នាយករដ្ឋមន្ត្រីចិនបញ្ចប់ទស្សនកិច្ចនៅបារាំងជាមួយកុងត្រាជាច្រើន
ទស្សនកិច្ចផ្លូវរដ្ឋបីថ្ងៃរបស់លោកនាយករដ្ឋមន្ត្រីចិន លី ខឺឈាំង នៅប្រទេសបារាំង បានបិទបញ្ចប់ទៅដោយមានការចុះកិច្ចសន្យាពាណិជ្ជកម្ម និង សហប្រតិបត្តិការ ជាច្រើន។ ពីទីក្រុងទូលូ ក្រុងផលិតយន្តហោះអ៊ែរបូសអឺរ៉ុប ក្នុងនាមជាម្ចាស់ផ្ទះ នាយករដ្ឋមន្ត្រីបារាំងបានអំពាវនាវ ឱ្យអ្នកជំនួញចិនចូលមកតាំងទីរកស៊ីវិនិយោគក្នុងទឹកដីបារាំង ដ៏ទាក់ទាញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៦
បន្ទាប់ពីប៉ារីស និងម៉ាសី ក្រុងកំពង់ផែ នៅថ្ងៃចុងក្រោយនៃទស្សនកិច្ច លោក លី ខឺឈាំង បានអញ្ជើញទៅធ្វើជាអធិបតីក្នុងជំនួបកំពូលអ្នកវិនិយោគបារាំង-ចិន ក្បែរនាយករដ្ឋមន្ត្រី នៅទីក្រុងអាកាសចរណ៍អ៊ែរប៊ូស និងការចុះកិច្ចសន្យា តម្លៃជាង ១៦ពាន់លានអឺរ៉ូ ទិញយន្តហោះអ៊ែរប៊ូស ប្រភេទអា៣៣០ចំនួន ៧៥គ្រឿង នោះ៤៥គ្រឿងជាបញ្ជាទិញដាច់ណាត់។
ក្រៅអំពីកិច្ចសន្យាបញ្ជាទិញយន្តហោះនេះ ប្រមុខរដ្ឋាភិបាលទាំងពីរក៏បានចុះហត្ថលេខាលើកិច្ចព្រមព្រៀងកិច្ចសហប្រតិបត្តិការ ស្ថាបនារោងចក្ររៀបចំគ្រឿងក្នុងកាប៊ីនយន្តហោះអ៊ែរប៊ូស ៣៣០ នៅប្រទេសចិន ក្នុងតម្លៃប្រមាណ១៥០លានអឺរ៉ូ បន្ថែមពីលើរោងចក្រដំឡើងយន្តហោះអា៣២០ ដែលមានស្រាប់នៅក្រុងទៀនជីន តាំងពីឆ្នាំ២០០៤។
ទំនាក់ទំនងសេដ្ឋកិច្ចប្រទេសទាំងពីរ បានឡើងដល់កំរិតកំពូល ! នាឱកាសទស្សនកិច្ចបីថ្ងៃនេះ បារាំងនិងចិនបានចុះហត្ថលេខាលើកិច្ចព្រមព្រៀងជាង៥០ ក្នុងទំហំទឹកប្រាក់ជិតបីពាន់លានអឺរ៉ូ ! នេះដោយមិនគិតបញ្ចូលកិច្ចព្រមព្រៀងហិរញ្ញវត្ថុនិងកម្ចីប្រាក់រាប់សិបពាន់លានផងទេ។ លើសពីនេះទៅទៀត មានសេចក្តីថ្លែងការណ៍ពីរត្រូវបានចុះហត្ថលេខាដែរ មួយទាក់ទងនឹងវិស័យនុយក្លេអ៊ែរស៊ីវិល និងមួយទៀត មានតម្លៃជាប្រវត្តិសាស្ត្រផង គឺភាពជាដៃគូរវាងចិននិងបារាំងក្នុងការរុករានចូលទីផ្សារទ្វីបអាហ្វ្រិក។
វិនិយោគទុនចិននៅបារាំងមានទំហំប្រមាណ៤ពាន់លានអឺរ៉ូ និងបង្កើតការងារបានមិនតិចជាង១៣០០០ការងារទេ។ ជាចំនួនដ៏ច្រើន តែភាគីទាំងពីរអាចប្រឹងធ្វើបានប្រសើរជាងនេះ ហេតុដូច្នេះហើយបានជាលោកនាយករដ្ឋមន្ត្រីបារាំងប្រកាសសន្យាជាមួយសមភាគីចិន ថានឹងចាត់វិធានការទទួល អ្នកវិនិយោគចិនជាពិសេស គ្មានបណ្តាប្រទេសអឺរ៉ុបអាចប្រៀបជាមួយបារាំងឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ