ចិន៖រដ្ឋាភិបាលផ្តើមរឹតបន្តឹងទប់ស្កាត់លំហូរលុយរបស់ពលរដ្ឋទៅបរទេស
នៅក្នុងប្រទេសចិន រដ្ឋាភិបាលបានរឹតបន្តឹងការប្តូរពីលុយយ័នទៅជាលុយបរទេសរបស់ពលរដ្ឋចិន។ កម្មវត្ថុ គឺដើម្បីទប់ស្កាត់កុំឲ្យពលរដ្ឋចិននាំលុយបរទេសចេញប្រទេសកំណើតទៅទុកនៅបរទេស។ ចាប់ពីពេលនេះតទៅ ពលរដ្ឋចិនណាដែលមានបំណងចង់ប្តូរពីប្រាក់យ័នទៅជាប្រាក់បរទេស ដូចយ៉ាងដុល្លារអាមរិកជាដើម នឹងត្រូវផ្តល់ព័ត៌មានបន្ថែមឲ្យធនាគាររបស់ខ្លួន ពិសេសអំពីប្រភពទឹកលុយ និងគោលដៅនៃការប្តូរប្រាក់។
ចុះផ្សាយនៅថ្ងៃ៖
ស្តាប់ - ០១:៤៦
ជារៀងរាល់ឆ្នាំមកទល់ពេលនេះ ពលរដ្ឋចិនអាចយកលុយយ័នទៅដូរយកលុយបរទេសក្នុងបរិមាណច្រើនបំផុតស្មើនឹង ៥០ ០០០ដុល្លារ។ នៅក្នុងការដូរនោះទៀតសោត ម្ចាស់លុយអាចបង្ហាញធនាគាររបស់ខ្លួនត្រឹមអត្តសញ្ញាណប័ណ្ណគឺគ្រប់គ្រាន់។ តែចាប់ពីពេលនេះទៅ និងដើម្បីចៀសវាងកុំឲ្យមានការប្តូរពីលុយយ័នទៅលុយបរទេសដោយលួចលាក់លើសពីកម្រិតអនុញ្ញាត រដ្ឋាភិបាលបានផ្តើមរឹតបន្តឹងការត្រួតពិនិត្យការបញ្ជូនលុយចេញទៅបរទេស ពិសេសពីប្រភពដើមរបស់លុយទាំងនោះ។
គ្រប់ការបញ្ជូនលុយទៅបរទេសលើសពី ២៩ ០០០ដុល្លារ ធនាគាររបស់ម្ចាស់លុយនឹងត្រូវផ្តល់ព័ត៌មានទៅឲ្យធនាគារកណ្តាល។ សូមជម្រាបជូនថា វិធានការថ្មីរបស់ប្រទេសចិនពេលនេះបានធ្វើឡើង បន្ទាប់ពីចិនបានស្គាល់លំហូរលុយពីក្នុងស្រុកទៅកាន់បរទេសយ៉ាងសម្បើមនារយៈពេលចុងក្រោយនេះ។ ជាក់ស្តែងក្នុងឆ្នាំ ២០១៥ លំហូរលុយពីក្នុងស្រុកទៅបរទេសមានដល់ទៅ ១ ០០០ ០០០លានដុល្លារ ហើយក្នុងឆ្នាំ ២០១៦ ដែលទើបកន្លងផុតទៅមាន ជិត ៧០០ ០០០លានដុល្លារ។
ជាមួយនឹងស្ថានភាពសេដ្ឋកិច្ចមិនសូវល្អ និងតាំងពីលោកដូណាល់ ត្រាំជាប់ឆ្នោតជាប្រធានាធិបតីអាមេរិកមក តម្លៃប្រាក់យ័នចិនបានធ្លាក់ថ្លៃខ្លាំងធៀបនឹងប្រាក់ដុល្លារដែលបានធ្វើឲ្យពលរដ្ឋចិននាំគ្នាយកលុយយ័នដូរយកលុយដុល្លារដើម្បីយកទៅទុកនៅធនាគារក្រៅប្រទេសដែលមានការប្រាក់ខ្ពស់។ ទង្វើរបស់ពលរដ្ឋចិនរបៀបនេះបានធ្វើឲ្យលុយយ័នធ្លាក់ថ្លៃកាន់តែខ្លាំង និងបានជំរុញឲ្យធនាគារកណ្តាលចេញធ្វើអន្តរាគមន៍ជួយស្រោចស្រង់តម្លៃប្រាក់យ័ន។
គ្រាន់តែនៅក្នុងមួយខែវិច្ឆិកា ឆ្នាំ ២០១៦ ធនាគារកណ្តាលចិនបានបញ្ចេញលុយបរទេសជិត ៧០ ០០០លានដុល្លារដើម្បីប្រមូលទិញលុយយ័ននៅលើទីផ្សារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ