ចិនដោះលែងសកម្មជនសិទ្ធិមនុស្សXu Zhiyong
អាជ្ញាធរចិនបានដោះលែងសកម្មជនសិទ្ធិមនុស្ស Xu Zhiyong ស្ហ៊ូ ជីយុង ពីពន្ធនាគារនៅថ្ងៃសៅរ៍១៥កក្កដានេះ ក្រោយបានឃុំរូបលោកអស់រយៈពេល៤ឆ្នាំមក។ មេធាវីរបស់លោក Xu បានប្រាប់ថា លោក Xu មានសុខភាពល្អជាទេ ហើយលោកបានដឹងថា សកម្មជនប្រឆាំង លីវ ស៊ាវប៉ូ បានទទួលមរណភាព។
ចុះផ្សាយនៅថ្ងៃ៖ កែប្រែថ្ងៃទី៖
សកម្មជនសិទ្ធិមនុស្សចិន Xu Zhiyong ត្រូវបានចិនចាប់ខ្លួន កាលពីឆ្នាំ២០១៣ និងដាក់ទោសលោកពីបទប្រមូលផ្តុំមនុស្ស ធ្វើអោយប៉ះពាល់ដល់សណ្តាប់ធ្នាប់សាធារណៈ។ ក្រោយឃុំលោកXu Zhiyong អស់៤ឆ្នាំមក ចិនបានដោះលែងលោក អោយមានសេរីភាពឡើងវិញ នៅថ្ងៃសៅរ៍សប្តាហ៍នេះ។
លោក Xu Zhiyong ជាសាស្ត្រាចារ្យច្បាប់ នៅសកលវិទ្យាល័យក្រុងប៉េកាំង។ លោកជាសកម្មជននៃចលនាប្រឆាំងអំពើពុករលួយនៅចិន។ ចលនានេះមានឈ្មោះថា “ពលរដ្ឋថ្មី” ជាចលនាទាមទារអោយបណ្តាថ្នាក់ដឺកនាំប្រទេស បង្ហាញតម្លាភាព បង្ហាញទ្រព្យសម្បត្តិផ្ទាល់ខ្លួនជាសាធារណៈ។ ដូច្នេះ គឺស្របតាមនយោបាយប្រយុទ្ធប្រឆាំងអំពើពុករលួយរបស់រដ្ឋាភិបាលចិន។ គេស្គាល់លោក Xu Zhiyong ច្បាស់ នៅចិន ចាប់ពីឆ្នាំ២០០៣មក។ កាលនោះ លោក Xu បានធ្វើសកម្មភាពជួយអ្នកដែលរងគ្រោះដោយសារពុលផលិតផលទឹកដោះ និងជួយជនអន្តោប្រវេសន៍ដែលមិនអាចទទួលបានសិទ្ធិរៀនសូត្រ រឺសិទ្ធិព្យាបាលជំងឹ។
កាលពីឆ្នាំ២០១៤ លោក Xu បានបដិសេធមិនការពារខ្លួន ក្នុងសវនាការ។ បើយោងតាមមេធាវី លោកចង់បរិហារពីនិតិវិធីច្បាប់ ដែលស្ថិតក្រោមការត្រួតពិនិត្យ បរិហារសាលក្រមតុលាការដែលគេគិតថា អាចត្រូវបានរៀបចំទុកមុនរួចជាស្រេចទៅហើយ។ សកម្មជនគាំទ្រលោក Xu Zhiyong ប្រាប់ថា ពួកគេមិនអាចចូលទៅអគារដែលលោក Xu Zhiyong ស្នាក់នៅទេ ដោយសារនៅទីនោះ មានអ្នកយាមសន្តិសុខ និងមនុស្សស្លៀកពាក់ស៊ីវិលមួយចំនួន ហាមឃាត់ពួកគេ។ អាជ្ញាធរចិនតែងបន្តឃ្លាំមើលសកម្មជនប្រឆាំងល្បីៗ ដែលខ្លួនបានដោះលែងអោយមានសេរីភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ