កូរ៉េខាងជើងប្រកាសពង្រឹងសមត្ថភាពនុយក្លេអ៊ែរដើម្បីការពារខ្លួនប្រឈមនឹងការគំរាមរបស់អាមេរិក
ថ្លែងនៅលើវេទិកានៃមហាសន្និបាតអង្គការសហប្រជាជាតិក្នុងទីក្រុងញូយ៉ក សហរដ្ឋអាមេរិក លោករដ្ឋមន្រ្តីក្រសួងការបរទេសកូរ៉េខាងជើងរី ជុងហូបានថ្លែងបញ្ជាក់ជាផ្លូវការនៅចំពោះមុខសហគមន៍អន្តរជាតិថា ក្រុងព្យុងយ៉ាងនឹងបន្តកម្មវិធីនុយក្លេអ៊ែររបស់ខ្លួនជាបន្តទៀត។ តាមលោករី ជុងហូ កម្មវិធីនុយក្លេអ៊ែរជាមធ្យោបាយតែមួយគត់ដែលអនុញ្ញាតិឲ្យកូរ៉េខាងជើងការពារខ្លួនប្រឈមនឹងការគំរាមកំហែងរបស់អាមេរិក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
ការដែលកូរ៉េខាងជើងបានប្រើវេទិកាអង្គការសហប្រជាជាតិដើម្បីបញ្ជាក់ពីមហិច្ឆតានុយក្លេអ៊ែររបស់ខ្លួនពេលនេះជាសក្ខីកម្មមួយដែលស ឲ្យឃើញថា របបកម្មុយនិស្តក្រុងព្យុងយ៉ាងមិនខ្លាចរអាចំពោះទ័ណ្ឌកម្មរបស់សហគមន៍អន្តរជាតិឡើយ។ មួយវិញទៀត ការប្រកាសបន្តអភិវឌ្ឍន៍កម្មវិធីនុយក្លេអ៊ែររបស់ខ្លួនពេលនេះក៏បានធ្វើឡើង ២សប្តាហ៍ក្រោយពីកូរ៉េខាងជើងបានសាកល្បងនុយក្លេអ៊ែរជាលើកទី៥។ ថ្លែងនៅចំពោះមុខសហគមន៍អន្តរជាតិក្នុងទីក្រុងញូយ៉ក លោកប្រមុខការទូតកូរ៉េខាងជើងរី ជុងហូបានអះអាងថា ក្រុងព្យុងយ៉ាងប្តេជ្ញាចិត្តនឹងពង្រឹងគ្រប់កម្លាំងដើម្បីបង្កើនសមត្ថភាពនុយក្លេអ៊ែរ។
លោករី ជុងហូបានបន្ថែមថា ការចង់ក្លាយខ្លួនជាមហាអំណាចនុយក្លេអ៊ែរមិនមែនជារឿងចៃដន្យទេ តែជានយោបាយរបស់រដ្ឋកូរ៉េខាងជើង និងថា សេចក្តីសម្រេចចិត្តក្នុងការពង្រឹងអាវុធនុយក្លេអ៊ែរទាំងបរិមាណ និងគុណភាព គឺជាមធ្យោបាយតែមួយគត់ដើម្បីស្វ័យការពារខ្លួនប្រឈមនឹងការគំរាមកំហែងពីបរទេស ពិសេសពីសហរដ្ឋអាមេរិក។ សូមជម្រាបជូនថាគិតតាំងពីឆ្នាំ ២០០៦ មក កូរ៉េខាងជើងបានធ្វើការសាកល្បងនុយក្លេអ៊ែរចំនួន ៥ដង និងដែលលើកទី៥ចុងក្រោយត្រូវបានគេមើលឃើញថា មានទ្រង់ទ្រាយធំ និងលក្ខណៈធ្ងន់ធ្ងរជាងមុន។
ក្រៅពីការសាកល្បងនុយក្លេអ៊ែរ កូរ៉េខាងជើងក៏ធ្លាប់បានធ្វើការបាញ់សាកល្បងគ្រាប់មីស៊ីលអន្តរជាតិប្រមាណជា ២០លើកដែរ។ ទង្វើសាកល្បងនុយក្លេអ៊ែរ និងបាញ់សាកល្បងគ្រាប់មីស៊ីលជាការរំលោភបំពានលើសេចក្តីសម្រេចចិត្តរបស់អង្គការសហប្រជាជាតិ និងត្រូវបានសហគមន៍អន្តរជាតិថ្កោលទោស និងដាក់ទ័ណ្ឌកម្ម។ នៅលើវេទិកានៃមហាសន្និបាតអង្គការសហប្រជាជាតិឆ្នាំ ២០១៦ នេះ មានប្រទេសជាច្រើនបានជំរុញឲ្យមានការដាក់ទ័ណ្ឌកម្មថ្មីលើរបបក្រុងព្យុងយ៉ាង។ លោកនាយករដ្ឋមន្រ្តីជប៉ុនស្ហ៊ីនហ្សូ អាបេបានទាមទារឲ្យពិភពលោកស្វែងរកមធ្យោបាយទប់កូរ៉េខាងជើង និងព្រមានថា ការគំរាមកំហែងរបស់ក្រុងព្យុងយ៉ាងបានឡើងដល់កម្រិតគ្រោះថ្នាក់ខ្លាំងដែលគេមិនអាចបន្តឈរឱបដៃមើលទៀតបានទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ