ប៉ាគីស្ថាន ៖ សង្គ្រាមប្រឆាំងភេរវនិយមចំណាយអស់១១៨ពាន់លានដុល្លារ
ការចូលចំណែកធ្វើសង្គ្រាមប្រឆាំងនឹងភេរវនិយម បានធ្វើឱ្យប៉ាគីស្ថានចំណាយអស់១១៨ពាន់លានដុល្លារអាមេរិក ក្នុងរយៈពេល១៤ឆ្នាំ ពោលគឺស្មើនឹងជាងមួយភាគបីនៃផលិតផលសរុបក្នុងស្រុករបស់ប្រទេស។ នេះបើតាមការសិក្សារបស់ធនាគារកណ្តាលប៉ាគីស្ថាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
របាយការណ៍ប្រចាំឆ្នាំរបស់ធនាគារកណ្តាលប៉ាគីស្ថាន បានបង្ហាញថា អំពើហិង្សាជ្រុលនិយម បានធ្វើឱ្យប្រទេសខាតបង់ ដោយផ្ទាល់ និងដោយប្រយោលអស់ប្រាក់ប្រមាណ១១៨៣០០លានដុល្លារ នៅរវាងពីឆ្នាំ២០០២ ដល់ឆ្នាំ២០១៦។ ចំណែកឯកំណើនសេដ្ឋកិច្ច ក៏ដូចជាការអភិវឌ្ឍន៍សង្គម បានរងផលប៉ះពាល់យ៉ាងខ្លាំង អំពីអំពើហិង្សាភេរវនិយម។ នេះបើតាមការលម្អិតរបស់របាយការណ៍ដដែល។
ប៉ាគីស្ថានបានធ្លាក់ក្នុងអន្លង់ហិង្សាជ្រុលនិយមយ៉ាងជ្រៅ ក្រោយពីបានក្លាយខ្លួនជាសម្ព័ន្ធមិត្តដ៏សំខាន់របស់សហរដ្ឋអាមេរិក ក្នុងសង្គ្រាមប្រយុទ្ធប្រឆាំងនឹងពួកភេរវនិយម សងសឹកក្រោយមានមហាភេរវកម្មថ្ងៃ១១កញ្ញា ២០០១ ដែលជំរុញឱ្យអាមេរិកចូលឈ្លានពានប្រទេសអាហ្វហ្កានីស្ថាន។
សហរដ្ឋអាមេរិកបានបង្កើត មូលនិធិគាំទ្រកងសម្ព័ន្ធមិត្ត ដើម្បីជួយប៉ាគីស្ថាន ជាមួយនឹងការចាក់បញ្ចូលថវិកាមួយពាន់លានដុល្លារ ក្នុងមួយឆ្នាំ។ គិតមកទល់ឆ្នាំ២០១៥ ប៉ាគីស្ថានបានទទួលជំនួយ១៤ពាន់លានដុល្លារ។
បើតាមរបាយការណ៍ ក្រៅអំពីត្រូវរងទុក្ខសោក មានមនុស្សស្លាប់ របួស ប្រជាជនត្រូវភៀសខ្លួនចេញដោយមូលហេតុហិង្សា សង្គ្រាមប្រឆាំងនឹងភេរវនិយមបានធ្វើឱ្យអ្នកវិនិយោគបរទេសខ្លាច និងរត់ចេញ វិនិយោគក្នុងតំបន់ត្រូវអាក់ខាន ការនាំចេញត្រូវកកស្ទះ ពាណិជ្ជកម្មត្រូវដើរបន្ថយល្បឿន។
ប៉ាគីស្ថាន ទើបបានបើកយុទ្ធនាការយោធាទ្រង់ទ្រាយធំមួយប្រឆាំងនឹងពួកតាលីបង់ ព្រមទាំងក្រុមប្រដាប់អាវុធជ្រុលនិយមជាច្រើនផ្សេងទៀត នៅតាមតំបន់កុលសម្ព័ន្ធជាប់ព្រំដែនអាហ្វហ្កានីស្ថាន។ យុទ្ធនាការនេះ បានកាត់បន្ថយអំណាច និងសកម្មភាពបំផ្លិចបំផ្លាញរបស់ពួកជ្រុលនិយម ឯចំនួនជនរងគ្រោះក៏បានធ្លាក់ចុះគួរឱ្យកត់សម្គាល់នៅឆ្នាំ២០១៥-១៦។ សេដ្ឋកិច្ចជាតិ ក៏បានប្រសើរឡើងបន្តិច។ មូលនិធិរូបិយវត្ថុអន្តរជាតិ បានអះអាងកាលពីខែតុលាថា ប៉ាគីស្ថានបានដើរចេញពីវិបត្តិហើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ