Snowden៖អាមេរិកលួចយកព័ត៌មានពីកុំព្យូទ័រក្នុងហុងកុង និងចិនតាំងពីឆ្នាំ ២០០៩
នៅមួយសប្តាហ៍ក្រោយបែករឿងអាស្រូវ លួចថតទូរស័ព្ទរបស់ប្រជាជនអាមេរិក ប្រធានទីភ្នាក់ងារសន្តិសុខជាតិអាមេរិកត្រូវព្រឹទ្ធសភា អាមេរិកកោះហៅឲ្យចូលឆ្លើយបំភ្លឺ កាលពីថ្ងៃពុធទី ១២ មិថុនា ២០១៣។ បុរសEdward Snowden វិញ ដែលអះអាងថា ជាអ្នកទម្លាយ បញ្ចេញឯកសារសម្ងាត់ទៅឲ្យអ្នកកាសែត នៅពេល កំពុងស្ថិតនៅក្នុងទីក្រុងហុងកុងនៅឡើយ។ លោកSnowdenថែមទាំងបានផ្តល់ឯកសារសំខាន់ៗផ្សេងទៀត ដល់កាសែតចិន ក្នុងទីក្រុងហុងកុង ដែលបង្ហាញថា ទីក្រុងវ៉ាស៊ីនតោនបានលួចយកព័ត៌មានរបស់ក្រុងហុងកុង និងរដ្ឋាភិបាលទីក្រុងប៉េកាំង តាំងពីឆ្នាំ ២០០៩មកម្ល៉េះ។
ចុះផ្សាយនៅថ្ងៃ៖
ស្តាប់ - ០១:៥៤
គេមិនដឹងថា តើបុរស Snowdenកំពុងលាក់ខ្លួន នៅកន្លែងណាទេ ក្នុងទីក្រុងហុងកុង ប៉ុន្តែ កាលពីថ្ងៃពុធទី ១២ មិថុនា Snowdenទើបតែផ្តល់បទសម្ភាសន៍រយៈពេល មួយម៉ោងដល់កាសែតចិន South China Morning Post ដែលជាកាសែតភាសាអង់គ្លេសធំជាង គេក្នុងទីក្រុងហុងកុង។ តាមSnowden រដ្ឋាភិបាលអាមេរិកបានចំណាយលុយច្រើនសន្ធឹកសន្ធាប់ ដើម្បីបង្កើតបណ្តាញចារកម្មក្នុងទីក្រុងហុងកុង។ ជាមួយនឹងឯកសារសម្ងាត់ ដែល Snowdenបានផ្តល់ឲ្យ កាសែត South China Morning Postបានចុះផ្សាយព័ត៌មានក្តៅ នៅលើទំព័រមុខរបស់ខ្លួន ដែលបង្ហាញថា ទីភ្នាក់ងារសន្តិសុខជាតិ NSAរបស់អាមេរិកបានចូលលួចយកព័ត៌មានពីកុំព្យូទ័រ នៅទីក្រុងហុងកុង និងនៅចិនដីគោក តាំងពីឆ្នាំ ២០០៩។ ប៉ុន្តែ បើតាមSnowden ព័ត៌មានដែលទីភ្នាក់ងារអាមេរិក លួចថតយក គ្មានទាក់ទងនឹងឯកសារយោធារបស់ប្រទេសចិនទេ។
Edward Snowden ចង់ប្រឈមតទល់ជាមួយរដ្ឋាភិបាលអាមេរិកដើម្បីស្វែងរកយុត្តធម៌ផ្ទាល់ខ្លួន។ នៅក្នុងបទសម្ភាសន៍ គេបាននិយាយថា គេមានទំនុកចិត្តលើប្រព័ន្ធយុត្តិធម៌របស់ទីក្រុងហុងកុង ហើយគេសម្រេចចិត្តបន្តរស់នៅក្នុងទីក្រុងហុងកុង រហូតដល់ពេលណាដែលទីក្រុងមួយនេះរបស់ប្រទេសចិនសម្រេចចិត្តបណ្តេញគេចេញ។
“ខ្ញុំមិនមែនជាវីរជន ឬជាជនក្បត់ជាតិ ដូចមតិមួយចំនួនលើកឡើងនោះទេ ខ្ញុំគ្រាន់តែជាប្រជាជនអាមេរិកាំងធម្មតា ដែលជឿទៅលើសិទ្ធិសេរីភាពបញ្ចេញមតិ”។ នេះជាការអះអាងរបស់ Snowden។
នៅទីក្រុងវ៉ាស៊ីនតោនវិញ នៅចំថ្ងៃដែលSnowdenទម្លាយព័ត៌មានជាថ្មីដល់កាសែតចិន ប្រធានទីភ្នាក់ងារសន្តិសុខជាតិ NSA ដែលកំពុងទទួលរងរឿងអាស្រូវ ក៏ត្រូវព្រឹទ្ធសភាអាមេរិកកោះហៅឲ្យទៅបកស្រាយពីកម្មវិធីលួចថតសំឡេងទូរស័ព្ទដោយសម្ងាត់ ដែលSnowden អតីតអ្នកបម្រើការឲ្យCIA ទើបតែបកអាក្រាតនៅពេលនេះ។
គួរដឹងថា កាលពីពេលថ្មីៗនេះ ទីភ្នាក់ងារ NSA ត្រូវគេឲ្យឈ្មោះថា ទីភ្នាក់ងារស្រមោល គឺគ្មានរូបរាងជាផ្លូវការទេ។ ប៉ុន្តែ ពេលនេះ ប្រធាន NSA លោកKeith Alexander គ្មានជម្រើស ត្រូវបង្ហាញខ្លួនដល់សាធារណជន។
នៅចំពោះមុខក្រុមសមាជិកព្រឹទ្ធសភា លោកKeith Alexander បានខំនិយាយការពារទីភ្នាក់ងាររបស់លោក ដែលខំធ្វើការងារដើម្បីប្រយោជន៍ជាតិ ព្រោះបើតាមលោក Alexander កម្មវិធី Prism និងកម្មវិធីលួចថតសំឡេងតាមទូរស័ព្ទ បានជួយឲ្យគេដឹងមុន និងទប់ស្កាត់គម្រោងធ្វើភេរវកម្ម ដែលចង់វាយប្រហារក្រុងញូវយ៉ក កាលពីឆ្នាំ ២០០៩៕ សមាជិកព្រឹទ្ធសភាអាមេរិកមួយចំនួននៅមិនទាន់ជឿទុកចិត្តនៅឡើយ។ សវនាការជាមួយលោក Alexanderនឹងបន្តមាននៅថ្ងៃព្រហស្បតិ៍នេះម្តងទៀត ប៉ុន្តែ លើកនេះ នឹងធ្វើឡើងដោយបិទទ្វារ ក្នុងស្ថានភាពsecret défense គឺកិច្ចការយោធាសម្ងាត់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ