អ.ស.ប.៖ចំនួនជនស៊ីវិលរងគ្រោះមានកំណើនខ្ពស់នៅអាហ្វហ្កានីស្ថានក្នុងឆ្នាំ ២០១៦
នៅថ្ងៃចន្ទ ទី៦ កុម្ភៈនេះ បេសកកម្មជំនួយរបស់អង្គការសហប្រជាជាតិប្រចាំប្រទេសអាហ្វហ្កានីស្ថានហៅកាត់ថា Manua បានចេញផ្សាយរបាយការណ៍ប្រចាំឆ្នាំ ២០១៦ស្តីពីចំនួនជនស៊ីវិលស្លាប់ និងរបួសក្នុងប្រទេសអាហ្វហ្កានីស្ថាន។ របាយការណ៍បានប្រាប់ឲ្យដឹងថា មានជនស៊ីវិលអាហ្វហ្កានីស្ថានជាង ១១ ៥០០នាក់បានស្លាប់ ឬរបួសក្នុងឆ្នាំ ២០១៦ កន្លងទៅ ក្នុងនោះ មាន ១ភាគ៣ ជាកូនក្មេង។
ចុះផ្សាយនៅថ្ងៃ៖
ស្តាប់ - ០២:២៣
ក្នុងចំណោមជនស៊ីវិលរងគ្រោះទាំង ១១ ៤១៨នាក់ក្នុងឆ្នាំ ២០១៦ មានស្លាប់ចំនួន ៤ ៤៩៨នាក់ និងរបួសចំនួន ៧ ៩២០នាក់ ពោលមានការកើនឡើងចំនួន ៣% បើធៀបនឹងឆ្នាំ ២០១៥។ ដោយឡែក ចំនួនជនរងគ្រោះជាកូនក្មេងមានជាង ៣ ៥០០នាក់ ពោលមានការកើនឡើងប្រមាណជា ២៤% បើធៀបនឹងឆ្នាំ ២០១៥ ហើយក្នុងនោះ មានប្រមាណជាពាក់កណ្តាលបានរងគ្រោះដោយជម្លោះប្រដាប់អាវុធរវាងកម្លាំងរដ្ឋាភិបាល និងពួកឧទ្ទាម រួមទាំងដើរជាន់គ្រាប់មីនមិនទាន់ផ្ទុះដែលភាគីជម្លោះបានបង្កៃចោល នេះបើតាមការបញ្ជាក់របស់បេសកកម្មជំនួយនៃអង្គការសហប្រជាជាតិប្រចាំប្រទេសអាហ្វហ្កានីស្ថាន (Manua) នៅក្នុងរបាយការណ៍របស់ខ្លួន។
យោងតាមរបាយការណ៍ដដែល កំណើនចំនួនជនរងគ្រោះក្នុងឆ្នាំ ២០១៦ ជាសក្ខីកម្មមួយដែលបញ្ជាក់ពីកំណើនអសន្តិសុខនៅទូទាំងប្រទេសអាហ្វហ្កានីស្ថាន ពិសេសក្នុងខេត្តទាំង ៣៤។ លោកស្រី Danielle Bell នាយិការសិទ្ធិមនុស្សនៃ Manua បានគូសបញ្ជាក់ពីកំណើនចំនួនជនស៊ីវិលរងគ្រោះដោយការប្រយុទ្ធនៅលើសមរភូមិ ដោយអំពើភេរវកម្មអត្តឃាត និងដោយគ្រាប់ផ្ទុះដែលបបរបង់ចោល។ ដោយឡែក ចំនួនជនស៊ីវិលរងគ្រោះក្នុងឆ្នាំ ២០១៦ ក៏បានរាប់បញ្ចូលពីប្រតិបត្តិការផ្លូវអាកាសរវាងកម្លាំងទ័ពរដ្ឋាភិបាល និងសម្ព័ន្ធមិត្តអាមេរិកដែលបានសម្លាប់មនុស្ស ៥៩០នាក់ ក្នុងនោះមានជនស៊ីវិលស្លូតត្រង់ចំនួន ២៥០នាក់។
សូមជម្រាបជូនថា តាំងពីឆ្នាំ ២០០៩ មកម្ល៉េះដែលស្ថាប័នរបស់អង្គការសហប្រជាជាតិមួយនេះបានផ្តល់តួលេខប្រចាំឆ្នាំស្តីពីចំនួនស៊ីវិលអាហ្វហ្កានីស្ថានរងគ្រោះដោយសារសង្រ្គាមផ្ទៃក្នុង។ គិតមកទល់ពេលនេះ ជម្លោះផ្ទៃក្នុងបានបណ្តាលឲ្យមានមនុស្សស្លាប់ ២៤ ៨៤១នាក់ និងរបួស ៤៥ ៣៤៧នាក់។ តាម Manua ចំនួនជនស៊ីវិលរងគ្រោះបានកើនឡើងខ្លាំងនៅក្នុងតំបន់ធំៗចំនួន ៥ ក្នុងចំណោមតំបន់ធំៗទាំង ៨ ពិសេសនៅប៉ែកខាងត្បូងដែលមានជនស៊ីវិលរងគ្រោះជិត ៣ ០០០នាក់ ក្នុងនោះមានស្លាប់ ១ ០៥៦នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ