ទំនាក់ទំនងចិន-ឥណ្ឌា
លោកនាយករដ្ឋមន្ត្រីចិនWen Jiabao បានបញ្ជូននៅថ្ងៃសុក្រនេះនូវសញ្ញាមួយដ៏វិជ្ជមានទៅកាន់ប្រទេសឥណ្ឌា ដោយបានថ្លែងថា ពិភពលោកយើងនេះមានទំហំដ៏សែនធំទូលំទូលាយសម្រាប់មហាប្រទេសកំពុងអភិវឌ្ឍន៍ពីរអាចរួមរស់និងធ្វើសហប្រតិបត្តិការ។ ប្រទេសឥណ្ឌាដែលលោក Wen Jiabaoត្រូវអញ្ជើញទៅធ្វើទស្សនកិច្ចនៅខែធ្នូខាងមុខនេះ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ សៀក សារិន
ទោះបីជា មហាប្រទេសកំពុងអភិវឌ្ឍន៍ទាំងពីរ ពោលគឺចិននិងឥណ្ឌាបានធ្វើការដោះដូរពាណិជ្ជកម្មនឹងគ្នាយ៉ាងសែនសកម្មរហូតដល់ទៅមានបរិមាណគុណនឹង៣០ដងក្នុងរយៈពេលតែ១០ឆ្នាំក៏ដោយ ក៏មហាយក្សអាស៊ីទាំងពីរនៅតែមានទំនាក់ទំនងពុំល្អនឹងគ្នា។ តើទាំងនេះ បណ្តាលមកពីមូលហេតុអ្វី?
មូលហេតុចម្បងមានពីរ៖
ទី១-មហាប្រទេសចិននិងមហាប្រទេសឥណ្ឌាមានអធិករណ៍ព្រំដែននឹងគ្នាជាយូរមកហើយ។
ទី២-មហាយក្សអាស៊ីទាំងពីរកំពុងប្រកួតប្រជែងគ្នាដណ្ដើមចង់បានឋានៈជាអ្នកនាំមុខនៃក្រុមប្រទេសមហាអំណាចកំពុងអភិវឌ្ឍន៍។
នាឱកាសជំនួបក្រៅក្របខ័ណ្ឌនៃកិច្ចប្រជុំអាស៊ី-ប៉ាស៊ីហ្វិកនៅទីក្រុងហាណូយ លោកនាយករដ្ឋមន្ត្រីចិនWen Jiabaoបានថ្លែងទៅកាន់លោកនាយករដ្ឋមន្ត្រីឥណ្ឌាថា៖”ពិភពលោកយើងនេះមានទំហំដ៏សែនធំទូលំទូលាយសម្រាប់មហាប្រទេសកំពុងអភិវឌ្ឍន៍ពីរពោលគឺចិននិងឥណ្ឌាអាចរួមរស់និងធ្វើសហប្រតិបត្តិការនឹងគ្នា”។
គួរកត់សម្គាល់ថា លោកនាយករដ្ឋមន្ត្រីចិនWen Jiabaoនឹងត្រូវអញ្ជើញទៅធ្វើទស្សនកិច្ចនៅប្រទេសឥណ្ឌានៅចុងឆ្នាំនេះ។ បើយោងតាមសារព៌តមានឥណ្ឌា ប្រហែលជាអាចប្រព្រឹត្តទៅនៅខែធ្នូ បានសេចក្តីថា នៅប៉ុន្មានសប្តាហ៍ប៉ុណ្ណោះក្រោយការអញ្ជើញមកធ្វើទស្សនកិច្ចរបស់លោកប្រធានាធិបតីអាមេរិកបារ៉ាក់អូបាម៉ានៅទីក្រុងញីវដែលី។
អ្នកសង្កេតការណ៍ខ្លះយល់ថា ការអញ្ជើញមកធ្វើទស្សនកិច្ចរបស់លោកប្រធានាធិបតីអាមេរិកបារ៉ាក់អូបាម៉ានៅប្រទេសឥណ្ឌានេះគឺធ្វើឡើងដើម្បីទប់ទល់នឹងអានុភាពនិងឥទ្ធិពលរបស់ប្រទេសចិនដែលបានកើនកាន់តែខ្លាំងឡើងៗនៅអាស៊ី ហើយដែលបានបណ្តាលឲ្យប្រទេសឥណ្ឌាកើតមានក្តីបារម្ភ។
សូមបញ្ជាក់ថា ប្រទេសចិនធ្លាប់បានដណ្តើមយកជោគជ័យលើប្រទេសឥណ្ឌាក្នុងវិស័យយោធានៅឆ្នាំ១៩៦២ ហើយប្រទេសទាំងពីរនៅតែបន្តមានអធិករណ៍ព្រំដែននឹងគ្នាទៀត។ ព្រំដែនចិន-ឥណ្ឌាដែលមានប្រវែងប្រមាណ៣ ៥០០គីឡូម៉ែត្រ។ ចំណែកឯវត្តមានរបស់សម្តេចសង្ឃដាឡៃឡាម៉ានៅប្រទេសឥណ្ឌាក៏ជាមូលហេតុមួយទៀតនៃភាពតានតឹងរវាងប្រទេសទាំងពីរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ