ចិនប្រកាសដោះលែងភរិយាលោក លីវ ស៊ាវប៉ូ
ពិធីបូជាសពលោក លីវ ស៊ាវប៉ូ ជ័យលាភីរង្វាន់ណូបែលសន្តិភាព ប្រព្រឹត្តទៅនៅថ្ងៃសៅរ៍នេះ ដោយស្ងប់ស្ងាត់ និងឆ្ងាយពីភ្នែកច្រមុះអ្នកសារព័ត៌មាន។ ចំណែកលោកស្រី លីវ ស្យ៉ា ជាភរិយា ដែលជាប់ឃុំឃាំងក្នុងគេហដ្ឋានដំនាលគ្នានឹងលោកលីវស៊ាវប៉ូជាស្វាមីដែរ បានទទួលសេរីភាពហើយនៅថ្ងៃនេះ។ នេះបើតាមការអះអាងរបស់សារព័ត៌មានផ្លូវការចិន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤២
ពិធីបូជាសពលោក លីវស៊ាវប៉ូ ត្រូវបានផ្សព្វផ្សាយដោយអាជ្ញាធរ ៖ បង្ហាញរូបលោកស្រី លីវ ស្យ៉ា ពាក់វែនតាខ្មៅ ទឹកមុខក្រៀមក្រំ នៅចំពោះមុខសពលោក លីវ ស៊ាវប៉ូជាស្វាមី រូបថតសមាជិកក្រុមគ្រួសារអោនគោរពសពនិងដាក់ផ្កាជាការគោរពលា ... ពិធីបុណ្យសព តាមសំណើរបស់គ្រួសារសព និងតាមប្រពៃណីចិនភាគខាងជើង (បូជាបីថ្ងៃក្រោយស្លាប់) បានចប់សព្វគ្រប់ហើយ ! ធាតុរបស់លោក លីវ ស៊ាវប៉ូ ក៏បានប្រគល់ទៅឱ្យលោកស្រីលីវ ស្យ៉ា ជាភរិយាដែរ ! ធាតុដែលនឹងត្រូវបាចចោលនៅសមុទ្ទ។ នេះជាសេចក្តីប្រកាសរបស់អាជ្ញាធរតំបន់ ក្នុងសន្និសីទកាសែត ដោយបានច្រានចោលរាល់គំនិតរិះគន់ទាំងឡាយដែលថា អាជ្ញាធរប្រញាប់បូជាសពលោក លីវ ស៊ាវប៉ូពេក។
អាជ្ញាធរស្រុក បានអះអាងដែរថាចាប់ពេលនេះទៅ លោកស្រី លីវ ស្យ៉ា បានទទួលសេរីភាពហើយ គ្រាន់តែថាក្នុងពេលកាន់ទុក្ខស្វាមីនេះ លោកស្រី លីវ ស្យ៉ា មានសំណូមពរមួយគឺ មិនសូវចង់ទទួលភ្ញៀវទេ។ តើលោកស្រីបានទទួលសេរីភាពបែបណា ? ពុំមានអ្វីបញ្ជាក់ទេត្រង់ចំណុចនេះឡើយ ! លោក ចង់ កាំងយ៉ាង បានប្រាប់ថានឹងផ្តល់ព័ត៌មានទៅតាមកាល។
ជាកវីតែងកំណាព្យ និងជាងថតរូប លោកស្រី លីវ ស្យ៉ា ភរិយាសពលីវ ស៊ាវប៉ូ បានទទួលការអនុញ្ញាតឱ្យមកនៅថែទាំងក្បែរស្វាមី នៅមន្ទីរពេទ្យរហូតដល់ផុតដង្ហើម តែមិនអាចទាក់ទងជាមួយពិភពខាងក្រៅបានទេ។ ពីមុនមក លោកស្រីក៏ត្រូវបានអនុញ្ញាតឱ្យទៅជួបប្តីម្តងម្កាលនៅពន្ធនាគារ។ គ្មានទទួលបានការកាត់ទោស ឬជាប់ចោទអ្វីទាំងអស់ ប៉ុន្តែលោកស្រី លីវ ស្យ៉ា បានជាប់ឃុំឃាំងក្នុងគេហដ្ឋាន តាំងពីឆ្នាំ២០១០មក ពោលគឺតាំងពីលោក លីវ ស៊ាវប៉ូ បានជាប់ជាជ័យលាភីរង្វាន់ណូបែលសន្តិភាព។
ក្រោយមរណភាពរបស់លោក លីវ ស៊ាវប៉ូ គ្រប់ចក្ខុកំពុងសំឡឹងរេទៅលោកស្រីលីវ ស្យ៉ានេះ។ សហរដ្ឋអាមេរិក ក៏ដូចជាសហភាពអឺរ៉ុបបានអំពាវនាវឱ្យប៉េកាំងដោះលែងលោកស្រី និងអោយលោកស្រីចាកចេញពីទឹកដីប្រសិនបើគាត់ចង់។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ