យោធាតាដហ្ស៊ីគីស្តង់ ធ្លាក់ខ្លួនស្លាប់ អាចដល់៤០នាក់ដោយត្រូវទ័ពព្រៃលួចស្ទាក់បាញ់
យោងទៅលើក្រសួងការពារជាតិតាដហ្ស៊ីគីស្តង់ ការវាយប្រហារនេះ ប្រហែលធ្វើ ដោយក្រុមប្រដាប់អាវុធខុសច្បាប់ នៃអតីតប្រធានកងប្រយុទ្ធនោះឈ្មោះ Abdullo ដែលទោះបី ក្រោយពីមានចុះកិច្ចព្រមព្រៀងឈប់បាញ់ ខ័ណ្ឌបញ្ចប់សង្គ្រាមស៊ីវិលកាលពី១៣ឆ្នាំមុនក្តីក៏ នៅតែប្រកែក មិនសុខចិត្តទំលាក់អាវុធ ហើយនៅតែបន្តច្បាំងទល់នឹងកងទ័ពរដ្ឋាភិបាល។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ កែវ ឆាយា
សាច់រឿងដែលមាន គឹថា អស់ប៉ុន្មានថ្ងៃជាប់មកហើយ ដែលកងទ័ពតាដហ្ស៊ីគីស្តង់ វាត ប្រតិបត្តិការស្វែងរកចាប់មកវិញ ពួកអ្នកទោសដ៏សែនគ្រោះថ្នាក់ចំនួន ២៥នាក់ ក្នុងនោះមាន ទាំងជាតិរុស្ស៊ី ៦នាក់ និងជាតិអាហ្វហ្កានីស្តង់ ៤នាក់ផង ដែលកាលពីខែមុន ក្រោយពីបាញ់សម្លាប់ឆ្មាំគុក សរុបទៅអស់ ៧នាក់ ក៏ចេះលួចរត់ចេញពីពន្ធនាគារលេខ១ ដែលល្បីដោយ វិន័យតឹងរ៉ឹងបំផុត នៃក្រុង Douchanbe រដ្ឋធានី តាដហ្ស៊ីគីស្តង់។ ជន២៥នាក់នោះ គេលួចរត់ គឺរំលងតែ៤ថ្ងៃសោះ ក្រោយពីបានត្រូវតុលាការកាត់ទោសគេ ឲ្យជាប់គុកម្នាក់ៗរហូតដល់៣០ឆ្នាំឯណោះ ចំពោះការប៉ុនប៉ង ធ្វើរដ្ឋប្រហារ កាលពីខែកក្កដាឆ្នាំទៅមិញ។
ក្នុងក្របខ័ណ្ឌប្រតិបត្តិការនេះ រសៀលម្សិលមិញ យោធានៃកងទ័ពតាដហ្ស៊ីគីស្តង់ មានគ្នា៧៥នាក់ ដោយជិះឡាន Camion ប៉ុន្មានគ្រឿង ពេលទើបបើកចេញផុត ពីជ្រលងភ្នំ នៅចម្ងាយប្រមាណ ២០០គ.ម. ខាងកើតពីរដ្ឋធានី Douchanbe ស្រាប់តែអភ័ព្វ ធ្លាក់ក្នុងអង្គប់ស្ទាក់បាញ់ នៃក្រុមពួកឧទ្ទាម ពួកដែលបានបាញ់ស្រោចយ៉ាងចាស់ដៃទៅលើគេ ចេញពីកាំភ្លើងយន្តផង កាំភ្លើងត្បាល់ផង ទាល់តែផ្តាច់ជីវិតគេ បើតាមតួលេខ នៃ ទីភ្នាក់ងារពត៌មាន “ Asia Plus “ គឺអស់ ៤០នាក់ឯណោះ ពីក្នុងនោះ នាយទាហានស័ក្តិខ្ពស់ៗ គឺ៥នាក់។ ប៉ុន្តែ រដ្ឋាភិបាលតាដហ្ស៊ីគីស្តង់ផ្ទាល់ ទទួលស្គាល់ថា មានស្លាប់ត្រឹមតែ២៣នាក់។ គួរនិយាយថា ជ្រលងភ្នំនោះ ស្ថិតនៅជើងភ្នំ Pamir ជាភ្នំដែលខ័ណ្ឌដែនដីតាដហ្ស៊ីគីស្តង់ ពី មហាប្រទេសចិនដីគោក។
ប្រភពក្នុងរដ្ឋាភិបាលតាដហ្ស៊ីគីស្តង់ មិនបដិសេធឡើយថា ការវាយប្រហារទៅលើ ក្បួនឡានទ័ពនៃក្រសួងការពារជាតិ គឺអាចធ្វើ ដោយក្រុមប្រដាប់អាវុធនៃឈ្មោះ Abdullo មេដឹកនាំម្នាក់ ខាងបក្សប្រឆាំងដែលមិនព្រមសម្រុះសម្រួលទេ ទោះបីតាំងពី១៣ឆ្នាំមុនម៉្លេះ មានចុះទៅហើយក្តី កិច្ចព្រមព្រៀងឈប់បាញ់ ដែលខ័ណ្ឌបញ្ចប់សង្គ្រាមស៊ីវិលឆាបឆេះ ពីឆ្នាំ១៩៩២ ដល់១៩៩៧។ តាមដំណឹងដែលមាន ឈ្មោះ Abdullo នេះ ក្រោយពីបក្សប្រឆាំងរបស់ខ្លួន បានទទួលបរាជ័យនៅ Tadjikistan មក ក៏បានរត់ទៅច្បាំង នៅខាងពួក Talibans ក្នុងប្រទេស Afghanistan ជិតខាង បន្ទាប់មក ថែមទាំងត្រូវចាប់ខ្លួនបាន ដោយកងទ័ពរបស់បក្សសម្ព័ន្ធ OTAN ទៅផង ប៉ុន្តែ គេមិនដឹង តើមកពីមូលហេតុអ្វីដែលជននេះ នៅតែមានសេរីភាពដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ