ម៉ាឡេស៊ីប្រកាសបណ្តេញពលរដ្ឋកូរ៉េខាងជើង៥០នាក់ចេញពីប្រទេស
ឧបនាយករដ្ឋមន្ត្រីម៉ាឡេស៊ីបានប្រកាសនៅថ្ងៃអង្គារនេះ បណ្តេញពលរដ្ឋកូរ៉េខាងជើង៥០នាក់ ដែលទិដ្ឋាការរបស់ពួកអស់សុពលភាព។ ការបណ្តេញចេញនេះជាករណីលើកលែង បើគិតដល់បម្រាម របស់រដ្ឋាភិបាលហាមឃាត់មិនឱ្យពលរដ្ឋកូរ៉េខាងជើងចាកចេញពីម៉ាឡេស៊ី ក្រោយពីមានហេតុការណ៍ឃាតកម្មសម្លាប់ គីម ជុងណាម បងប្រុសម្តាយទីទៃរបស់គីមជុងអ៊ុន ប្រមុខដឹកនាំកូរ៉េខាងជើង នៅក្រុងគូឡាឡាំពួរ។
ចុះផ្សាយនៅថ្ងៃ៖
តាំងពីមានហេតុការណ៍ធ្វើឃាតលោក គីម ជុងណាម នៅកណ្តាលអាកាសយានដ្ឋានក្រុងគូឡាឡាំពួរ ដោយថ្នាំពុលគីមីមក ទំនាក់ទំនងការទូតរវាងម៉ាឡេស៊ីនិងកូរ៉េខាងជើង បានធ្លាក់ដុនដាបយ៉ាងខ្លាំង រហូតមានការហាមឃាត់មិនឱ្យពលរដ្ឋប្រទេសម្ខាងទៀត ចាកចេញទេ។ ប៉ុន្តែ នៅថ្ងៃនេះ ឧបនាយករដ្ឋមន្ត្រីម៉ាឡេស៊ី បានប្រកាសប្រាប់អ្នកសារព័ត៌មាន ថាកម្មករកូរ៉េខាងជើង ៥០នាក់ ដែលធ្វើការនៅលើកោះBorneo នឹងត្រូវបញ្ជូនចេញពីម៉ាឡេស៊ី ក្នុងពេលឆាប់ៗនេះ។
អាជ្ញាធរម៉ាឡេស៊ី មិនបានផ្តល់ហេតុផលនៃសេចក្តីសម្រេចចិត្តផ្ទុយអំពីបម្រាមរបស់រដ្ឋាភិបាល ដែលហាមឃាត់ កាលពីសប្តាហ៍មុន មិនឱ្យពលរដ្ឋកូរ៉េខាងជើងណាម្នាក់ចាកចេញពីម៉ាឡេស៊ីឡើយ ដោយគ្រាន់តែបញ្ជាក់ថាកម្មករទាំងនោះផុតទិដ្ឋាការ គ្មានសិទ្ធិធ្វើការទៀតទេ។
ព្យុងយ៉ាងនិងគូឡាឡាំពួរ មានទំនាក់ទំនងល្អនឹងល្អរលូននឹងគ្នារហូតមក តែតាំងពីម៉ាឡេស៊ីបដិសេធមិនព្រមប្រគល់សាកសពគីមជុងណាមតាមសំណើ ដោយសំអាងថារង់ចាំ ផ្ទៀងផ្ទាត់អាដេអិនជាផ្លូវការសិនមក កូរ៉េខាងជើងបានច្រឡោតខ្លាំង និងចោទម៉ាឡេស៊ីថាចង់បំផ្លាញរបបព្យុងយ៉ាង។ ភាពតានតឹងក៏បានឡើងប៉ោងខ្លាំង ព្យុងយ៉ាងបង្កើនការរិះគន់ឥតឈប់ការអង្កេតរបស់អាជ្ញាធរគូឡាឡាំពួរ។ ម៉ាឡេស៊ីបានបណ្តេញឯកអគ្គរដ្ឋទូតកូរ៉េខាងជើង ចេញពីគូឡាឡាំពួរ ហើយព្យុងយ៉ាងក៏បានបណ្តេញឯកអគ្គរដ្ឋទូតម៉ាឡេស៊ីចេញពីប្រទេសវិញដែរ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ