ប្រធានាធិបតីហ្វីលីពីនបណ្តេញទាហានអាមេរិកចេញពីទឹកដី
បន្ទាប់ពីបានប្រើពាក្យអសុរស ជេរ ប្រធានាធិបតីអាមេរិក នៅក្នុងជំនួបកំពូលអាស៊ាន ដែលបង្កឱ្យមានភាពល្អក់កករផ្នែកការទូតបន្តិចមក នៅថ្ងៃចន្ទនេះ ប្រធានាធិបតីមាត់ឆៅ ហ្វីលីពីន ឌុយទែរតេ បានប្រកាសទាមទារឱ្យកងកម្លាំងទ័ពពិសេសអាមេរិកចាកចេញពីទឹកដីភាគខាងត្បូងហ្វីលីពីន។ បើតាមប្រមុខរដ្ឋម្នាក់នេះ ខ្លាចវត្តមានកងទ័ពបង្កការស្មុគស្មាញខ្លាំងដល់យុទ្ធនាការបោសសម្អាតពួកបះបោរអ៊ីស្លាមជ្រុលនិយមចង់ផ្តាច់ដី។
ចុះផ្សាយនៅថ្ងៃ៖
ស្តាប់ - ០១:៤១
កាលពីសប្តាហ៍មុន ប្រធានាធិបតីហ្វីលីពីន បានបង្កភាពភ្ញាក់ផ្អើល ដោយបានធ្វើទំនាក់ទំនងការទូតហ្វីលីពីន-សហរដ្ឋអាមេរិក តាមរយៈសំដីជេរដ៏គ្រួតគ្រាតដាក់ប្រធានាធិបតីអាមេរិកបារ៉ាក់ អូបាម៉ា នៅថ្ងៃចន្ទនេះ លោក ឌុយទែរតេ បានចេញមុខពន្យល់ជាសាធារណៈ ចង់ឃើញកម្លាំងកងទ័ពពិសេសអាមេរិក ដែលកំពុងបង្វឹកបង្ហាត់ទាហានហ្វីលីពីន នៅភាគខាងត្បូងប្រទេស ថាជាទិសដៅនៃការវាយប្រហារ របស់ពួកឧទ្ទាមអ៊ីស្លាមជ្រុលនិយមចង់ផ្តាច់ទឹកដី អាប៊ូសាយ៉ាស។
ហេតុដូច្នេះហើយបានជា ក្រុងម៉ានីលត្រូវការឃើញ កងកម្លាំងពិសេសអាមេរិកនេះ ចាកចេញទឹកដីហ្វីលីពីន។ លោក ឌុយទែរតេ បានប្រកាសថាមិនចង់មានជម្លោះជាមួយអាមេរិកទេ តែកងទ័ពអាមេរិកនោះត្រូវត្រលប់ទៅស្រុកវិញ ព្រោះពួកវា (ពួកភេរវជនអ៊ីស្លាមជ្រុលនិយមអាប៊ូសាយ៉ាស បានជ្រើសរើសទាហានអាមេរិកនោះជាផ្ទាំងស៊ីប ចង់តាមសម្លាប់ ឬចាប់ជំរិត ដើម្បីទារប្រាក់ថ្នូរ។
កងកម្លាំងពិសេសអាមេរិក បានទៅឈរជើងនៅភាគខាងត្បូងកោះហ្វីលីពីន តាំងពីឆ្នាំ២០០២មក ប៉ុន្តែកម្មវិធីនេះត្រូវបានផ្អាកទៅវិញ នៅឆ្នាំ២០១៥ ដោយមានរក្សាទុកនូវកងពលតូចមួយ សម្រាប់ផ្តល់វគ្គបំពាក់បំប៉នបច្ចេកទេសនិងភស្តុភារ។
ខុសពីប្រធានាធិបតីមុន ដែលពឹងពាក់និងបង្ហាញភាពស្អិតល្មួតជាមួយវ៉ាស៊ីនតោន លោកឌុយទែរតេ តែងតែចោទប្រកាន់អតីតម្ចាស់អាណានិគមអាមេរិកមួយនេះថា មានពុតត្បុតច្រើន ជាពិសេសនៅពេលអាមេរិករិះគន់នយោបាយប្រយុទ្ធប្រឆាំងនឹងការជួញដូរគ្រឿងញៀនរបស់ហ្វីលីពីន។ ក្រោយពីបានជេរលោកអូបាម៉ា នៅក្នុងជំនួបអាស៊ាន សេចក្តីប្រកាសរបស់ប្រធានាធិបតីហ្វីលីពីនថ្ងៃនេះ ឆ្លុះឱ្យឃើញអំពីទស្សនៈវិស័យថ្មីរបស់ហ្វីលីពីនចំពោះទំនាក់ទំនងជាមួយអាមេរិក- ដែលធ្លាប់តែតាំងខ្លួនជាសម្ព័ន្ធមិត្តដ៏ជិតដិតបំផុតមួយរបស់វ៉ាស៊ីនតោននៅក្នុងតំបន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ