ចិន៖មានស្លាប់យ៉ាងតិច ៦៥នាក់នៅក្នុងគ្រោះថ្នាក់បាក់រលំការដ្ឋានសាងសង់នៅមជ្ឈមណ្ឌលអគ្គិសនី
នៅក្នុងប្រទេសចិន គ្រោះថ្នាក់បាក់រលំការដ្ឋានសាងសង់មួយនៅក្នុងមជ្ឈមណ្ឌលអគ្គិសនីបានបណ្តាលឲ្យមានមនុស្សស្លាប់យ៉ាងតិច ៦៥នាក់។ ឧប្បត្តិហេតុគ្រោះថ្នាក់ថ្មីនេះបានកើតឡើងនៅព្រឹកថ្ងៃព្រហស្បតិ៍ ទី២៤ វិច្ឆិកានេះនៅក្នុងខេត្តចាងស៊ី។ តួលេខនៃចំនួនអ្នកស្លាប់នឹងអាចកើនឡើង ព្រោះនៅមានកម្មករជាច្រើនទៀតកំពុងបន្តស្ថិតជាប់គាំងនៅក្រោមគំនរផ្ទាំងថ្ម និងផ្ទាំងដែក។ ក្រុមជួយសង្រ្គោះ និងកម្មកររួមការងារផ្សេងទៀតកំពុងកកាយស្រង់អ្នកដែលជាប់ក្រោមគំនរថ្ម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
គឺនៅវេលាម៉ោង ៧ព្រឹក ម៉ោងក្នុងប្រទេសចិននាថ្ងៃព្រហស្បតិ៍ ទី២៤ វិច្ឆិកានេះដែលការដ្ឋានសាងសង់នៅមជ្ឈមណ្ឌលអគ្គិសនីក្នុងខេត្តចាងស៊ីបានរលំស្រុតចុះជាមួយនឹងវត្តមានកម្មករជាច្រើននាក់ដែលកំពុងធ្វើការ។ រូបភាពវីដេអូដែលផ្សព្វផ្សាយដោយបណ្តាញសារព័ត៌មានក្នុងស្រុកបានបង្ហាញឲ្យឃើញនូវផ្ទាំងថ្ម និងផ្ទាំងដែកធំៗរលំបាក់ដោយនាំទៅជាមួយនូវជីវិតកម្មករដែលកំពុងធ្វើការ។ កម្មករខ្លះបានស្លាប់ភ្លាមៗ និងខ្លះទៀតបន្តជាប់គាំងនៅក្រោមគំនរថ្ម និងដែក។ ប្រភពព័ត៌មានខ្លះបានប្រាប់ឲ្យដឹងថា មានកម្មករចំនួន ៦៨នាក់បានមានវត្តមាននៅពេលកើតគ្រោះថ្នាក់។
ភ្លាមៗក្រោយឧប្បត្តិហេតុ រដ្ឋអំណាចបានបញ្ជូនរថយន្តសង្រ្គោះចំនួន ៣២គ្រឿង ទាហានចំនួន ២១២នាក់ និងសត្វឆ្កែចំនួន ៩ក្បាលដើម្បីស្វែងរកអ្នករស់រានមានជីវិតដែលជាប់កុននៅក្រោមគំនរថ្មបាក់បែក។ ទន្ទឹមគ្នានេះ កម្មកររួមការងារដែលបានរួចជីវិតក៏បានចូលរួមជួយស្វែងរកមិត្តរួមការងារជាមួយក្រុមជួយសង្រ្គោះដែរ។ យ៉ាងណាក៏ដោយ គ្រោះថ្នាក់ថ្មីនៅក្នុងមជ្ឈមណ្ឌលអគ្គិសនីនេះជាសក្ខីកម្មថ្មីមួយទៀតដែលបញ្ជាក់ពីការធ្វេសប្រហែសផ្នែកសន្តិសុខរបស់រដ្ឋាភិបាលចិននៅតាមមជ្ឈមណ្ឌល និងទីតាំងឧស្សាហកម្មធំៗដែលកំពុងរីកដុះដាលដូចផ្សិត។
តាមតួលេខផ្តល់ដោយរដ្ឋបាលទទួលបន្ទុកសន្តិសុខការងារឲ្យដឹងថា គ្រាន់តែក្នុង ៦ខែដើមឆ្នាំ ២០១៦ នេះ មានគ្រោះថ្នាក់កើតឡើងចំនួន ៣៣ ០០០ដងដោយបានសម្លាប់ជីវិតមនុស្សជិត ២០ ០០០នាក់។ ជាក់ស្តែងនាខែសីហាកន្លងទៅ គ្រោះថ្នាក់ផ្ទុះនៅក្នុងមជ្ឈមណ្ឌលអគ្គិសនីហ៊ូបេបានបណ្តាលឲ្យស្លាប់មនុស្សប្រមាណជា ២០នាក់។
កំណើនគ្រោះថ្នាក់នៅមជ្ឈមណ្ឌល និងទីតាំងឧស្សាហកម្មធំៗក្នុងប្រទេសចិនបានកើតចេញពីការត្រួតពិនិត្យផ្នែកសន្តិសុខមិនដិតដល់ ការកេងចំណេញរបស់ឈ្មួញ និងអំពើពុករលួយរបស់មន្រ្តីរដ្ឋការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ