ចិនសម្ពោធមជ្ឈមណ្ឌលអវកាសទីបួន ដោយបង្ហោះកាំជ្រួចជំនាន់ថ្មី Long March ៧
កាំជ្រួចជំនាន់ថ្មីឈ្មោះថា Long March-៧ ត្រូវបានបង្ហោះចេញនៅថ្ងៃសៅរ៍ម្សិលមិញ ប្រកបដោយជោគជ័យ។ ជាការបាញ់បង្ហោះកាំជ្រួចជំនាន់ថ្មីដំបូងផង និងជាសម្ពោធមជ្ឈមណ្ឌលអវកាសដ៏ថ្មីស្រឡាង វេនចង់ Wenchang ផង។ នេះបើតាមការប្រកាសរបស់ភ្នាក់ងារសារព័ត៌មានផ្លូវការចិន ស៊ិនហួ។
ចុះផ្សាយនៅថ្ងៃ៖ កែប្រែថ្ងៃទី៖
ជារ៉ុកកែតមានពីរជាន់ ឡងម៉ាច-៧ Long March-7 (ជាភាសាអង់គ្លេស) នឹងក្លាយជាកាំជ្រួចពាំផ្កាយរណប ទៅកាន់តារាវិថី ដ៏ចំបងបង្អស់នៃកម្មវិធីអវកាសចិន ដោយអាចផ្ទុកទម្ងន់ដល់ទៅ ១៣,៥តោន ពោលគឺដឹកបានច្រើនជាងកាំជ្រួចមុនៗដល់ទៅមួយដងកន្លះ។
យានបង្ហោះកាំជ្រួច នឹងត្រូវធ្លាក់ត្រលប់មកដល់ដីវិញនៅថ្ងៃអាទិត្យ នៅម្តុំវាលរហោស្ថាន ម៉ុងហ្គោលីខាងក្នុង។
ការបង្ហោះកាំជ្រួចជំនាន់ថ្មីនេះក៏ជាឱកាសបើកសម្ពោធមជ្ឈមណ្ឌលអវកាស វេនចង់ ដែលជាមូលដ្ឋានបង្ហោះកាំជ្រួចធុនធ្ងន់ ធុនធំ ដ៏ទំនើបបំផុត និងស្ថិតនៅក្នុងខេត្តហៃណាន់។ មជ្ឈមណ្ឌលនេះ ត្រូវបានសាងសង់ចប់សព្វគ្រប់នៅឆ្នាំ២០១៤ និងជាមជ្ឈមណ្ឌលអវកាសទីបួន ដែលប៉េកាំងគ្រោងនឹងបង្ហោះកាំជ្រួចដ៏សំខាន់ៗ នៅថ្ងៃខាងមុខក្នុងឆ្នាំ២០១៦នេះ មានជាអាទិ៍ការបាញ់បង្ហោះរ៉ុកកែត Long March-5។
ជោគជ័យនៃការបង្ហោះរ៉ុកកែតLong March-7 ថ្ងៃនេះ ដូចជាបានបង្កើនសមត្ថភាពផ្នែកអវកាសរបស់ចិន មួយកំរិតបន្ថែមទៀត និងដូចជាបានជួយរុញច្រានចិន ឱ្យបានកាន់ស៊ុប ក្នុងពិភពអវកាស។
ចិនបានបញ្ជូនមនុស្សទៅកាន់អវកាសជាលើកទីមួយនៅឆ្នាំ២០០៣ និងមានមហិច្ឆតាសម្ពោធស្ថានីយ៍អវកាសរបស់ខ្លួន នៅម្តុំឆ្នាំ២០២២។ ចិនត្រូវការបង្កើនលឿនអភិវឌ្ឍន៍អវកាស ដើម្បីរត់ឱ្យទាន់សហរដ្ឋអាមេរិកនិងអឺរ៉ុបផង និងចង់តាមឱ្យឥណ្ឌា ដែលកាលពីឆ្នាំ២០១៤ បានក្លាយជាប្រទេសដំបូងគេបំផុតនៅអាស៊ី អាចបញ្ជូនយានអវកាសទៅភពអង្គារ និងដោយបានដាក់ផ្កាយរណបក្នុងតារាវីថីជុំវិញភពអង្គារនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ