លោកស៊ីជីនពីង ទទួលជួបសម្តេចសង្ឃប៉ាន់ឈិនឡាម៉ាទីបេ ដើម្បីដាស់តឿន
វាជាឱកាសដ៏កម្រមួយ ដែលលោកស៊ីជីនពីង ប្រធានាធិបតីចិន បានទទួលជួបសម្តេចសង្ឃ ប៉ាន់ឈិនឡាម៉ា តំណាងតំបន់ទីបេ។ សម្រាប់ប៉េកាំង មានតែព្រះសង្ឃប៉ាន់ឈិនឡាម៉ា មួយអង្គនេះ ប៉ុណ្ណោះ ដែលជាអ្នកតំណាងស្របច្បាប់របស់តំបន់ទីបេ។ តាមការរាយការណ៍ របស់ទីភ្នាក់ងារសារព័ត៌មានចិនផ្លូវការ បានបញ្ជាក់ថា លោកប្រធានាធិបតីចិន បានសំណូមពរឲ្យព្រះសង្ឃ ប៉ាន់ឈិនឡាម៉ា ខិតខំបន្តទៀតក្នុងការដឹកនំាប្រជាជនទីបេ ឲ្យដើរតាមមាគ៌ាសង្គមនិយម របស់ចិនប៉េកាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣០
នេះជាលើកទីមួយហើយ ដែលលោក ស៊ីជីនពីង ប្រធានាធិបតីចិន បានទទួលជួបសម្តេចសង្ឃ ប៉ាន់ឈិនឡាម៉ា ដែលជាប្រមុខសង្ឃព្រះពុទ្ធសាសនា នៅតំបន់ទីបេ។ ព័ត៌មាននេះ ត្រូវបានទូរទស្សន៍ និងសារព័ត៌មានក្នុងស្រុកចិន និយាយរាយរ៉ាប់ អួតសរសើរ ពីថ្នាក់ដឹកនាំទាំងពីរ អមដោយរូបភាព ដែលបង្ហាញ ពីការគោរពគារវកិច្ច របស់លោកប្រធានាធីបតីចិន ជូនចំពោះសម្តេចសង្ឃប៉ាន់ឈិនឡាម៉ា។
បើយោងតាម ភ្នាក់ងារព័ត៌មានចិនផ្លូវការ បានបញ្ជាក់ថា ថ្លែងក្នុងឱកាសជួបសន្ទនាគ្នានេះ លោកស៊ីជីនពីង បានសំណូមពរឲ្យសម្តេចសង្ឃប៉ាន់ឈិនឡាម៉ា ខិតខំឲ្យសកម្មថែមទៀត ក្នុងការបញ្ចូលទ្រឹស្តីព្រះពុទ្ធសាសនាទីបេ ទៅក្នុងលទ្ធិសង្គមនិយម ដែលដឹកនាំដោយក្រុងប៉េកាំង។ លោក ប្រធានាធិបតីចិន បានបន្ថែមទៀតថា ក្នុងនាមសម្តេចសង្ឃជាថ្នាក់ដឹកនាំសាសនានៅទីបេ ព្រះអង្គត្រូវធ្វើយ៉ាងណា បណ្តុះគំនិតស្នេហាជាតិ និងឲ្យមានការបង្រួបបង្រួមជាតិ នៃសាធារណរដ្ឋប្រជាមានិតចិន តែមួយ។
ទោះបីជាយ៉ាងណា នៅពីក្រោយពាក្យសំណូមពរទាំងនេះ ត្រូវបានអ្នកវិភាគឯករាជ្យ យល់ឃើញថា វាគឺជាពាក្យដាស់តឿន ក្រើនរំឭក របស់លោកប្រធានាធិបតីចិន ចំពោះប្រមុខសង្ឃឡាម៉ាទីបេ ថា ត្រូវនៅឲ្យឆ្ងាយ ពីសម្តេចសង្ឃដាឡៃឡាម៉ា ដែលបាននិរទេសព្រះកាយទៅឥណ្ឌា។ វាមិនខុសអ្វី ពីមេរៀន ដែលលោកប្រធានាធិបតីចិន បានពន្យល់ទៅ សម្តេចសង្ឃប៉ាន់ឈិនឡាម៉ាថា ត្រូវធ្វើយ៉ាងណាបញ្ចុះបញ្ចូលប្រជាជនទីបេ កុំឲ្យងើបប្រឆាំង បះបោរជាមួយអំណាចបក្សកុម្មុយនីស្តចិន ដូច្នោះដែរ។
សូមបញ្ជាក់ថា ក្នុងក្រសែភ្នែកចិន សម្តេចសង្ឃដាឡៃឡាម៉ា ដែលប្រជាជនទីបេគោរពស្រលាញ់នោះ គឺជាមនុស្សដែលបង្កគ្រោះថា្នក់ដល់ចិន ព្រោះព្រះអង្គបានបន្តធ្វើពហិការ ប្រឆាំងនឹងការឈ្លានពានរបស់ចិន ទៅលើដែនដីទីបេ។ ឆ្នាំនេះ ជាខួបទី ៥០ហើយ ដែលចិនកុម្មុយនីស្តបានចូលទៅក្តោបក្តាប់ គ្រប់គ្រងតំបន់ទីបេ។ ដោយឡែកសម្តេចសង្ឃប៉ាន់ឈិនឡាម៉ា គ្រាន់តែជាកូនអុករបស់ចិន ដែលចិនបានលើកបន្តុប ដើម្បីប្រជែងជាមួយប្រជាប្រិយភាព របស់សម្តេចសង្ឃដាឡៃឡាម៉ា តែប៉ុណ្ណោះ។
គួរបញ្ជាក់ថា ងារប៉ាន់ឈិនឡាម៉ា គឺជាងារសម្តេចសង្ឃឋានៈទីពីរ បន្ទាប់ពីងារដាឡៃឡាម៉ា។ ក្នុងករណីផុតពីដាឡៃឡាម៉ាទៅ គឺសង្ឃប៉ាន់ឈិនឡាម៉ា នេះឯង នឹងឡើងជាសង្ឃដាឡៃឡាម៉ា។ តាមការពិត ព្រះសង្ឃប៉ាន់ឈិនឡាម៉ា បច្ចុប្បន្ន ដែលមានព្រះជន្ន២៥វស្សារនេះ ត្រូវបានចិនតែងតាំង ជាប៉ាន់ឈិនឡាម៉ា តាំងពីអាយុ៥ឆ្នាំម្លេះ។ ការតែងតាំងនេះ បានធ្វើឡើងដើម្បីប្រឆាំងនឹងការដែលសម្តេចសង្ឃដាឡៃឡាម៉ា បានតែងតាំងសង្ឃមួយអង្គទៀត ប៉ុន្តែប៉េកាំងមិនពេញចិត្ត។ សង្ឃអង្គនោះ បានបាត់ខ្លួន ហើយបើតាមការសង្ស័យ គឺត្រូវបានចិន ចាប់ដាក់ឃុំ។ ចំណែក សង្ឃប៉ាន់ឈិនឡាម៉ា ដែលចិនតែងតាំង រហូតដល់សព្វថ្ងៃនេះ ត្រូវបានចិនយកទៅទំនុកបំរុង រៀនសូត្រនៅក្រុងប៉េកាំង តាំងពីក្មេងម្លេះ។ ជា លទ្ធផល សង្ឃប៉ាន់ឈិនឡាម៉ាននេះ បានចេញមុខថ្កោលទោស លើការងើបបះបោរ របស់ប្រជាជន ទីបេ ដែលប្រឆាំងនឹងរដ្ឋាភិបាលចិន កាលពីឆ្នាំ២០០៨៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ