ជប៉ុនដើរចេញពីវិបត្តិបរិត្តផរណា និងចង់ចុះសន្ធិសញ្ញាសន្តិភាពជាមួយរុស្ស៊ី
នៅថ្ងៃចន្ទទី ៤ មករា ២០១៦នេះ ក្នុងសន្និសីទកាសែតលើកទីមួយប្រចាំឆ្នាំ២០១៦ លោកនាយករដ្ឋមន្ត្រីជប៉ុន ស្ហ៊ីនហ្សូ អាបេ បានប្រកាសថាជប៉ុនលែងមានវិបត្តិបរិត្តផរណាហើយ ហើយសន្យាធ្វើការជាមួយធនាគារជាតិដើម្បីលុបបំបាត់បញ្ហានេះឱុ្យបានទាំងស្រុង។ ជាងនេះទៅទៀត ជប៉ុនបានបើកទំព័រឆ្នាំថ្មី បោះដៃរករុស្ស៊ី តាមរយៈការអំពាវនាវបង្កើតសន្ធិសញ្ញាសន្តិភាព រុស្ស៊ី-ជប៉ុនផង។
ចុះផ្សាយនៅថ្ងៃ៖
នាយករដ្ឋមន្ត្រីជប៉ុន លោក ស្ហ៊ីនហ្សូអាបេ បានប្រកាសអំពីលទ្ធភាពទទួលស្វាគមន៍ប្រធានាធិបតីរុស្ស៊ី លោក វ្លាដេមៀ ពូទីន ឱ្យមកបំពេញទស្សនកិច្ចនៅជប៉ុន ក្នុងពេលឆាប់ៗខាងមុខ បើឱកាសល្អហុចឱ្យ និងអំពីចេតនាជប៉ុន ចង់បិទបញ្ចប់ជម្លោះដណ្តើមទឹកដី កោះគួរីល ជាមួយរុស្ស៊ី តាមរយៈការចុះហត្ថលេខាលើសន្ធិសញ្ញាសន្តិភាពមួយ។
រុស្ស៊ីនិងជប៉ុន មានជម្លោះដែនដីដ៏តានតឹងនឹងគ្នា ដណ្តើមគ្រប់គ្រងកោះបួននៃប្រជុំកោះគួរីល ដែលសហភាពសូវៀតបានឆក់ទៅធ្វើជាដែនដីរុស្ស៊ីតាំងពីសង្គ្រាមលោកលើកទីពីរ ក្រោមសម្រែកទាមទារយកមកវិញអត់ឈប់របស់ជប៉ុន។ ហើយប្រទេសទាំងពីរក៏មិនដែលបានចុះកិច្ចព្រមព្រៀងគ្នាអ្វីបិទបញ្ចប់ជម្លោះនោះដែរ។ ការចរចា ដោះស្រាយវិបត្តិដីកោះមួយដុំនេះ ត្រូវបានជាប់គាំងតាំងពីខែមីនា ២០១៤ ថ្ងៃដែលរុស្ស៊ីក្រសោបយកតំបន់គ្រីមេរបស់អ៊ុយក្រែនមក។
កាលពីចុងខែកញ្ញា ២០១៥ នាឱកាសជួបជាមួយសមភាគីជប៉ុន រដ្ឋមន្ត្រីការបរទេសរុស្ស៊ី បានច្រានចោលរាល់ការព្រមព្រៀងណាមួយស្តីពីជម្លោះនៅកោះគួរីល។ ប៉ុន្តែនៅថ្ងៃនេះ នាយករដ្ឋមន្ត្រីបានផ្តល់សន្ទុះថ្មី។ ប្រធានាធិបតីរុស្ស៊ី និងលោកអាបេ ផ្ទាល់ បានព្រមព្រៀងគ្នារួចហើយ ថាវាមិនមែនជារឿងធម្មតាសោះដែល សង្គ្រាមបានបិទបញ្ចប់អស់រយៈពេលពេល៧០ឆ្នាំទៅហើយ តែប្រទេសទាំងពីរបែរគ្នាសន្ធិសញ្ញាសន្តិភាពរវាងគ្នានោះ។ នេះជាសេចក្តីប្រកាសបញ្ជាក់នៅក្នុងសន្និសីទកាសែត លើកដំបូងប្រចាំឆ្នាំ២០១៦។
ដោយឡែក សន្និសីទកាសែតថ្ងៃនេះ ក៏ជាឱកាសបង្ហាញពីគោលដៅសេដ្ឋកិច្ចក្នុងស្រុកដែរ។ បើតាមលោកអាបេ សេដ្ឋកិច្ចជប៉ុន កំពុងផ្តើមកំរើកឡើងវិញ និងលែងមានវិបត្តិបរិត្តផរណា។ ប៉ុន្តែជំងឺបរិត្តផរណាជប៉ុននេះ នៅមិនទាន់បានកម្ចាត់ស្លាប់ទាំងស្រុងនៅឡើយទេ បើទោះបីពេលនេះនយោបាយផ្តល់សន្ទុះបានធ្វើឱ្យតម្លៃទំនិញ-អចលនទ្រព្យ ចាប់រើបឡើងថ្លៃវិញក៏ដោយ។ រដ្ឋាភិបាលជប៉ុននឹងប្រឹងសហការជាមួយធនាគារជាតិ ដើម្បីផ្តល់សន្ទុះដល់កំណើនសេដ្ឋកិច្ចនិងជំរុញការចាយវាយរបស់ពលរដ្ឋ។ នេះជាពាក្យសន្យារបស់នាយករដ្ឋមន្ត្រី។
ជប៉ុន បានធ្លាក់ខ្លួនក្នុងវិបត្តិបរិត្តផរណា (ទំនិញធ្លាក់ថ្លៃខ្លាំង) ដែលជាវិបត្តិដ៏កម្រ តាំងពីចុងឆ្នាំ១៩៩០មក បន្ទាប់ពីមានផ្ទុះវិបត្តិបំប៉ោងតម្លៃអចលនទ្រព្យ។ នយោបាយផ្តល់សន្ទុះដល់កំណើនសេដ្ឋកិច្ច និងដំឡើងតម្លៃទំនិញ បញ្ចុះតម្លៃលុយ អតិផរណា ទ្រង់ទ្រាយធំមួយ នៅតែពុំអាចនាំប្រទេសឱ្យដើរចេញបានវិបត្តិនេះទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ