លោកដូណាល់ ត្រាំ សន្ទនាយ៉ាងកក់ក្តៅជាមួយនាយករដ្ឋមន្រ្តីឥណ្ឌា
នាយករដ្ឋមន្រ្តីឥណ្ឌា លោកណារិនដ្រា ម៉ូឌី នៅថ្ងៃពុធទី ២៥ មករា បានអះអាងថា លោកនឹងធ្វើការជាមួយលោកដូណាល់ ត្រាំ ដើម្បីរឹតចំណង ដែលមានស្រាប់ រវាងប្រទេសទាំងពីរ។ នៅក្នុងកិច្ចសន្ទនាតាមទូរស័ព្ទ នៅយប់ថ្ងៃអង្គារទី ២៤មករា ប្រមុខដឹកនាំឥណ្ឌាបានអញ្ជើញផងដែរ លោកដូណាល់ ត្រាំ ឲ្យធ្វើទស្សនកិច្ចផ្លូវនៅឥណ្ឌា។
ចុះផ្សាយនៅថ្ងៃ៖
នៅក្នុងសារTwitter លោកនាយករដ្ឋមន្រ្តីឥណ្ឌា ណារិនដ្រា ម៉ូឌីបានសរសេរថា លោកបានអញ្ជើញប្រធានាធិបតីថ្មីរបស់អាមេរិកឲ្យធ្វើទស្សនកិច្ចនៅប្រទេសឥណ្ឌា។ នៅមុនកិច្ចសន្ទនាតាមទូរស័ព្ទ សេតវិមានបានបង្ហាញថា រដ្ឋបាលលោកដូណាល់ ត្រាំបានអញ្ជើញលោកនាយករដ្ឋមន្រ្តីឥណ្ឌាឲ្យទៅធ្វើទស្សនកិច្ចនៅទីក្រុងវ៉ាស៊ីនតោន នៅក្នុងឆ្នាំនេះ។
ប្រធានាធិបតីអាមេរិកទូរស័ព្ទជាមួយនាយករដ្ឋមន្រ្តីឥណ្ឌា នៅបន្ទាប់ពីឥណ្ឌាធ្លាប់បានអន់ចិត្តដោយសារ នៅក្រោយពេលជាប់ឆ្នោតភ្លាម លោកដូណាល់ ត្រាំ បាននិយាយទូរស័ព្ទយ៉ាងកក់ក្តៅជាមួយនាយករដ្ឋមន្រ្តីប៉ាគីស្ថាន។ ប៉ាគីស្ថានដែលរដ្ឋាភិបាលឥណ្ឌាចាត់ទុកជាជង្រុក សម្បុកក្រុមភេរវនិយម។
ប៉ុន្តែ តាមសេចក្តីប្រកាសព័ត៌មានរបស់សេតវិមាន នៅក្នុងពេលនិយាយទូរស័ព្ទ ជាមួយលោកនាយករដ្ឋមន្រ្តីឥណ្ឌា លោកដូណាល់ ត្រាំបានចាត់ទុកឥណ្ឌាជាមិត្ត និងដៃគូពិតប្រាកដ របស់អាមេរិក។ ប្រមុខដឹកនាំប្រទេសទាំងពីរបានពិភាក្សាគ្នាផងដែរពីឱកាសដើម្បីពង្រឹងភាពជាដៃគូអាមេរិក និងឥណ្ឌា ក្នុងវិស័យសេដ្ឋកិច្ច និងការពារជាតិ។
លោកដូណាល់ ត្រាំ ផ្តោតចំណាប់អារម្មណ៍ទៅលើឥណ្ឌា តាំងពីមុនជាប់ឆ្នោតក្លាយជាប្រធានាធិបតីម្ល៉េះ។ នៅក្នុងយុទ្ធនាការឃោសនារកសំឡេងឆ្នោត លោកដូណាល់ ត្រាំ ធ្លាប់ទាំងបានធ្វើសំឡេងផ្សព្វផ្សាយ ជាភាសាហ៊ីនឌី ដើម្បី ទាក់ទាញសំឡេងគាំទ្រ ពីជនជាតិអាមេរិកាំង ដើមកំណើតឥណ្ឌា។
តាមអ្នកធ្វើអត្ថាធិប្បាយជាច្រើន លោកដូណាល់ ត្រាំ និងក្រុមការងាររបស់លោក ធ្លាប់បានកោតសរសើរជ័យជំនះដ៏ធំធេងរបស់លោកណារិនដ្រា ម៉ូឌីដែលឈ្នះឆ្នោត ក្លាយជានាយករដ្ឋមន្រ្តីឥណ្ឌា នៅឆ្នាំ ២០១៤។ សម្រាប់ក្រុមលោកដូណាល់ ត្រាំ ការជាប់ឆ្នោតរបស់លោកណារិនដ្រា ម៉ូឌី បង្ហាញពីសំឡេងបះបោររបស់ប្រជាជន ដែលជិនណាយ អស់ការជឿទុកចិត្តលើអ្នកនយោបាយ។
ដូចលោកម៉ូឌី លោកដូណាល់ ត្រាំ បានទទួលសំឡេងគាំទ្រពីប្រជាជន ដោយសារជំហរនយោបាយជាតិនិយមរបស់លោក។ ចំណុចដូចគ្នាមួយទៀត គឺប្រមុខដឹកឥណ្ឌា និងអាមេរិក តែងតែប្រើបណ្តាញសង្គម Twitter ជាមធ្យោបាយផ្សព្វផ្សាយរបស់ខ្លួន។ គេអាចនិយាយថា លោកដូណាល់ ត្រាំ និងលោកណារិនដ្រា ម៉ូឌី ជា ប្រធានាធិបតី និងនាយករដ្ឋមន្រ្តី ទាន់សម័យ ដែលបានTwitte ផ្ញើសារច្រើនជាងគេ ក្នុងចំណោមមេដឹកនាំក្នុងពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ