ភូមា៖ ចលនាសង្ឃពុទ្ធសាសនាជ្រុលនិយមប្រមូលផ្តុំគ្នា ផ្គើនបំរាមរដ្ឋ
បើទោះបីជាមានបម្រាមពីអាជ្ញាធរធម្មការភូមា និងការប្រកាសរំលាយចលនាពុទ្ធសាសនាជ្រុលនិយម ម៉ាបាថា ក៏ដោយ ក៏សង្ឃ និងសកម្មជនពុទ្ធសាសនាជ្រុលនិយម ជាច្រើននាក់ នៅតែបន្តផ្គើនអាជ្ញាធរ ដោយបានប្រមូលផ្តុំបើកសន្និសីទប្រចាំឆ្នាំ នៅថ្ងៃសៅរ៍នេះ នៅក្នុងវត្តមួយ នាទីក្រុងរ៉ង់ហ្គូន។ ដឹកនាំយ៉ាងសកម្មដោយព្រះសង្ឃវីរ៉ាធុ ចលនាម៉ាបាថា ត្រូវជាប់ចោទបានញ៉ុះញង់ឱ្យមានការស្អប់ខ្ពើមអ្នកកាន់សាសនាអ៊ីស្លាម។
ចុះផ្សាយនៅថ្ងៃ៖
ស្តាប់ - ០២:០៣
ចលនាពុទ្ធសាសនា ជ្រុលនិយម ដ៏មានអំណាចនៅក្នុងប្រទេសភូមា ម៉ាបាថា ត្រូវបានហាមឃាត់ ដោយអាជ្ញាធរធម្មការភូមា កាលពីថ្ងៃ២៣ឧសភា។ រាល់គ្រប់បុគ្គល ឬក្រុមណា ដែលបញ្ចេញសកម្មភាពក្រោមផ្លាក ម៉ាបាថា ត្រូវដកខ្លួនចេញ និងលុបចោលឱ្យអស់នៅនូវរាល់ផ្លាកសញ្ញាម៉ាបាថា ឱ្យបានមុនថ្ងៃទី ១៥កក្កដា បើពុំនោះទេនឹងត្រូវជាប់ទោស !
ប៉ុន្តែការគំរាមកំហែង និងសេចក្តីសម្រេចរបស់អាជ្ញាធរ មិនត្រូវបាន ព្រះសង្ឃ និងឧបាសក ឧបាសិកា ជាសកម្មជនរបស់ចលនាក្លបខ្លាចឡើយ។ សង្ឃជាច្រើនអង្គ ព្រមទាំងសកម្មជន នៅបន្តបើកធ្វើសន្និសីទប្រចាំឆ្នាំក្រោមផ្លាកចលនាម៉ាបាថា នៅថ្ងៃសៅរ៍នេះ តាមការគ្រោងទុកដដែល។
សូមបញ្ជាក់ថា តាំងឆ្នាំ២០១១ ឆ្នាំដែលភូមាចាប់បើកចំហប្រទេស ចំពោះសហគមន៍អន្តរជាតិមក ចលនាពុទ្ធសាសនា ម៉ាបាថា ដែលបង្កើត និងរីកលូតលាស់ខ្លាំងក្នុងសម័យដឹកនាំសឹក បានតាំងខ្លួនជារនាំងការពារនិងបានបង្ហាញ វត្តមាន ព្រមទាំងបញ្ចេញសកម្មភាពខ្លាំង ប្រឈមនឹងរលកអ៊ីស្លាមនៅក្នុងប្រទេស ដែលមានប្រមាណតែ៥%ប៉ុណ្ណោះ។ ក្រុមចលនាសង្ឃពុទ្ធសាសនាជ្រុលនិយមនេះ មិនសំចៃនឹងសាបព្រោះពាក្យសំដី និងសារញុះញង់ឱ្យមានការស្អប់ខ្ពើម និងហិង្សាប្រឆាំងនឹងសហគមន៍អ៊ីស្លាម។
អំពើហិង្សាប្រឆាំងសហគមន៍សាសនាអ៊ីស្លាម រ៉ូហ៊ីងយ៉ា ជនជាតិភាគតិចគ្មានប្រទេសគ្មានសញ្ជាតិ បានផ្ទុះឡើងជាបន្តបន្ទាប់ នារយៈពេលប៉ុន្មានឆ្នាំចុងក្រោយនេះ។ ភាពតានតឹង បានបន្តឆេះសន្ធោសន្ធៅដដែល នៅភាគពាយ័ព្យប្រទេស ដោយទាហានភូមាបានបើកប្រតិបត្តិការទ្រង់ទ្រាយធំតែម្តង។ កាលពីសប្តាហ៍មុន ផ្ទះសម្បែងរបស់ជនជាតិរ៉ូហ៊ីងយ៉ាជាច្រើន នៅក្នុងសង្កាត់ជាយក្រុងរ៉ងហ្គូន ត្រូវដុតបំផ្លាញ។ សម្រាប់អង្គការការពារសិទ្ធិមនុស្ស ភូមាកំពុងតែបើកប្រតិបត្តិការ បោសសម្អាតជាតិពិន្ធុ ដែលមានទម្រង់ជាឧក្រិដ្ឋកម្មប្រឆាំងមនុស្សជាតិ។
លោកស្រីអ៊ុងសានស៊ូជី ក៏ធ្លាប់បានរងការរិះគន់ខ្លាំង ចំពោះការសំងំគ្មានមិនចេញស្តីនឹងអំពើហិង្សារបស់ក្រុមពុទ្ធសាសនិកជ្រុលនិយមលើអ្នកកាន់សាសនាអ៊ីស្លាម។ កាលពីឆ្នាំទៅរដ្ឋាភិបាលថ្មីថ្មោងរបស់លោកស្រីអ៊ុងសានស៊ូជី បានត្រាមចលនានេះ មិនឱ្យសាបព្រោះការស្អប់ខ្ពើមអ៊ីស្លាម ហើយទើបតែចេញបម្រាមរំលាយចលនាកាលពីសប្តាហ៍មុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ