MH370៖ ក្រុមស៊ើបអង្កេតថាគ្មានភស្តុតាងដាក់ការទទួលខុសត្រូវលើអ្នកបើកបរ
ក្រុមស៊ើបអង្កេតអន្តរជាតិ ដែលទទួលបន្ទុកស៊ើបអង្កេតលើករណីបាត់យន្តហោះម៉ាឡេស៊ី ជើងហោះហើរលេខ៣៧០ បានចេញផ្សាយរបាយការណ៍ស៊ើបអង្កេតបឋមរបស់ខ្លួន នៅថ្ងៃអាទិត្យនេះ ក៏ប៉ុន្តែ របាយការណ៍នេះហាក់ដូចជាមានបានផ្តល់នូវពន្លឺអ្វីថ្មី ចំពោះការបាត់យន្តហោះនេះទេ។ ទោះជាយ៉ាងណា ក្រុមអ្នកស៊ើបអង្កេតបានធ្វើការគូសបញ្ជាក់ថា គេមិនឃើញមានតម្រ៉ុយណាមួយ ដែលអាចបញ្ជាក់ថា ការបាត់យន្តហោះនេះបណ្តាលមកពីអ្នកបើកបរ ឬក៏មកពីបញ្ហាគ្រឿងម៉ាស៊ីននោះទេ។
ចុះផ្សាយនៅថ្ងៃ៖
ស្តាប់ - ០២:៤៦
ចាប់តាំងពីយន្តហោះប៊ូអ៊ីង ៧៧៧ របស់ក្រុមហ៊ុន Malaysia Airlines ជើងហោះហើរលេខ៣៧០ ត្រូវបាត់ពីរ៉ាដា កាលពីមួយឆ្នាំមុន សម្មតិកម្មជាច្រើនត្រូវបានគេលើកឡើង ដើម្បីព្យាយាមបកស្រាយចំពោះករណីបាត់យន្តហោះដ៏ចម្លែកមួយនេះ ដោយអ្នកខ្លះសង្ស័យពីបញ្ហាគ្រឿងម៉ាស៊ីន ឬអគ្គិភ័យលើយន្តហោះ ខ្លះថាជាករណីចាប់ពង្រាត់យន្តហោះដោយភេរវជនណាមួយ ក៏ប៉ុន្តែ ការសង្ស័យដែលគេតែងតែលើកឡើងច្រើនជាងគេ គឺទាក់ទងទៅនឹងអ្នកបើកបរ។
អ្នកជំនាញខាងអាកាសចរណ៍ជាច្រើនបាននាំគ្នាធ្វើការកត់សម្គាល់ថា នៅពេលដែលយន្តហោះម៉ាឡេស៊ី៣៧០ត្រូវបាត់ពីរ៉ាដា រាល់ការទាក់ទងទាំងអស់ទៅកាន់បន្ទប់បើកបរត្រូវបានកាត់ផ្តាច់ ហើយឧបករណ៍ផ្តល់អត្តសញ្ញាណយន្តហោះត្រូវបានបិទលែងឲ្យរ៉ាដាស៊ីវិលចាប់បាន។ ម្យ៉ាងទៀត បន្ទាប់ពីបាត់ពីរ៉ាដា យន្តហោះនេះបានបន្តហោះហើរក្នុងរយៈពេលពី ៦ ទៅ ៧ម៉ោង ដោយហោះចេញពីទិសដៅដែលគ្រោងទុក និងហោះកាត់តាមកូអរដោនេផ្លូវអាកាសច្បាស់លាស់។ ទាំងអស់នេះធ្វើឲ្យគេសន្និដ្ឋានថា អ្វីៗដែលបានកើនឡើង គឺទំនងជាមកពីអន្តរាគមន៍របស់មនុស្សនៅក្នុងបន្ទប់បើកបរ ហើយមានតែអ្នកដែលចេះបើកបរយន្តហោះ និងស្គាល់ផ្លូវហោះហើរនៅក្នុងតំបន់នេះទេ ដែលអាចធ្វើបែបនេះបាន។
ជាការពិត មានអ្នកខ្លះលើកឡើងថា ភេរវជនដែលទទួលការហ្វឹកហ្វឺនច្បាស់លាស់អាចនឹងធ្វើសកម្មភាពអស់ទាំងនេះបាន ក៏ប៉ុន្តែ សម្មតិកម្មនេះត្រូវបានអ្នកជំនាញភាគច្រើនច្រានចោល នៅក្នុងហេតុផលដ៏សាមញ្ញមួយថា គោលដៅចម្បងបំផុតនៃការធ្វើភេរវកម្ម គឺចង់ឲ្យគេដឹង រីឯក្នុងករណីបាត់យន្តហោះម៉ាឡេស៊ីលេខ៣៧០នេះវិញ មួយឆ្នាំទៅហើយ មិនមានអ្នកណា ឬក្រុមណាចេញមុខប្រកាសទទួលខុសត្រូវ។
ហេតុដូច្នេះហើយបានជាគេនាំគ្នាដាក់ការសង្ស័យទៅលើអ្នកបើកបរ។ ក៏ប៉ុន្តែ នៅក្នុងរបាយការណ៍ស៊ើបអង្កេតបឋម ចេញផ្សាយនៅថ្ងៃអាទិត្យនេះ ក្រុមស៊ើបអង្កេតអន្តរជាតិបានឲ្យដឹងថា គេបានធ្វើការស៊ើបអង្កេតយ៉ាងលម្អិតទៅលើអ្នកបើកបរយន្តហោះទាំងពីររូប ព្រមទាំងបុគ្គលិកបម្រើការលើយន្តហោះ ១០រូបផ្សេងទៀត ដោយស៊ើបអង្កេតទាំងទៅលើបញ្ហាគ្រួសារ បញ្ហាផ្ទាល់ខ្លួន បញ្ហាលុយកាក់ ឬបញ្ហាផ្លូវចិត្ត ក៏ប៉ុន្តែ គេមិនឃើញមានតម្រ៉ុយអ្វីមួយ ដែលអាចបញ្ជាក់ពីការទទួលខុសត្រូវរបស់អ្នកបើកបរ ឬបុគ្គលិកបម្រើការលើយន្តហោះ ចំពោះករណីបាត់យន្តហោះម៉ាឡេស៊ីលេខ៣៧០នេះទេ។ រីឯបញ្ហាគ្រឿងម៉ាស៊ីនយន្តហោះវិញ ក៏ក្រុមស៊ើបអង្កេតរកមិនឃើញតម្រ៉ុយអ្វីនោះដែរ។
និយាយដោយខ្លី របាយការណ៍ស៊ើបអង្កេតបឋមនេះមិនបានផ្តល់ពន្លឺអ្វីថ្មី ចំពោះករណីបាត់យន្តហោះដ៏ចម្លែកនេះទេ។ តាមការពិតទៅ នេះក៏មិនមែនជារឿងអ្វីចម្លែកនោះដែរ ពីព្រោះថា គេមិនអាចធ្វើការស៊ើបអង្កេតដឹងមូលហេតុច្បាស់លាស់អំពីការបាត់យន្តហោះនេះបានទេ នៅក្នុងពេលដែលគេមិនទាំងដឹងផងថា តើយន្តហោះនេះស្ថិតនៅទីណាពិតប្រាកដ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ