ការគំរាមរបស់កូរ៉េខាងជើងខ្លាំងជាងអ្វីដែលគេគិតទុកទៅទៀត
ក្រោយការសាកល្បងនុយក្លេអ៊ែរលើកទី៥របស់កូរ៉េខាងជើង ប្រជាជនកូរ៉េខាងត្បូងមិនបានបង្ហាញការបារម្ភ រឺភាពតានតឹងអ្វីទេ។ ដោយឡែក ក្រុមជំនាញនិងសារព័ត៌មានកូរ៉េខាងត្បូងបាននាំគ្នាស្រមៃគិតពី ការវាយប្រហារនុយក្លេអ៊ែររបស់ក្រុងព្យុងយ៉ាង ទៅលើក្រុងសេអ៊ូល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៥
ប្រជាជនកូរ៉េខាងត្បូងមិនសំដែងការបារម្ភ ចំពោះការសាកល្បងនុយក្លេអ៊ែរលើកទី៥របស់កូរ៉េខាងជើង ក៏ដោយសារពួកគេមានភាពស៊ាំ ទៅនឹងការផ្គើននុយក្លេអ៊ែរ រឺការបាញ់មីស៊ីលរបស់ក្រុងព្យុងយ៉ាងរាប់ទសវត្សមកហើយដែរ។
ការសាកល្បងនុយក្លេអ៊ែររបស់ក្រុងព្យុងយ៉ាង លើកទី៥ កាលពីថ្ងៃសុក្រ បានធ្វើអោយក្រុមជំនាញនិងសារព័ត៌មាន បើកភ្នែកធំៗ ព្រោះថា ការគំរាមនុយក្លេអ៊ែររបស់កូរ៉េខាងជើងពេលនេះ ខ្លាំងជាងអ្វីដែលគេធ្លាប់គិតទៅទៀត។ អាវុធនុយក្លេអ៊ែរ ដែលក្រុងព្យុងយ៉ាងបាញ់សាកល្បង ថ្ងៃសុក្រកន្លងទៅ អាចមានកម្លាំងដល់ទៅ១០គីឡូតោន មានអនុភាពលើសពីនុយក្លេអ៊ែរដែលក្រុងព្យុងយ៉ាងបានបាញ់សាក កាលពីខែមករា ដល់ទៅ២ដង។
ទីភ្នាក់ងារកូរ៉េយ៉ុងហាប់ បានក្រើនរំលឹកឡើងវិញ នូវការសិក្សារបស់មជ្ឈមណ្ឌលអាមេរិកមួយកន្លែង។ មជ្ឈមណ្ឌលនេះធ្លាប់រំពឹងថា ការផ្ទុះគ្រាប់១០គីឡូតោន ទៅលើក្រុងសេអ៊ូល អាចសម្លាប់មនុស្ស២សែន៣ម៉ឺន៥ពាន់នាក់។ ទោះយ៉ាងនេះក្តី ក៏នុយក្លេអ៊ែរដែលកូរ៉េខាងជើងបាញ់សាកលើកទី៥ មិនទាន់ខ្លាំងដល់គ្រាប់បែកដែលបានកំទេចក្រុងហ៊ីរ៉ូស្ហ៊ីម៉ា ឆ្នាំ១៩៤៥ទេ។ គ្រាប់បែកនុយក្លេអ៊ែរអាមេរិកដែលកំទេចក្រុងហ៊ីរ៉ូស្ហ៊ីម៉ា កាលនោះ មានកម្លាំង១៥គីឡូតោន។
មុនបាញ់សាកល្បងនុយក្លេអ៊ែរជាលើកទី៥ កូរ៉េខាងជើងក៏ធ្លាប់ធ្វើតេស្តមីស៊ីលច្រើនដងមកហើយដែរ ក្នុងនោះមានការបាញ់ចេញពីនាវាមុជទឹកមួយគ្រឿងផងដែរ។ រដ្ឋាភិបាលកូរ៉េខាងត្បូងកំពុងបារម្ភថា សមត្ថភាពនុយក្លេអ៊ែររបស់កូរ៉េខាងជើងកាន់តែល្អប្រសើរជាងមុន ហើយក៏កាន់តែលឿនទៅមុខ ប្រៀបនឹងពេលកន្លងមក។
កាលពីថ្ងៃសុក្រ ក្រុងព្យុងយ៉ាងបានអួតដែរថា បានទទួលជោគជ័យក្នុងការសាកល្បងក្បាលគ្រាប់នុយក្លេអ៊ែរ ដែលអាចបំពាក់មីស៊ីលបាន។ ក្រោយការបាញ់សាកនុយក្លេអ៊ែររបស់ក្រុងព្យុងយ៉ាង លោកអូបាម៉ាបានប្រកាសយល់ព្រមធ្វើការជាមួយក្រុមប្រឹក្សាសន្តិសុខអង្គការសហប្រជាជាតិ និងមហាអំណាចផ្សេងៗ ដើម្បីពង្រឹងទណ្ឌកម្មដែលធ្លាប់ដាក់លើក្រុងព្យុងយ៉ាងកន្លងមក។ កូរ៉េខាងជើងឯណោះវិញ ប្រកាសទៅវិញថា មិនចុះចាញ់នឹងអាមេរិកទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ