនុញ្ញាតឲ្យចេញផ្សាយនៅថ្ងៃទី២៩កក្កដាម្សិលមិញ នូវរបាយការណ៍ទិតៀនរបស់មូលនិធិរូបិយវត្ថុអន្តរជាតិFMIស្តីពី សេដ្ឋកិច្ចចិន។ ក៏ប៉ុន្តែគេកត់សម្គាល់ឃើញមានការខ្វែងទស្សនៈនឹងគ្នារវាងមូលនិធិ រូបិយវត្ថុអន្តរជាតិFMIនឹងទីក្រុងប៉េកាំងពាក់ព័ន្ធនឹងនយោបាយនៃ អត្រាប្តូរប្រាក់យ័នចិន។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ សៀក សារិន
សម្រាប់មូលនិធិរូបិយវត្ថុអន្តរជាតិFMI អត្រាប្តូរប្រាក់យ័នចិនគឺជាសោគន្លឹះយុទ្ធសាស្ត្រសម្រាប់ឲ្យទីក្រុងប៉េកាំងមានលទ្ធភាពធ្វើឲ្យសេដ្ឋកិច្ចចិនកាន់តែស្គាល់ការល្អប្រសើរឡើង។ ក៏ប៉ុន្តែមួយខែកន្លះក្រោយពីបានប្រកាសឲ្យដឹងពីការបន្ទន់នយោបាយនៃអត្រាប្តូរប្រាក់យ័នចិន ទីក្រុងប៉េកាំងនៅតែបន្តក្តោបក្តាប់ត្រួតត្រាយ៉ាងហ្មត់ចត់ទៅលើចលនានៃរូបិយប័ណ្ណរបស់ខ្លួន។ គេសម្គាល់ឃើញប្រាក់យ័នចិនបានកើនឡើងថ្លៃប្រមាណតិចជាង១%នៅចំពោះមុខប្រាក់ដុល្លារអាមេរិក។
ទាំងនេះជាកាយវិការមួយពុំគ្រប់គ្រាន់ឡើយសម្រាប់អ្នកឯកទេសនៃមូលនិធិរូបិយវត្ថុអន្តរជាតិFMI ហើយនិងសម្រាប់ប្រទេសលោកខាងលិចមួយចំនួន។ ដោយពួកគេយល់ឃើញថា ប្រាក់យ័នចិននៅតែមានតម្លៃថោកជ្រុលពេកនៅចំពោះមុខប្រាក់ដុល្លារអាមេរិកនិងនៅចំពោះមុខប្រាក់អឺរ៉ូ។ ប៉ុន្តែ ទីក្រុងប៉េកាំងបានបដិសេធពុំទទួលយកទស្សនៈបែបនេះឡើយ។ រដ្ឋាភិបាលចិនវិញយល់ថា ការសល់ផលនៃជញ្ជីងទូទាត់សរុបរបស់ប្រទេសចិនមានចំនួនពាក់កណ្តាលតិចជាងការប្រមាណរបស់មូលនិធិរូបិយវត្ថុអន្តរជាតិFMI។
របាយការណ៍របស់FMIបានប្រាប់ឲ្យដឹងទៀតថា “ Bulle " បំប៉ោងទិញលក់កេងយកចំណេញក្នុងវិស័យអចលនទ្រព្យកំពុងតែកើតមាននៅប្រទេសចិន។ មូលនិធិរូបិយវត្ថុអន្តរជាតិFMIបានអំពាវនាវឲ្យទីក្រុងប៉េកាំងមានការប្រុងប្រយ័ត្នក្នុងបញ្ហានេះ ហើយជំរុញឲ្យប្រទេសចិនរិះរកសមតាសម្រាប់កំណើនសេដ្ឋកិច្ចរបស់ខ្លួន។ ហើយទាំងនេះជាការពិតដែលកំណើនសេដ្ឋកិច្ចចិនពឹងផ្អែកទៅលើការនាំចេញនិងការបោះទុនធ្វើវិនិយោគច្រើនជាងសកម្មភាពសេដ្ឋកិច្ចនៃការទិញដូរហូបចុកផ្ទៃក្នុង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ