ហ្វីលីពីនទាមទារឲ្យFacebook បិទខ្ទប់ គណនីរបស់ពួកជីហាត
ពួកជីហាតកំពុងប្រើបណ្តាញសង្គមហ្វេសប៊ុក ជាមធ្យោបាយផ្សព្វផ្សាយ ឃោសនាអូសទាញអ្នកគាំទ្រខ្លួន នៅហ្វីលីពីន។ នេះបើតាមការបញ្ជាក់របស់កងទ័ពហ្វីលីពីន ដែលបានស្នើសុំ នៅថ្ងៃសុក្រនេះ ទៅក្រុមហ៊ុនហ្វេសប៊ុក នៅហ្វីលីពីនឲ្យចាត់វិធានបិទជាបន្ទាន់គណនីក្លែងបន្លំ របស់ពួកជីហាត។
ចុះផ្សាយនៅថ្ងៃ៖
នាយកដ្ឋានកងទ័ព ទទួលបន្ទុកផ្នែកបណ្តាញសង្គមនៅហ្វីលីពីន បានរាប់ រកឃើញមានគណនីហ្វេសប៊ុក ជាច្រើន បង្កើតឡើង ដោយក្រុមជីហាត ដែលបានបើកការវាយប្រហារ ចូលលុកលុយ ទីក្រុងម៉ារ៉ាវី របស់កោះមីនដាណាវ។ ពីរសប្តាហ៍មកហើយ កងទ័ពរដ្ឋាភិបាល កំពុងប្រយុទ្ធបណ្តេញពួកឧទ្ទាមអ៊ីស្លាមជ្រុលនិយម Maute ដែលបានភ្ជាប់ខ្លួនទៅក្រុមជីហាតអង្គការរដ្ឋអ៊ីស្លាម នៅប្រទេសស៊ីរី។ ការប្រយុទ្ធគ្នា ដ៏ហិង្សា បានសម្លាប់មនុស្សជាង ២០០នាក់ ដែលនៅក្នុងនោះ ១៣៨នាក់ ជាពួកឧទ្ទាម ៤០នាក់ជាទាហានរដ្ឋាភិបាល និងជនស៊ីវិលប្រមាណ ២០នាក់។
គណនីហ្វេសប៊ុក ប្រមាណ៦៣ របស់ពួកជីហាត ហើយនិងអ្នកមានសមានចិត្តទៅលើក្រុមនេះ កំពុងមានសកម្មភាពមមាញឹក ឃោសនា ផ្សព្វផ្សាយព័ត៌មានមិនពិត ព័ត៌មាន រូបភាពអាក្រក់ៗ ដើម្បីបំភិតបំភ័យមតិមហាជនហ្វីលីពីន។ នេះបើតាមការថ្លែងរបស់អ្នកនាំពាក្យក្រសួងការពារជាតិហ្វីលីពីន។
នៅក្នុងសន្និសីទកាសែត នៅថ្ងៃសុក្រនេះ នៅទីក្រុងម៉ារ៉ាវី អ្នកនាំពាក្យរបស់ក្រសួងការពារជាតិហ្វីលីពីនបានស្នើសុំឲ្យក្រុមហ៊ុនហ្វេសប៊ុកនៅហ្វីលីពីន ចាត់វិធានការចាំបាច់ ដើម្បីបិទគណនីរបស់ពួកជីហាត ដែលកំពុងប្រយុទ្ធតដៃនឹងកងទ័ពរដ្ឋាភិបាល នៅទីក្រុងម៉ារ៉ាវី។ ហ្វេសប៊ុកនៅហ្វីលីពីនមិនទាន់បានឆ្លើយតបនឹងការទាមទាររបស់អាជ្ញាធរហ្វីលីពីននៅឡើយទេ។
ក្រុមជីហាតអង្គការរដ្ឋអ៊ីស្លាម ដែលបានប្រកាសបង្កើតរដ្ឋកាលីហ្វា នៅស៊ីរី និងនៅអ៊ីរ៉ាក់ បានប្រើបណ្តាញសង្គម នៅលើអ៊ីនធ័រនែត ដើម្បីផ្សព្វផ្សាយអំពើព្រៃផ្សៃ និងមនោគមវិជ្ជាអូសទាញរបស់ខ្លួន។ គេវាយម្លៃថា សមាជិកប្រយុទ្ធរបស់ក្រុមជីហាតជាច្រើននាក់ មកពីអឺរ៉ុប អាស៊ី ត្រូវបានរើសបញ្ចូល តាមរយៈបណ្តាញសង្គមនេះឯង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ