ហ្វីលីពីនសន្យាស៊ើបអង្កេត ជុំវិញការសម្លាប់មេជំនួញគ្រឿងញៀន បន្ទាប់ពីរងការបន្ទោសពីសហរដ្ឋអាមេរិក ពីបញ្ហាសិទ្ធិមនុស្ស
នៅថ្ងៃទី១៤សីហានេះ រដ្ឋាភិបាលរបស់ហ្វីលីពីន បានសន្យាថានឹងបើកការស៊ើបអង្កេត ឲ្យបានច្បាស់លាស់ អំពីករណីតាមប្រមាញ់សម្លាប់មេក្លោងជួញដូរគ្រឿងញៀន ក្នុងពេលកន្លងមកនេះ បន្ទាប់ពីបានរងការរិះគន់ពីសហគមអន្តរជាតិ ទាក់ទិនទៅនឹងការសម្លាប់កាត់ទោសមនុស្សក្រៅប្រព័ន្ធច្បាប់។ សហរដ្ឋអាមេរិក បានគំរាមថា អាមេរិកផ្តល់ជំនួយសន្ធិកសន្ធាប់ ទាំងថវិកា ទាំងយោធាដល់ហ្វីលីពីន គឺជាថ្នូរនឹងការគោរពសិទ្ធិមនុស្ស និងនីតិរដ្ឋរបស់ហ្វីលីពីន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៨
បើយោងតាមការផ្សាយរបស់សារព័ត៌មានមួយចំនួន ទាំងក្នុងស្រុក ទាំងក្រៅស្រុក បានឲ្យដឹងថា ចាប់តាំងពីលោករ៉ូឌ្រីហ្គោ ឌុយទែតឺ បានឡើងកាន់តំណែងជាប្រធានាធិបតីហ្វីលីពីន យ៉ាងហោចណាស់មានមនុស្សជិត១ពាន់នាក់ ដែលត្រូវបានគេសម្លាប់ ក្រោមបទថាជាប់ពាក់ព័ន្ធនឹងបណ្តាញជួញដូរគ្រឿងញៀន។
នេះគឺជាចំនួនមួយដ៏ច្រើនលើសលប់ ដែលធ្វើឲ្យអង្គការសិទ្ធិមនុស្ស និងសហគមអន្តរជាតិ មានការព្រួយបារម្ភ ដោយសារតែគេពុំបានទទួលព័ត៌មានលំអិតអ្វី ជុំវិញការសម្លាប់មនុស្សទាំងនោះទេ។ លោកឯកអគ្គរដ្ឋទូតសហរដ្ឋអាមេរិក បានធ្វើសេចក្តីថ្លែងការណ៍ នៅថ្ងៃទី១៤សីហានេះថា សហរដ្ឋអាមេរិក មានការព្រួយបារម្ភខ្លាំងណាស់ ចំពោះចំណាត់ការបែបធម៌ក្តៅរបស់រដ្ឋាភិបាលហ្វីលីពីន ដោយបានធ្វើការកាត់ទោស សម្លាប់មនុស្សក្រៅប្រព័ន្ធយុត្តិធម៌ ហើយដោយជនសង្ស័យមិនត្រូវបានបញ្ជូនទៅកាន់តុលាការដើម្បីវែកញែករកទោសកំហុស ទៅតាមច្បាប់។
ស្ថានទូតអាមេរិក បានបន្ថែមថា រដ្ឋាភិបាលហ្វីលីពីន ត្រូវតែធ្វើយ៉ាងណា បំភ្លឺបញ្ហានេះ ហើយត្រូវគោរពគោលការណ៍សិទ្ធិមនុស្ស និងគោលការណ៍នីតិរដ្ឋ។ លោកទូតអាមេរិក បន្តថា បើអាមេរិកបន្តផ្តល់ជំនួយដល់ហ្វីលីពីន រហូតដល់សព្វថ្ងៃនេះ ក៏ដោយសារអាមេរិកត្រូវការមកវិញជាថ្នូរ នូវការគោរពសិទ្ធិមនុស្សពីសំណាក់រដ្ឋាភិបាលហ្វីលីពីន។ ដូច្នេះបើសិនរដ្ឋាភិបាលនេះ បន្តធ្វើសកម្មភាព ដែលផ្ទុយពីគោលការណ៍សិទ្ធិមនុស្ស សហរដ្ឋអាមេរិក អាចនឹងផ្តាច់ជំនួយថវិកា ព្រមទាំងជំនួយយោធា។ ក្រសួងការបរទេសហ្វីលីពីន បានទទួលសាររបស់ស្ថានទូតអាមេរិក ហើយបានសន្យាធ្វើការស៊ើបអង្កេតស៊ីជំរៅ ជុំវិញករណីបាញ់សម្លាប់កន្លងមកនេះ។
បើយោងតាមតួលេខរបស់នគរបាលហ្វីលីពីន បានឲ្យដឹងថា ចាប់ពីខែឧសភាមក មានក្រុមបណ្តាញជួញដូរគ្រឿងញៀន៥៥០នាក់ ត្រូវបានសម្លាប់ និង៨ពាន់ផ្សេងទៀត ត្រូវបានចាប់ឃាត់ខ្លួន។ ដោយឡែក ទូរទស្សន៍ ABS-CBN របស់ហ្វីលីពីន បានផ្សាយថា ក្រៅពីជនសង្ស័យដែលត្រូវបាននគរបាលបាញ់សម្លាប់ បន្ទាប់ពីបានបាញ់តដៃគ្នានោះ គឺមានអ្នកស្លាប់ប្រមាណជា៤០០នាក់ផ្សេងទៀត ដែលមិនមានអាវុធនៅនឹងដៃទេ។ ការបាញ់សម្លាប់មនុស្សឆៅៗរាប់រយនាក់បែបនេះ រដ្ឋាភិបាលហ្វីលីពីន ត្រូវធ្វើការស៊ើបអង្កេតបង្ហាញការពិតឲ្យបានច្បាស់លាស់។
គួររំលឹកផងដែរថា លោករ៉ូឌ្រីហ្គោ ឌុយទែតឺ បានឈ្នះឆ្នោត ក៏ដោយសារតែលោកបានសន្យាថានឹងបោសសម្អាតអំពើពុករលួយ នឹងបណ្តាញជួញដូរគ្រឿងញៀននៅហ្វីលីពីន ឲ្យសាបវិនាស។ កាលពីខែកក្កដាកន្លងទៅ លោកប្រធានធិបតីនេះ បានទាំងថ្លែងថារឿងគោរពសិទ្ធិមនុស្សជារឿងផ្សេង រឿងបោសសម្អាតក្រុមជួញដូរគ្រឿងញៀនជារឿងផ្សឹង។ ក៏បន្តែ វិធានការបាញ់សម្លាប់ឆៅៗ មិនរើសមុខ ក្រៅប្រព័ន្ធតុលាការបែបនេះ កំពុងតែធ្វើឲ្យលោកប្រធានាធិបតីហ្វីលីពីន រងការរិះគន់កាន់តែខ្លាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ