ចិនថាពីរបីអាទិត្យទៀត នឹងឲ្យដំណឹងថាគេព្រមធ្វើអ្វីខ្លះដើម្បីកាត់បន្ថយកំដៅផែនដី
លោក ឡូរ៉ង់ ហ្វាប៊្យូស រដ្ឋមន្រ្តីក្រសួងការបរទេសបារាំង ដែលកំពុងបំពេញទស្សនកិច្ចនៅប្រទេសចិន បានប្រាប់ឲ្យដឹងថា ក្នុងរយៈពេលពីរទៅបីអាទិត្យទៀត រដ្ឋាភិបាលចិន និងបង្ហាញជាសាធារណៈនូវការចូលរួម ក្នុងការកាត់បន្ថយការកើនឡើងកំដៅផែនដី ដែលពិភពលោក នឹងត្រូវជួបប្រជុំគ្នា នាដំណាច់ឆ្នាំនេះ ក្នុងទីក្រុងប៉ារីស ប្រទេសបារាំង។ បារាំង កំពុងតែព្យាយាមបញ្ចុះបញ្ចូលប្រទេសមហាអំណាចសេដ្ឋកិច្ច ដែលជាមេបំពុលបរិស្ថានទាំងអស់ ឲ្យកាត់បន្ថយសកមុ្មភាពបំពុលរបស់ខ្លួន ដើម្បីកុំឲ្យផែនដី ឡើងកំដៅលើសពី ២អង្សារសេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៣
បារាំងដែលជាម្ចាស់ផ្ទះទទួលរៀបចំការពិភាក្សាគ្នា ស្តីពីការកើនឡើង នូវកំដៅផែនដី កំពុងតែស្វះស្វែង ប្រមែលប្រមូល ប្រទេសមហាអំណាចសេដ្ឋកិច្ចទាំងអស់ ឲ្យព្រមព្រៀងគ្នា ធ្វើពលីកម្មម្នាក់បន្តិចៗ ដើម្បីកាត់បន្ថយការបញ្ចេញឧស្ម័នពុល ដែលជាប្រភព នៃការកើនឡើងនូវសីតុណ្ហភាពរបស់ភពផែនដី។
លោក ឡូរ៉ង់ ហ្វាប៊្យូស រដ្ឋមន្រ្តីក្រសួងការបរទេសបារាំង ដែលបានទៅដល់ក្រុងប៉េកាំង កាលពីថ្ងៃសុក្រទី ១៥ឧសភា ដើម្បីរំអុកចិន ឲ្យឆាប់ឆ្លើយថាព្រមធ្វើអីខ្លះនោះ ទើបបានបញ្ជាក់នៅថ្ងៃនេះថា រដ្ឋាភិបាលចិន និងបញ្ហាញជាសាធារណៈ អំពីការព្រមព្រៀងរបស់ខ្លួន ក្នុងការកាត់បន្ថយឧស្ម័នពុល ក្នុងរយៈពេលពីរ ទៅ បីសប្តាហ៍ទៀត។
យោងតាមការសម្រេចរួមគ្នា កាលពីវេទិការអាកាសធាតុនៅក្រុងលីមា កាលពីខែធ្នូឆ្នាំទៅ ប្រទេសទាំងអស់បានសន្យាថា នឹងប្រាប់អំពីចំណុចដែលខ្លួនសុខចិត្តធ្វើវិភាគទាន ដើម្បីកាត់បន្ថយកំដៅផែនដី នៅក្នុងត្រីមាសទីមួយ ដើមឆ្នាំ២០១៥ មុននឹងឈានទៅដល់ការជួបពិភាក្សាគ្នា នៅខែធ្នូ ក្នុងក្រុងប៉ារីស។ រហូតមកដល់ពេលនេះ មានប្រទេសតែមួយភាគបីប៉ុណ្ណោះ ក្នុងនោះមានសហរដ្ឋអាមេរិក និងសហភាពអឺរ៉ុប ដែលបានផ្តល់វិភាគទានក្នុងការកាត់បន្ថយឧស្ម័នពុល។ ចិនដែលកាលពីដំបូងថា នឹងឆ្លើយនៅខែមីនា បានលើករហូតមកដល់ពេលនេះ ហើយឥឡូវថា ចាំពីរទៅបីសប្តាហ៍ទៀត។
លោក បាន គីមូន រដ្ឋលេខាធិការអង្គការសហប្រជាជាតិ បានផ្ញើរលិខិតទៅប្រទេសដែលនៅមិនទាន់ឆ្លើយ ដើម្បីជំរុញ ប្រទេសទាំងនោះឲ្យប្រញាប់ប្រញាល់ ដោយបានប្រើពាក្យថា វាគឺជាកាតព្វកិច្ចរបស់គ្រប់ៗគ្នា ក្នុងការស្រោចស្រង់ភពផែនដី ជាពិសេសប្រទេសដែលបំពុលបរិស្ថានច្រើនជាងគេ។
សូមបញ្ជាក់ផងដែរថា ចិនគឺជាប្រទេស ដែលបញ្ចេញឧស្ម័នពុល ច្រើនជាងគេបង្អស់ លើលោក។ ឧស្ម័នពុលដែលចិនបញ្ចេញ ទៅក្នុងបរិយាកាស គឺដោយសារការប្រើប្រាស់ធ្យូងថ្ម ក្នុងការផលិតជាថាមពល នៅតាមរោងចក្រសហគ្រាស រាប់ម៉ឺនរាប់ពាន់ ក្នុងប្រទេសចិន។ ប្រហាក់ប្រហែលនឹងចិនដែរ ឥណ្ឌា ក៏មានចំណែកមិនតិចដែរ ក្នុងការបញ្ចេញឧស្ម័នពុល ក្នុងបរិយាកាស។ ប្រទេសទាំងពីរតែងតែអះអាង ពីតម្រូវការសេដ្ឋកិច្ចរបស់គេ ដោយមិនអាចចៀសបាន ប៉ុន្តែគេនឹងខិតខំប្រឹងប្រែង ដើម្បីកាត់បន្ថយ។
ប៉ុន្តែទោះបីជាយ៉ាងណា ឆន្ទៈនយោបាយ ក្នុងការបត់ក្បាល មកស្វែងរកវិធីសាស្ត្រថ្មីៗ ក្នុងការផលិតថាមពលអគ្គីសនី ដោយមិនប្រើប្រាស់ ធ្យូងថ្ម រឺប្រេងឥន្ធនៈនៅតាមប្រទេសទាំងនេះ នៅមានភាពយឺតយ៉ាវខ្លាំងណាស់។ ចិនធ្លាប់បានប្រកាសថា គេនឹងពិចារណា ពីការកាត់បន្ថយការបញ្ចេញឧស្ម័នពុល ចាប់ពីឆ្នាំ ២០៣០ទៅ។ ដូច្នេះមានន័យថា ក្នុងរយៈពេល១៦ឆ្នាំទៅមុខទៀត ចង់នរណាថាអីថាអីថាទៅ ផែនដីឡើងកំដៅដល់ណាដល់ទៅ គឺចិននឹងនៅតែបន្តបញ្ចេញឧស្ម័នពុលតទៅទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ